Jôp 41
41
1Wo a-man n ekám kiǐnyám-baya wǎ mgbalíp ké byílôp?
a-bwá nang kabyíbabang emen ké orí?
2A-man n efé orí ké ozóng emen?
a-fé kámú nang byílôp ké ocím?
3O-tîm m ǒ arông o/fu, wo azú kámú abwô?
O-tîm m ǒ arông o/fu, wo ari kámú bafip?
4O-bángê e ne wo, o-ryí ǒ ocím o/fu,
mǔ o-kyú u ǒ ḿgbán kángkáng nkéré?
5Wo a-bwá ng kámú a-tî wǎ kanurung ńké acáá echi?
a-tî wǎ chwǒm ńkyí bǎmgbán eyên ḿbé banyinyi badakûjwó?
6Bankâm ekworê ba/chi ba-raa kasî ńké badaré kámú?
Bancen kasî ba-két ng kámú byikim ba-shee dí.
7Wo a-man n etím kámú byíbye ké enyam-byiko
nang ké dyishí dí.
8Ta kámú kabónge ne aa*ba/chi a-chîkan*.
Aa*ba/chi a-ráp bunwa ámbu*.
9Nang yeě nké o/ri mgbalíp ámu asa a-man n ǎ, o-myii kyísí.
10Ké nkéré kii/buu kámú, o-kûchi bushî,
onet o*fí mú odacíp o-bwom kámú ké bushú*.
[ 11Yeě mú odarim bunwa ne mǔ ne o-fem.
Onet o*fí ké ejíí emúmú*.]
12Mîng mě n-sét ǒ kyi-kim ne byiká ḿbyí mgbalíp ámu
ne eringe nyí o/rêe ne busa ḿbú mu ne mbú.
13Onet o*fí mu odaman eját kiintaa-esim emen*
o-rim nang [nkyû-byití] mú o/fé*.
14Yeě odaman echi kámú o-bâa byibî-ocím emen
ḿbyí byibî-asháng ámbyi bii/sú ké mbyí.
[ 15Esim] emen ba/chi kányí ne etáng-édem
nyí ba/bwá kányí kyikit kyibónge,
ne e-shwane e wǎ buká.
16Édem nang erá ba/sît kányí ne nnyinyěng kanong kanong.
Nang onyin-bufú oo*man eshwôm ké nyǐ*.
17Ba/bwá kányí kángkáng e-shwane kanong kanong
mú chwǒm nang kyibónge kii*man epii kányí kyi-tî cát*.
18Kiinwángé kyi-san n ké nkéré oo/jâa éjâa,
ne achi emen a-san n wǎ óbyísû-dyicófóróng.
19Bumang-okwâ ne esat byi-byí i kámú ké ocím.
20Erúkwâ e-byí i kámú ké ozóng
wǎ erúkwâ nyí nyi e-fím m ké biǐbyâa
ḿbyí mbe ba-shí i ké kyikû-katí.
21Kiǐnjáng ńkyí mgbalíp ámu kyi-chi i okwâ o-kpet emang,
ne bumang-okwâ bu-byí i kámú ké ocím.
22Kyitông emen kyi/jê busa kanong kanong
ḿbú mbu bu-chi i kángkáng banet ḿbé badakwárê ne mǔ ba-kûshî.
23Kyikit kyi*fí nang kyibónge ké enyam-byiko emen ńkyí nkyi degedege*.
Nang kyirá nkyi kyi-shwane e, ne kii*nwa eta* wǎ kiǐré.
24Dyityém emen ńdyí ndyi wǎ buká dii*shî chwǒm*.
Dyi-shwane e, ne dii*nwa eta* wǎ buká-byěm ekwa.
25Ké nkéré oo/bûu nensang
nang banet ḿbé [mbe ne busa ba-shwôm] ba-shî ng,
baa*man to echwáp byiko ebe*.
26Kashwám ka*fí* nang kyíbye*
nang dyibán* nang mpyi*
ḿbyí byidaman enémê kámú*.
27Kiǐré nkyi kámú degedege wǎ kyiká-kiǐbyâa
ne wǎ kyikwón ńkyí kyi/fwoo.
28Dyibán dyi*fí ńdyí dyidachi kámú o-chêe*.
Aká nyí mbe ba-tím m kámú nyi kámú wǎ byiká-biǐbyâa.
29Kyikim-ochí nkyi kámú wǎ kyiká-kiǐbyâa,
ne o-jwó ng éjwô ké nkéré banet ba-kú ba-tím m kámú byíbye.
30Biǐfágé ḿbyí mbyi kámú ké dyifít mbyi wǎ biǐcíncáng.
Mbyí byi-ját ng esí nyí nyi biǐntóng biintong
wǎ biǐré ḿbyí byidaját esí.
31O-buu ng baya ḿbé baryên wǎ omu mú mu o-fyí i,
ne mu o-chi i kámbé biimpún wǎ bakút ḿbé mbe ba-fyí i.
32Kiǐfáng ńkyí ragerage kyi-byí i kámú ké esim kyi-câ,
ne mu o-chi i baya ḿbé baryên ba-firi ne biǐnfyiryî ḿbyí kpárádádát.
33Chwǒm kyi*fí ké ejíí* ńkyí badakan ne mǔ*.
Mǔ o-chi i enyam nyí e*fí ne bushî*.
34Oo*kúng enyam nang nyí edatông byiko e-shwôm wǎ chwǒm*.
Nkyí nké mu otu mú kángkáng enyam-dyikán.
Currently Selected:
Jôp 41: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
