Jeryimáya 22
22
Kyitwóm ńkyí Jeryimáya o/sét Kyikû-Butu ńkyí Júda
1Óburúkpâbí o/sét mě o/fu, me nca ké kyise ńkyí otu mú Júda n-da-sét ǎ kyitwóm ńkyín 2n/fu, jwo kyitwóm ńkyí Óburúkpâbí, ǎ otu mú Júda mú mu o-kyú u ké kakyúng-butu ńké Otu Dívit, wo ne banet-ashí-bǎmkpóngé eyên ne banet eyên ḿbé bamu ba-nung ng ké afyi ńnyín. 3Óburúkpâbí o/raa o/fu, kûsét ntûntû, *daryí acît*. Nyángê onet mú mbe ba-cít ng ǎ ké abwô nyí onet mú mu o-cít ng ǎ. *Dachi a-cít bacinbánet* ne bwǎn-byibén* ne banyǐnkú* a-tî kámbé ké bukwóp ḿbú boo*nwa*. *Dachi a-ju banet ḿbé ba*da/chi kyibî* ké kyikit ńkyín ńkyí kyi/já mě*. 4Ké nǎ, â wo a/chi chwǒm ńkyín ńkyí me n/sét ǒ, butu bu-waa ng ké kyikû-banet ńkyí Otu Dívit. Ne mbé cibicibi ne banet-ashí-bǎmkpóngé ebe ne banet ebe ba/chi ba-kûshwôm ké afyi nyí kyibám-butu ńkyín ké bamútu ḿbé bubyî-orá budatut ne ké bubyî-orá. 5Nké â wo a*da/chi ńkyí n/sét ǒ* me n-ryí i ǒ ocím n-sem byiko ejí n/fu, kyibám-butu ńkyín kyi/chi kyi-bûu. Me Óburúkpâbí nké n/raa.
6Ké bushú ḿbú ejí, kyibám-butu ńkyí Júda nkyi kyi-nwa ng jangjang wǎ esí nyí Gyílet ne wǎ eku nyí Lebánon. Nké n/chi n-chi kánkyí kyi-firi kyikit ńkyí onet oo*kyú to*. 7Mu n-twóm m banet ba-ba-bên kánkyí. Mbé kángkáng ba/chi ba-bâ ne akye ba-ba-két byikwap emen ḿbyí byidajang enwa ba-twóp kyísí, ba-wuri kámbyí ba-fé ké okwâ.
8Ké nkéré mú kii/chi, eshê chwóó e/chi e-shwôm ké oshê mún, ne banet ba/chi ba-bí barî ba/fu, ebóng Óburúkpâbí o/chi dyizong-chwǒm ńdyín ké kiǐtí-oshê ńkyín. 9Ne mbé ba/chi ba-faa kâng ba/fu, ké nǎ, ben baa/bên ocím mú ben ba/ryí ké dyizîn ejí ne me mú mu Osówo enen, ne baa/fé esówo ekíri.
Kyitwóm ńkyí Jeryimáya o/sét kyi-kim ne Otu Jowáhaz
10Banet ḿbé Júda, *da n̂g etii Otu Josáya*.
*Da n̂g eta dyikán kyi-kim ne bukyû emen*.
Nké tii n̂g Otu Jowáhaz mú wǎn emen kanong kanong.
Ba-kú ba-kúng ng ǎ ba-dim ne nyǐ ké kyikit ńkyí oo*fyi to*.
Oo*ba/chi o-chîri esí nyí ba/fwon ǎ ké nyǐ*.
11Óburúkpâbí o/raa ńkyín kyi-kim ne Otu Jowáhaz mú wǎn-Otu Josáya, mú o/ryí butu ḿbú Júda ké dyishí ńdyí bonchí o/fu, nyǐ oo/dim nyín, oo*ba/chi o-chîfyi*. 12O/chi o-kpú ké oshê mú ba/kúng ǎ ba-dim ne nyǐ, ne oo*ba/chi o-chîri esí ńnyín*.
Kyitwóm ńkyí Jeryimáya o/sét kyi-kim ne Otu Jehóyákim
13Kyi/bên kanong kanong ne onet
mú o/ryí bangu ne o-bi kyise emen,
o-nere kánkyí ké akpuga nyí a*fí nyí emen*
mú mu o-chi i banet-oshê emen ba-chi bǎmkpóngé dyikáá,
o*fí o-kyâ kámbé akpuga-otukáku ebe*.
