Jeryimáya 23
23
Okabe etî ké Nkéré mú mu o-bâ ké Kashú
1Jeryimáya o/sét o/fu, mpan mú Óburúkpâbí o/chi o-bên kanong kanong ne batu ḿbé mbe ba-bên n banet emen, ba-chi i kámbé ba-pwôo ng byiryibyiryi. 2Něen nké Osówo Óburúkpâbí mú Ézerel o/raa kyi-kim ne batu ḿbé ba/mû ba/chi ba-kûtún banet emen, o/fu, ben ba*fí ba-tún n banet ejí*. Baa/chi kámbé ba-pwôo byiryibyiryi, ba-ró kámbé ba-twóp kyíjí. Kántîk n-kú m-bâ běn ekye busông ké kyibî ńkyí baa/chi. 3N/chi m-kpî kyicê-banet ejí ké eshê nyí m/mû n/chi kámbé ba-pwôo byiryibyiryi, m-bwa ne mbé ké oshê mú ba/fím. Mbé ba/chi ba-fwon bwǎn chwóó ba-chi burwám ebe bu-jê. 4N/chi n-fîm batu ḿbé ba/chi ba-kûtún kámbé. Banet ejí baa*ba/chi ba-chîshî bushî* ne [me to mm*ba/chi n-chîkye kámbé busông*.] Me Óburúkpâbí nké n/raa.
5Óburúkpâbí o/raa o/fu, nkéré mu o-bâ mú n/chi n-fîm otu mú onong ké kyikû-banet ńkyí Otu Dívit. Otu ámu o/chi o-byí wǎ kyicat-kyichí o-kyú onet-dyishí mú mu ne bubong, ne o/chi o-chi ńkyí nkyi kanong ne ntûntû ké esí emúmú. 6Ké nkéré mú nyǐ o/chi o-firi otu, chwǒm kii*ba/chi kyi-chîchi banet ḿbé Júda* ne banet ḿbé Ézerel ba/chi ba-firi ké bunyîn-dyityém. Ba/chi ba-kû ǎ ekó Óburúkpâbí mú mu Onet-Onyii eten.
7Óburúkpâbí o/raa o/fu, nkéré mu o-bâ mú banet baa*ba/chi ba-chîsem chwǒm ké bushú ejí* wǎ Osówo mú mu okpó* mú o/fîm banet-Ézerel ké oshê mú Éjip*. 8Nké ba/chi ba-kûsem ké bushú ejí, wǎ Osówo mú mu okpó, mú o/fîm banet-Ézerel ké kyikim-esí ńkyí bushûyû ne ké eshê ekíri nyí m/mû mm/pwó kámbé byiryibyiryi ké nyǐ. Mbé kâng ba/chi ba-kyú ké esí nyí ebe.
Kyitwóm ńkyí Jeryimáya o/sét kyi-kim ne Bamkpábé ḿbé badasét Byiraa-Osówo
9Baa/bên dyityém ejí
ne n-kú n-tím m banê.
Ké bubwô ḿbú Óburúkpâbí
ne ḿbú byiraa emen ḿbyí byinong,
me n/firi wǎ onet mú mu o-bwóm m bato,
wǎ onet mú oo/jang ejwáp bato.
10Esí ee/sú pwat ne banet ḿbé ba*da/fé dyityém ne Óburúkpâbí*.
Mbé mbe ba-kyú u byibî-akpen,
ba-chi i busa ebe ké bukwóp ḿbú boo*nwa*.
Ké bubwô-kyishû ńkyí Óburúkpâbí,
esí e-kú e-ta ng dyikán ne byifát bii/jwóm.
11Óburúkpâbí o/raa o/fu,
bamkpábé ḿbé badasét byiraa ejí ne banchi kyifen ejí
ba*fí ba-nyît ng mě*.
Me nn/kâm kámbé ké mbe ba-chi i byibî-byěm
ké kafâ-kiǐtí-kyise-kyifen ejí echi kyiyén.
12Biǐfáng ḿbyí mbe ba-cen n byi/chi byi-kûtyebe,
byi-firi kyifip kyífip.
Me n/chi n-chi kámbé ba-kpán ba-myii.
N/chi m-bâ kámbé ne busông ké byiko
ne nkéré mú busông ebe o-kûfyi.
