Jeryimáya 2
2
Eringe nyí Osówo mu o-tún n Ézerel
1Óburúkpâbí o/sét mě 2o/fu, me nsét nang yeě nang yeě mú mu ké Jerúsélem kyitwóm ńkyín. O/fu,
nyǐ mu o-zîim m eringe nyí ben ba/mû ba/fé dyityém ne nyǐ
ké nkéré ben ba/mû ba/tôong boǒbwásíng,
eringe nyí nyǐ o/mû o-jê ng běn
ké nkéré ben ba/bé barî obê óbe.
Ben ba/cen ne nyǐ ké kyikû ba-nyáng kyikim-dyikán,
ba-nyáng esí nyí onet o/mû o*da/kwón ne chwǒm ké nyǐ*.
3Banet-Ézerel, ben ba/mû ba/já mě me kǎnchí.
Ben ba/mû mě chwǒm ńkyí me oyén n/cá.
Me n/twóm afaníkong ne bafip
n-kye nang yeě nang yeě mú o/kye běn busông.
Me Óburúkpâbí nké n/raa.
Kyibî ńkyí Banchí-Banet-Ézerel ḿbé Kpákpá ba/chi
4Ben banet-kyikû-banet ńkyí Jekôp ne kyikû-banet ńkyí Ézerel, fwôo n̂g atông ba-jwo kyitwóm ńkyí Óburúkpâbí. 5Óburúkpâbí o/raa o/fu,
ebóng byiraa ḿbyí banchí enen ḿbé kpákpá ba/sét ba-bât mě.
Ebóng kyi/chi kámbé ba-bírî mě esim.
Mbé ba/kye erím-bakye nyí e*da/byí chwǒm* ofê,
mbé bayén to ba/firi chwǒm ńkyí kyi*da/byí chwǒm*.
6Mbé ba*da/kérê kyi-kim ne me*
nang ké n/nyii kámbé ké abwô nyí banet-Éjip*.
N-tông kámbé bukwóp ba-nyáng kyikim-dyikán,
kyikim-dyikán ńkyí nkyi ne azu-éshíshě ne kiǐjínjwóm
ne kyibî-esí ńkyí onet o*fí o-kyú u*
ne ńkyí onet nang obónge oo*ba/chi o-cen ké nkyí*.
7Me m/bê ne mbé ké esí nyí edafé byiryíng,
eringe nyí badakûryí ḿbyí byidafím ké nyǐ,
ne byěm ḿbyí byinong byikíri ḿbyí mbyi ké nyǐ.
Nké mbé ba/bwa ba-bên esí ejí,
ba-bên oshê mú n/kye kámbé.
8Banchi kyifen ejí ba*da/bí ba/fu,
Óburúkpâbí mu nyá*.
Banchi kyifen ḿbé ejí me oyén ba*da mě enyît*.
Banet-ashí ba/bwom bunwa ne me.
Bamkpábé ḿbé badasét byiraa ejí ba/bírî
ba-raa ké dyizîn ńdyí Bâl,
ba-kye erím-bakye nyí e*da/byí chwǒm* ofê.
Kyiraa ńkyí Óburúkpâbí mu ne Banet Emen
9Ké bubwô ḿbún, me Óburúkpâbí n/chi n-chîsét kyiraa ejí ńkyí mu ne banet ejí.
N/chi n-sét byěm ḿbyí bwǎn ebe ba/chi mě.
10Ca n̂g ké kyicê ńkyí esû nyi e-ríbî ng,
ké oshê mú kace ka/wáp kámú ka-fé ké kafâ,
mú odabángê Sápurus,
ba-twóm to onet ké kyicê ńkyí esû nyi e-byí i,
ké esí nyí Kéda.
Ba/chi ba-ri ba/fu,
dyizong-chwǒm ńdyín dyi*da/chi ne nang kabónge*.
11Oshê okíri o*fí mú oo/yángê esówo ebe*
nang ké esówo ányi e*fí ntûntû*.
Nké banet ejí baa/kúng mě,
me Osówo mú o/bê kámbé ne ofê,
ba-yángê dyishí,
ba-koo esówo nyí ee*man echi chwǒm e-kye kámbé*.
