Jeryimáya 3
3
Banet ḿbé Ézerel ba*da/fé Dyityém ne Óburúkpâbí*
1Óburúkpâbí o/raa o/fu, â onyinchéng o/man dyibé ne onyi emen, onyinyi ámu o-mîng ǎ o-da-bé onet okíri, otyép emen mú kashú oo*man to o-chîbé onyinyi ámu*. Â o/chî ǎ ebé, kyi-bên n oshê. Nké ben banet ḿbé Ézerel baa/ryí bákyî chwóó, ne kántîk ba-kú ba-ryuu ng ba/fu, ben ba-bwa ng esim ba-kâm mě. 2Bírî n̂g achi ba-tún kyíbóng-eku. Kyikit nkyi kô ńkyí ben ba*da/kyú ne wǎ onet-akpara*? Ben ba/kyú ké bakô-akwóp ba-bám m bákyî enen wǎ eringe nyí banet-Árap mbe ba-kyú u ké kyikim-dyikán ba-bám m banet ḿbé badaju. Ben baa/bên oshê ké akpara enen nyí bamu ba-ryí i. 3Nkyí nké bǎmú ba*da/na*. Ben bamu ba-rángê e ké achi wǎ onet-akpara, éshwân e*fí běn*.
4Ne kántîk ba-kú ba-sét ng mě ba/fu, me n-chi i bonchí enen, ne me nn/jê běn kyi-fím ké nkéré mú ba/mû ba/tôong bwǎsíng. 5Me nn*waa ké busa-dyityém kángkáng nkéré*. Me nn*waa ké kafâ esa ne ben ne banyá*. Éné nké ben ba/raa, ǎ Ézerel, nké ben ba/chi kángkáng byibî ḿbyí ben badaman echi.
Banet ḿbé Ézerel ne ḿbé Júda ba-man ba-saa Byiko, ba-mîng Byibî echi
6Ké nkéré mú Otu Josáya o/mû otu, Óburúkpâbí o/raa ne me o/fu, wo aa/ri ńkyí Ézerel, onyinyi ámu mú o*da/fé dyityém ne me* oo/chi? Nyǐ oo/bírî mě esim, ne oo/kyú wǎ onet-akpara ké kángkáng eku nyí nyáám ne ké kángkáng byichí ḿbyí mbyi byikpó. 7Me m/mû n/kabe n/fu, ké nkéré mú oo/chi kángkáng byěm ḿbyín, nyǐ o/chi o-bwa esim o-kâm mě. Nké nyǐ o*da/bwa esim* ne Júda mú mu wǎ wǎn-boné emen mú onyinyi, mú o*da/fé dyityém ne me* o/ri kánkyí kángkáng. 8Júda to o/ri o/fu, me m/man dyibé ne Ézerel, n-ró ǎ, ké nǎ, nyǐ o/né mě, o-bírî onet-akpara. Nké Júda mú wǎn-boné-onyinyi mú Ézerel, mú o*da/fé dyityém ne me* o*da/shî*. Júda to o/bírî onet-akpara, 9ne éshwân e*da ǎ echi nang kaǎnyín*. Nyǐ o/bên oshê, o-chi kyinam ké ofê mú mu o-kyâ aká ne byichí. 10Ne ké nkéré oo/chi kángkáng byěm ḿbyín, Júda mú o*da/fé dyityém ne me* mú wǎn-boné mú Ézerel, o/nîm onǐm o/fu, nyǐ o-bwa ng esim nyǐ o-kâm mě. O*da/tigi ne dyityém emen*. Me Óburúkpâbí nké n/raa.
11Ne Óburúkpâbí o-sét mě kâng o/fu, nang ké Ézerel ee/bírî ǎ esim, nyǐ oo/tông o/fu, nyǐ o/chi kanong o-shwôm Júda mú o*da/fé dyityém ne nyǐ*. 12Óburúkpâbí o/sét mě o/fu, me nca n-da-sét Ézerel nyí e*da/fé dyityém ne nyǐ* n/fu, bwa n̂g esim ba-kâm mě. Me n-ri ng banet bafip, ne mm*ba/chi n-sa kafâ*. Me mm*ba/chi n-waa ké kafâ esa ne ben ne banyá*. 13Ben bángê ê obángé kâng ba/fu, ben baa/chi kyibî, ne baa/bwom bunwa ne Osówo Óburúkpâbí enen. Sét n̂g ba/fu, ben baa/bwom ké kyichí ńkyí kyikpó nang kyirá ba-yip kyijé enen ba-kye esówo nyí eshê ekíri, ne ben ba*da/chi ńkyí me n/sét běn*. Me Óburúkpâbí nké n/raa.