Me Óburúkpâbí nké n/raa.
13Me nn/ri kyibî ńkyí bamkpábé ḿbé badasét byiraa ejí,
ḿbé mbe ké Samérya mbe ba-chi i.
Mbé baa/raa byiraa ké dyizîn ńdyí Bâl
ne baa/nîm banet ejí.
14Nké me nn/ri bamkpábé ḿbé badasét byiraa ejí
ḿbé mbe ké Jerúsélem
ba-chi ńkyí kyi/bên kyi-shwôm.
Mbé mbe ba-chi i byinam,
ba-sét ng byisédéng.
Mbe ba-chwáp ng banet ba-chi i byibî.
Ké bubwô ḿbún, onet o*fí mú mu o-mîng ng byibî echi*.
Ké dyityém ejí, mbé ba/bên wǎ banet ḿbé Sódom ne Gomóra.
15Ké bubwô ḿbún kâng, nyín ńkyí me Óburúkpâbí mú o/rêe o-shwôm mu n-sét ng kyi-kim ne bamkpábé ḿbé badasét byiraa ejí, ḿbé mbe ké Jerúsélem.
N/chi n-kye kámbé byichí ḿbyí byidaruu ba-ryí
ne bukye ḿbú badajwáp ba-kpú,
ké ebóng, mbé baa/káng byěm ḿbyí bii*nyîn mě*
ké esí emúmú.
16Óburúkpâbí mú o/rêe o-shwôm o/raa ne banet ḿbé Jerúsélem o/fu, *da n̂g echi ba-fwôo atông ké ńkyí bamkpábé ḿbé badasét byiraa ejí mbe ba-sét ng*. Mbe ba-chi i běn ba-kûtî ekabe nyí e*fí ké kafâ*. Mbe ba-sét ng běn ńkyí mbé baa/kabe mbé bayén, *chí ńkyí me n/sét*. 17Mbe ba-sét ng banet ḿbé baa/né ejwo ńkyí me n/sét n/fu, kyi/chi kyi-kyú kanong ne mbé. Ne mbe ba-sét ng nang yeě mú mu o-shwane e dyishí ba/fu, kyibî kii*ba/chi kyi-ta ǎ*.
18Me n/sét n/fu, ké burwám-bamkpábé ḿbé badasét byiraa ejí ḿbén, onet o*fí nang obónge mú oo/nyît okabe mú mu ké dyityém ńdyí Óburúkpâbí*. Onet o*fí ké burwám ebe mú oo/jwo, o-nyît nang kyikû kyi-kim ne kyitwóm emen* o-bwa o-fwôo nang atông o-jwo ńkyí o/sét*. 19Busa-dyityém emen mbu wǎ afú nyí aryên, kyibî-bufú ńkyí kyi/chi kyi-tugi ké ashí nyí bambên atyém, 20ne boo*ba/chi bu-mîng etugi* tete nyǐ o-chi kángkáng byěm ḿbyí nyǐ o/fu, nyǐ o-chi i*. Banet emen ba/chi ba-nyît ńkyín wááng ké ací nyí nyi a-bâ.
21Óburúkpâbí o/raa o/fu, me n*da/twóm bamkpábé ḿbén ḿbé badasét byiraa ejí* nké nang ké n*da/sét kámbé éné* mbé ba/dim byiraa esét. Me n*da/sét kámbé kyitwóm ejí* nké ba/dim ba-da-raa ké dyizîn ejí. 22Â mbé ba/mû ba/nyît okabe mú mu ké dyityém ejí, mbé kâng ba/mû ba/chi ba-sét banet ejí kyitwóm ejí ne ba/mû ba/chi ba-chi kámbé ba-mîng byibî-akpen ḿbyí mbe ba-kyú u ne byibî-byěm ḿbyí mbe ba-chi i.
