Póróvep 17
17
1Nkyi kanong ńkyí adaryí kiǐjínjwóm-kyicê-berêt ne bunyîn-dyityém kyi-shwôm ńkyí adaryí byiryíng-dyijî ké kyise ńkyí nkyi ne afaníkong.
2Ósóng mú mu ne bubong o-já ng busa o-shwôm wǎn-bonchí mú o/ré ǎ, mú o*fí ne dyishí* o-ryí bukyû ké burwám-bwǎn-bonchí.
3Okwâ o-kan n gûl ne syílyíba. Óburúkpâbí o-kan n dyityém ńdyí onet.
4Banet-byibî ba-fwôo ng atông ké byibî-okabe. Banet-byisédéng ba-fwôo atông ké byisédéng.
5Â wo amu a-jwó ng banet-kyikpu, ányi amu a-dángê e Osówo mú o/chi kámbé. Onet mú afaníkong nyí orî-onet nyi a-nyîn n ǎ, oo*ba/chi o-fem busông*.
6Banyinchéng ḿbé baa/kâa ba-yip ng esim ké bwǎn ḿbé bwǎn ebe, wǎ eringe nyí bwǎn badayip esim ké banchí ebe.
7Banet ḿbé mbe ne ofê baa*sét byisédéng* ne enyam-banet ba*fí ne chwǒm ńkyí badasét*.
8Banet bakíri mbe ba-kabe ng ba/fu, ngu mu wǎ bambirirím. Mbé mbe ba-bángê e ba/fu, ngu o-man n echi nang ebóng.
9Â wo amu a-ryuu ng a/fu, wo anyîn banet, pwoo kámbé ké nkéré baa/chi ǒ kyibî. Byibî ezîim byi-man n bucín.
10Dyibîn dyibónge dyi-chi i onet mú mu ne bubong o-kwâa byěm chwóó o-shwôm ḿbyí enyam-onet odakwâa nang ba-mín ǎ kampén kampén.
11Bukyû bu/chi bu-bâ wǎ mbên dyityém-onet-kyitwóm bu-kâm bambên atyém ḿbé mbe ba-cen n ne byiraa kángkáng nkéré.
12Kyi-nwa ng ńkyí adakâm kyibî-enyam ńkyí baa/koo kányí bwǎn kyi-shwôm ńkyí adakâm enyam-onet mú mu o-chi i enyam-byěm.
13Kyibî kii*ba/chi kyi-man ne banyá ké kyise eyên* â amu a-chi i onet mú mu o-chi i ǒ kanong kyibî*.
14Kiimkpet kyikû-okân ké dyishí nkyi wǎ mbwôp kashú-kyikit-oro ńkyí kyidachi oro o-kpû. Mîng okân ké dyishí ámu, o*dachi o-ca kashú*.
15Onet mú mu o-két ng mpan o-nwa bambên atyém ne mú mu o-két ng mpan o-bên banet ḿbé ba*da/chi chwǒm* ba-sa ng Óburúkpâbí kafâ.
16Akpuga ebên ké byěm ekwâa aa*chwáp enyam-onet* ké nǎ, nyǐ o*fí ne bubong*.
17Bacín ba-tông ng kyijé ebe ne barî kángkáng nkéré. Bwǎn-bané ba/byí ebóng kâng, â ba*fí ba-chwáp ng barî ké afaníkong*.
18Onet mú o*fí ne bubong* kǎnchí nké odaryí ocím o/fu, nyǐ o-ré ng dyifwá ńdyí onet okíri.
19Onet mú byibî mbyi byi-nyîn n ǎ, afaníkong nyi a-nyîn n ǎ. [Â amu a-tông ng byiko kángkáng nkéré,] ányi amu a-kyé ng afaníkong.
20Nang yeě nké mu o-kabe ng o-raa ng byibî-byiraa onyît o/fu, nyǐ oo*ri kanong ké chwǒm* kyi-cibi ne afaníkong nké nke*.
21Bonchí mú wǎn emen mu o-chi i enyam-byěm o*fí ne chwǒm kyikíri kyi-cibi ne bafip*.
22Bunyîn-dyityém bu-chi i ǒ a-kyú nyangenyange ké byiko. Kashú ekpút kángkáng nkéré ka-cen n ne bukyû.
23Onet mú o/bên dyityém o-koo ng ngu ké esim o-két mpan mú acît eryí.
24Onet mú mu ne bubong o-tî ng okabe ké byěm-bubong echi, nké enyam-onet o-kpet ng byicê byimúmú.
25Wǎn mú mu enyam o-chi i bonchí emen o-kyú ké bafip, ne o-chi i boné o-sa kyibî-dyityém.
26Kii*nwa ńkyí adachi onet mú o*da/chi chwǒm* o-ré kyiraa*. Nkyi kyibî ńkyí adakye banet ḿbé mbe ba-chi i kanong busông.
27Onet mú mu o-nyît ng byiko emen oo*raa kángkáng nkéré*. Banet ḿbé mbe dyityém chee mbe ne bubong.
28Nang enyam-onet mú mu o-cíbî ng pyêp, ba-fu ng ba/fu, mu ne bubong, ne ba-fu ng, nyǐ mu o-nyît ng chwǒm, â o*da/faa ojá*.
Currently Selected:
Póróvep 17: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