12Ké bubwô ḿbún, mu n-kyâ bubóng busa n/fu,
bunáng ne bushî,
bu-ri kiinkaa-byiko-chwǒm ńkyín.
13Ké nǎ, banet ejí baa/chi byibî byifee.
Mbé baa/bírî mě esim,
me mú mu dyijwáng ńdyí dyidakye dyikpen,
ba-sím abíng nyí nyi ne ekyû,
nyí aa*man eníbî nang kaǎnyín-omu*.
Ńkyí kyi/chi kyi-chi Ézerel ké Bubwô ḿbú ba*da/tî Dyityém Ebe ne Osówo*
14Oshê mú Ézerel o*fí ósóng*.
Ba*da/fwon kámú ké búsóng*.
Ebóng kâng ńkyí banet-bushwôn emen mbe ba-kyé ng kámú eju.
15Mbé baa/nyán kámú
wǎ eringe nyí ekpang edafém.
Baa/chi esí emen e-bírî kyikim-dyikán,
ba-shí eshê emen,
ba-dim ba-mîng kányí.
16Nang banet ḿbé Mémfyis ne Tápánas baa/sé dyishí ńdyí Ézerel.
17Oshê mú Ézerel, wo oyén nké a/koo ńkyín a-pwó ké byiko.
Wo a/mîng mě mú mu Osówo Óburúkpâbí eyên
ké nkéré mu n-tông ng ǒ kiǐfáng.
18Wo a/kabe a/fu, a-ryí i ebóng mpún
â a/dim a-wâa Éjip a-kûdajwáp omu ké kace ńké Nâl.
Wo a/kabe a/fu, a-ryí i ebóng mpún
â a/dim a-wâa Asyírya,
a-kûdajwáp omu ké kace ńké Yuférétyis.
19Byibî eyên byi/chi byi-kye ǒ busông,
ne esim nyí a/bírî mě e/chi e-két mpan o-bên ǒ.
Wo a/chi a-nyît eringe nyí kyi/bên kanong kanong
ńkyí a/mîng mě mú mu Osówo Óburúkpâbí eyên,
a/fu, wo aa*fé to dyityém eyên ne me*.
Me Óburúkpâbí mú o/rêe o-shwôm nké n/raa.
Oshê-Ézerel o/né efé Óburúkpâbí
20Óburúkpâbí mú mu Otu Kyítá o/raa o/fu,
oshê mú Ézerel, wo a/né butu ejí
ké nkéré mú o/shwôm ké esim chwóó.
Wo a/né ńkyí me n/sét ǒ, a-mîng mě efé.
Wo a/fé esówo nyí eda ǒ ekye bwǎn
ké kaku nang kará ńké ka/nyâam,
ne ké kyikû-kyichí nang kyirá ńkyí nkyi kyikpó.
21Me n/cá ǒ wǎ kyichí ńkyí osang emen mú o/nwa o-shwôm ne n-kwón ǒ.
Nké tún kâng a-ri eringe nyí wo a/firi.
Wo a/firi wǎ kiifwoofwoo-kyichí ńkyí kyi*da/byí chwǒm*.
22Nang a-bwa a-yip nsôp mú odajang enwa a-soo byiko eyên,
n-chî ng eri dyikpât ńdyí kyibî eyên.
23Wo a-cen n nǎ ne a-sét a/fu,
wo a*da/bên ne byiko eyên*
a/fu, wo a*da/kye ne Bâl ofê*.
Kûri eringe nyí wo a/kyú ké owo a-chi kyibî.
Ri ńkyí wo aa/chi.
Wo amu wǎ kaanyam-atû ńké nke ké dyikán,
ńké kaa/ri baróng ka-kú ka-kyé ng otyép,
ka-zóngê e ka-câ byiryibyiryi,
[ 24ka-kyé ng kyikim-dyikán ka-câ.]
 ka/firi ké ochéé,
yeě odaman eníbî kánké.
Otyép mú mu o-ryuu ng kánké oo*man o-kye byiko emen afaníkong*.
A-ri ng kánké nang nkéré orá mú badarí ne nké.