23Me mu Osówo mú mu ké kángkáng byikit, *chí ké kyikit kyibónge nké nke*. 24Onet o*fí mú odaman erem ké kyikit ńkyí me mm*man ǎ eri*. Ben ba*fí ba-nyît ng ba/fu, me mu ké kángkáng byikit*? ké bubóng ne ké ejíí*? 25Me mu n-nyît ng ńkyí bamkpábé ámbe ḿbé badasét byiraa ejí baa/sét, ḿbé mbe ba-sét ng byisédéng ké dyizîn ejí, ba-sét ng to ba/fu, me n/kye kámbé kyitwóm ejí ké barê eri. 26Bamkpábé ámbe ba-chî ng enîm banet ejí ké byisédéng ḿbyí mbe ba-fwot ng ka-rí nǎ. 27Mbé mbe ba-kabe ng ba/fu, barê ḿbé mbe ba-ri ng ba-sét ng banet ba/chi ba-chi banet ejí ba-ráp mě, wǎ eringe nyí banchí ebe ḿbé kpákpá ba/ráp mě, ba-bírî ba-kâm Bâl. 28Mkpábé mú o/ri burê, osét o/fu, burê nké nyǐ o/ri nké nke. Nké mkpábé mú oo/jwo kyitwóm ejí, osét kyitwóm ánkyi kerededet. Biǐbyâa byi-cen n nǎ ne byi-nwa jangjang ne nkurung. 29Kyitwóm ejí nkyi wǎ okwâ ne wǎ kiǐré ńkyí kyidasé aká rugirugi. 30Nkyi kyi-sa ng mě ne bamkpábé ámbe ḿbé mbe ba-kúng ng ejá nyí barî ba-sét ng kányí ba/fu, kyitwóm ejí. 31Nkyi kyi-sa ng mě to ne bamkpábé ámbe ḿbé mbe ba-sét ng ejá nyí ebe, ba-raa ng ba/fu, e/fím ne me. 32Fwôo n̂g atông ba-jwo ńkyí me Óburúkpâbí mu n-sét ng. Nkyi kyi-sa ng mě ne bamkpábé ḿbé mbe ba-sét ng barê ebe ḿbé mbe byisédéng byísedeng. Mbe ba-sét ng barê ḿbén ba-nîm m banet ejí ne byisédéng ebe ne byiko ebe etông. Me n*da/twóm kámbé* n-sét kámbé nang osêt óset n/fu, bada-sét* ne mbé to ba*fí ba-chwáp ng banet ejí nang kaǎnyín*. Me Óburúkpâbí nké n/raa.
Busông ḿbú Óburúkpâbí
33Óburúkpâbí o/raa ne me o/fu, Jeryimáya, â onet ejí obónge, nang mkpábé mú odasét byiraa ejí, nang nchi kyifen ejí, o/bí ǒ o/fu, Óburúkpâbí o/sét nǎ, sét onet ámu a/fu, wo amu a-kyâ Óburúkpâbí busông, ne o/chi o-né ǒ. 34Â onet ejí obónge, nang mkpábé mú odasét byiraa ejí, nang nchi kyifen ejí, o/raa nang ké ejá éja o/fu, busông ḿbú Óburúkpâbí, n/chi n-kye onet ámu busông ne kyikû-banet emen. 35Nké nang yeě obí bacín emen ne bwǎn-bané emen o/fu, Óburúkpâbí o/faa nǎ. Óburúkpâbí o/raa nǎ. 36Ba*dachi ba-chîraa ejá-kyiraa ńnyín* ba/fu, busông ḿbú Óburúkpâbí* ké nǎ, â onet o/raa éné, n/chi n-chi kyitwóm ejí kyi-kyú ǎ ochíchí-busông. Banet ḿbé Ézerel baa/yángê byiraa ḿbyí Osówo ebe, Osówo Óburúkpâbí mú mu okpó, mú o/rêe o-shwôm. 37Jeryimáya, bí bamkpábé ḿbé badasét byiraa ejí a/fu, Óburúkpâbí o/faa nǎ. Óburúkpâbí o/raa nǎ. 38Ne â mbé ba/né etî kyije ńkyí n/fé kámbé, ba-chîraa ba/fu, busông ḿbú Óburúkpâbí, sét kámbé kâng a/fu, 39m-man n-yip kámbé n-tím tíbítíbí baa*fárâng mě to*. N-tím kámbé cibicibi ne oshê mú n/kye kámbé ne banchí ebe ḿbé kpákpá. 40N/chi n-fé kámbé éshwân nyí ne banyá, nyí banet baa*ráp to kányí ne banyá*.
Currently Selected:
Jeryimáya 23: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