14Ben banet ḿbé ba*da/fé dyityém ne me* bwa n̂g esim. Me nké n/já běn. N/chi n-fîm onet ké dyishí-oshê, n-fîm banet bafee ké kyikû-banet, ne n/chi m-bwa ne ben esim ké kaku ńké Záyon. 15Me n/chi n-kye běn batu ḿbé mbe ba-chi i ńkyí mu n-sét ng, ne mbé ba/chi ba-tún běn ne byinyídíng ne bubong. 16Ne ké nkéré mú ben kâng baa/jê ké esí ányi, banet baa*raa to kyi-kim ne mkpukpu-byěm ejí*. Baa*kabe to kyi-kim ne mǔ* ba-zîim kámú*. Nang oryuu baa*ryuu to kámú* nang okíri baa*chi to*. 17Ké nkéré mú nkéré ámu oo/fyi, ba/chi ba-kûkó Jerúsélem, Kakyúng-Butu ńké Óburúkpâbí, ne eshê emúmú e/chi e-ba-cibi ányi, e-kye mě ofê. Baa*ba/chi ba-chîchi ńkyí biinshunshwan-byibî-atyém ebe mbyi byi-sét ng kámbé*. 18Ézerel e/chi e-cibi ne Júda, ne mbé ashí amúmú ba/chi ba-fím ké oshê mú bushûyû, mú mbé mbe ba-kyú u wǎ básóng, ba-fyi ké esí nyí n/kye banchí enen ḿbé kpákpá n/fu, ewaa nyí enen ne banyá.
Bakye ḿbé Banet-Osówo mbe ba-sháng ng
19Óburúkpâbí o/raa o/fu,
Ézerel, me m/mû n/chi n-koo ǒ wǎ wǎn ejí,
n-kye ǒ esí nyí enong,
esí nyí e/nwa e-shwôm kángkáng esí ké ejíí.
Me m/mû mu n-ryuu ng n/fu,
wo kó mě a/fu, me n-chi i bonchí eyên,
ne aa*ba/chi a-chî mě ebírî esim ne banyá*.
20Nké wo a*da/fé dyityém eyên ne me*
wǎ onyinyi mú oo*fé dyityém ne otyép emen*.
Me Óburúkpâbí nké n/raa.
21Banet ba/jwo ejá nyí nyi e-fím m kyíbóng-eku.
Banet ḿbé Ézerel nké mbe ba-tii ng, ba-tîm m arông,
ké nǎ, mbé baa/kyú byibî-akpen,
ne baa/ráp Osówo Óburúkpâbí ebe.
22Ben kángkáng mú ba/bírî Óburúkpâbí esim, bwa n̂g esim.
Nyǐ o/chi o-chi běn ba-kûfé dyityém enen ne nyǐ.
Ben bamu ba-bángê e ba/fu, âa, be byimu byi-bâ byi-kâm Óburúkpâbí, ké nǎ, nyǐ nké mu Osówo eten. 23Bakye ḿbé byimu byi-sháng ng kyíbóng-eku ba*fí ba-chwáp ng bě nang kaǎnyín*. Ochwâp mú Ézerel mu o-fím m ké abwô nyí Osówo Óburúkpâbí eten kǎnchí. 24Nké ofê mú byimu byi-kyâ Bâl mú mu osówo mú éshwân, oo/chi bě byi-rím ne kángkáng byěm ḿbyí banchí eten ḿbé kpákpá ba/mû baa/já, byitú ne bwǎn eten, kyi-fím ké bankéré ḿbé ba/shwôm ké esim. 25Byirí kashú kyísí ké éshwân, byi-mîng éshwân eten nyí ee/wuri bě e-cít bě. Be ne banchí eten ḿbé kpákpá kángkáng nkéré byimu byi-chi i byibî byi-bât ng Osówo Óburúkpâbí eten. Nang kabónge byi*da/chi ne ńkyí nyǐ mu o-sét ng bě*.
Currently Selected:
Jeryimáya 3: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