25Banet-Ézerel, *da n̂g echi abe-byiká enen a-kâa*
ba-chi nang emiríng enen e-jwóm*
ké okyê mú bamu ba-kyé ng esówo ekíri*.
Nké wo amu a-raa ng a/fu,
aa*wááng* mm*bwa to esim*.
Me n/firi ké kyijé ne esówo nyí eshê ekíri,
ne n-câ ne nyǐ ké kyikû.
Oshê mú Ézerel o/kwárê mú Osówo odakye Kámú Busông
26Óburúkpâbí o/raa o/fu, wǎ eringe nyí banet mbe ba-wuri ng onet-kajii éshwân ké nkéré mú baa/kám ǎ, éné to nké Osówo o/chi o-wuri běn ben banet-Ézerel ashí amúmú éshwân, cibicibi ne batu enen ne banet-ashí-bǎmkpóngé-okákárá enen ne banchi kyifen-Osówo enen ne bamkpábé enen ḿbé mbe ba-sét ng byiraa-Osówo. 27Osówo o/chi o-wuri běn ashí amúmú éshwân, ben mú ba/fu, bonchí enen ányi dyisín-kyichí, boné enen ányi buká. Ńkyín kyi/chi kyi-chi, ké nǎ, ben ba/bírî mě esim, ńkyí ba/mû ba/chi ba-bírî ba-kâm mě. Nké ké nkéré baa/nung ké afaníkong, ba-bí ng mě ba/fu, me nnyii běn.
28Erím-bakye nyí ben ba/mee ba-kye byiko enen nyi nyá. Â e-man n echi, echwáp běn ké nkéré baa/nung ké afaníkong. Banet ḿbé Júda, ben bamu ne esówo nyí e/jê jangjang wǎ eshê enen. 29Me n/chi běn ebóng. Ebóng ben ba/bírî bunwa ne me. 30N/kye běn busông, nké busông ámbu bu*da/chwáp*. Ba*fí ba-bángê e ba/fu, me mbwât běn*. Ben baa/ju bamkpábé enen ḿbé badasét byiraa ejí wǎ ekpang nyí kafâ ka/bírî kányí. 31Banet ḿbé Ézerel, fwôo n̂g atông ba-jwo ńkyí mu n-sét ng. Me mu běn wǎ kyikim-dyikán? wǎ kyibî-esí nyí nyi kyifip kyífip? Ebóng kâng ben bamu ba-raa ng ba/fu, ben ba-chi i eringe nyí kyi/nyîn běn. Ba/fu, ben ne banyá baa*bwa to esim ba-kâm mě*. 32Búsé bu-ráp ng byibwáng emen dí. Aa onyinyi mú mu o-bé ng dyibé nké odaráp ewuryi-dyibé emen dí. Nké banet ejí baa/ráp mě ké bujê-ací nyí onet oo*man to epan. 33Ben bamu ba-nyît ng ké ntûntû eringe nyí badakyé bákyî enen. Nang onyinyi mú o/bên o-shwôm o-man n ekwâa ne ben. 34Byídí enen byi/firi ne byibît-baróng ḿbé banet-byikpu ne banet ḿbé ba*da/chi chwǒm* *chí baróng ḿbé banet ḿbé mbe ba-sé ng byise* ba-jii ng byěm*.
Nké nang ké nkyi éné, 35ben bamu ba-chî ng eraa ba/fu, ben ba*da/chi chwǒm* Óburúkpâbí to ké ntûntû o*fí to o-sa ng kafâ ne ben*. Nké me Óburúkpâbí n/chi n-kye běn busông, ké nǎ, bamu ba-né ng ba/fu, ben ba*da/chi kyibî*. 36Ben baa/bwa ne byiko enen kyísí ké obíri mú ba/bírî ba-kâm esówo nyí eshê ekíri. Éjip e/chi e-fé běn éshwân wǎ eringe nyí Asyírya ba/fé běn. 37Ben ba/chi ba-bírî Éjip esim, ba-tíngê ashí enen kyísí ké éshwân. Me Óburúkpâbí nn/né banet ḿbé ben ba/tî dyityém ne mbé. Baa*ba/chi ba-já chwǒm nang kyibónge ké abwô ebe*.
Currently Selected:
Jeryimáya 2: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
