Jôp 42
42
1Jôp kâng o-faa Óburúkpâbí o/fu,
2Óburúkpâbí, me mu n-nyît ng n/fu, wo amu kángkáng busa,
wo a-man n echi kángkáng byěm ḿbyí amu a-ryuu ng.
3Wo amu a-bí ng eringe nyí me mu n-cíp ng
m-bí ǒ bǎmbím kyi-kim ne bubong eyên,
me chwǒm nn*nyît*.
Me n/raa kyi-kim ne byěm ḿbyí me nn*nyît kyikû*
ne kyi-kim ne byěm-akat ḿbyí mbyi mě biǐtí byi-shwôm ḿbyí ndanyît.
4Wo nké a/sét mě a/fu, me nfwôo atông ké nkéré a-kú a-raa ng.
A/fu, me nkan n-faa ǒ bǎmbím eyên.
5Me m/mû n-nyît ng ńkyí banet bakíri ba/sét mě nké nke,
nké kántîk, me nn/ri ǒ ké achi ejí.
6Ké bubwô ámbu, me éshwân e-kú e-chi i mě
ké kángkáng byěm ḿbyí nn/raa,
ne n/saa byiko m-pwó atông ne édúkǎndú ké byiko.
Nkuli Kyikû-Byiraa
7Ké nkéré Óburúkpâbí oo/raa ne Jôp kpók, o/bírî o-raa ne Elyífaz o/fu, kafâ nke ka-sa ng mě ne wo ne bacín eyên ashí afee, ké nǎ, ben ba*da/sét ntûntû kyi-kim ne mě* wǎ eringe nyí Jôp mú ḿgbán ejí o/sét*. 8Kántîk, kúng n̂g batyép-mpong káchâtkányi ne etyítǎm káchâtkányi ba-kye Jôp ké kyifen echi ké byiko enen. Jôp o/chi o-fé nshwam ké bubwô enen, ne me n/chi n-faa ojá ké nshwam emen, ne mm*ba/chi n-fé běn éshwân nyí e/kwárê ne ben*. Ben ba*da/sét ntûntû kyi-kim ne me* wǎ eringe nyí nyǐ o/sét*.
9Elyífaz ne Byíladat ne Zófa ba/chi ńkyí Óburúkpâbí o/sét kámbé o/fu, bachi, ne Óburúkpâbí o/faa nshwam mú Jôp.
10Ké nkéré Jôp kâng oo/fé nshwam o-kye ké dyishí-bacín emen ámbe ashí achât, Óburúkpâbí o/chi ǎ o-chîfiri ne byěm byi-jê kampén kafee byi-shwôm ḿbyí o/mû ne mbyí kpákpá. 11Kángkáng bwǎn-bané-Jôp ne kángkáng bacín emen ḿbé kpákpá ba/bê ǎ eri. O-chi dyijî ne mbé ké kyise emen. Ba/saa ǎ byiko, ba-fé ǎ dyityém ké kángkáng afaníkong nyí Óburúkpâbí o/mû o/kye ǎ. Nang yeě ké burwám ebe o/kye ǎ akpuga ne ókpâl-gûl.
12Óburúkpâbí o/jware nkuli kyikû-dyikpen ńdyí Jôp o-shwôm eringe nyí o/mû o/jware mbwôp kashú-dyikpen emen. Jôp o/já bajam-égot-etám-ebû bachât esim diǐkpú, ne égot-boonyam-atû ḿbú mbu ne kyirún ké esim bujam esim diǐkpú, ne égot-bampong diǐkpú, ne égot-boonyam-atû buyén etánge. 13Nyǐ o/mû bonchí mú bwǎn-banyinchéng káchâtkányi ne bwǎn-banyinyi bachât. 14O/fé wǎn emen mú onyinyi mú kashú dyizîn o/fu, o-bángê e Jeryíma, o/fu, nnyinyěng-wǎn emen mú onyinyi o-bángê e Kyizáya, mú wǎsíng o-bángê e Kéren-Hápuk. 15Banyinyi bakíri ba/mû ba*fí ké ejíí emúmú* ḿbé ba/mû ba-nwa ng bunong wǎ bwǎn-banyinyi ḿbé Jôp*. Bonchí ebe o/kyii byěm-bukyû emen o-kye kámbé ne bwǎn-bané ebe ḿbé banyinchéng.
16Jôp o/chîrí bajam-aje káchâtkányi. O/kpen o-ri bwǎn ḿbé bwǎn emen ba-fwon ne bwǎn ḿbé bwǎn ámbe ba/fwon. 17Ne o/kpú kâng ké nkéré oo/rí kanong kanong.
Currently Selected:
Jôp 42: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