14Kyi/bên kanong kanong ne onet mú mu o-raa ng o/fu,
n/chi m-bi enyóng n-fé byiko ejí,
n-chi banfût emen ḿbé kyíbóng ba-rêe,
n-fé bawíndu ḿbé banong banong,
n-fé byichí ḿbyí byinong byinong,
n-sabe bakye ḿbé shíshét ké nkyí.
15Wo a-firi ng otu mú o/nwa o-shwôm
â a/bi byise ḿbyí byinong byinong
byi-shwôm ḿbyí banet ḿbé áku?
Bonchí eyên o/ryí byiryíng o-jwáp bato.
O/mû o-sét ng ntûntû,
o-chi i byěm kanong kanong,
ne kángkáng byěm ḿbyí o/chi byi/ce kanong.
16O/pan banet-byikpu mpan mú o*da/ryí acît*
ne byěm emen byi/ce kanong.
 onet o/chi ńkyín ányi mu o-nyît ng Óburúkpâbí.
17Nké wo amu a-kyé ng byěm ḿbyí byida ǒ ejê wo oyén.
Amu a-ju ng banet ḿbé ba*da/chi kyibî*
ne amu a-cít ng banet eyên ké busa.
Óburúkpâbí nké o/raa.
18Ne Óburúkpâbí kâng o-raa kyi-kim ne Otu Jehóyákim
mú wǎn-Otu Josáya, mú otu mú Júda o/fu,
onet o*fí mú o/chi o-tii ǎ*
o-raa nang oraa o/fu,
kyi/bên kanong kanong* ǎ wǎn-boné ejí*.
Onet o*fí mú o/chi o-tii ǎ o/fu,
ô otu kyítá ejí* ô otu ejí*.
19Ba/chi ba-chi ǎ dyizong-bukyû ńdyí badachi kaanyam-atû,
ba-tut ǎ ké kafâ-Jerúsélem ba-byí ne nyǐ ba-da-twóp ǎ kyíjí.
Jeryimáya o/sét ńkyí kyi/chi kyi-chi Jerúsélem
20Banet ḿbé Jerúsélem,
ca n̂g ké Lebánon ba-da-wonge.
Ca n̂g ké esí nyí Báshan ba-da-tii.
Bwom m̂ ké eku nyí Mówep ba-kó,
ké nǎ, baa/kpógê bacín enen kángkáng.
21Óburúkpâbí o/pem ne wo ké nkéré mú kanong nke ǒ ké byiko,
nké wo a*da/fwôo atông a-jwo ǎ*.
Ńkyín nké wo amu a-chi i ké kángkáng dyikpen eyên,
wo a*da/tigi ne a-chi ńkyí Óburúkpâbí mu o-sét ng ǒ*.
22Bufú bu/chi bu-tugi banet-ashí eyên bu-dim ne mbé.
Ba/chi ba-kúng bacín eyên ba-dim ne mbé
wǎ bamgbokobá-byití.
Ba/chi ba-fé oshê eyên éshwân
ké bubwô ḿbú kángkáng byibî ḿbyí wo aa/chi.
23Wo amu a-kyú u ké byise ḿbyí ba/chi ké byichí ḿbyí séda,
ḿbyí ba/fím ne mbyí Lebánon a-jáng ng.
Nké bafip ba/chi ba-kyú ne wo kanong kanong
ké nkéré busông boo/kâm ǒ,
busông ḿbú mbu wǎ ḿbú onyinyi
mú bufwon mbu bu-nwa ng ǎ.
Osówo o/pan Otu Jehóyákin Mpan
24Óburúkpâbí o/sét Otu Jehóyákin mú wǎn-Otu Jehóyákim mú Júda o/fu, wǎ eringe nyí me mu Osówo mú mu okpó, nang a/mû mě ókpâl mú ndayip n-nye kafwa ké nwet, mú mu ké bubwô-etyebéng ejí, n-zú ng ǒ n-twóp, 25n-kúng ǒ n-kye banet ḿbé amu a-shî ng kámbé, banet ḿbé mbe ba-ryuu ng ba/fu, mbé ba-ju ng ǒ. N/chi n-yip ǒ n-kye Otu Nébúkanéza mú Bábyílon ne basúja emen. 26N/chi n-yip ǒ ne boné eyên ké busa ba-jâ oshê okíri wǎ básóng. Ba/chi ba-jâ ké oshê mú ba*da běn efwon ké mǔ* ne ben ashí amúmú ba/chi ba-kpú ké mǔ. 27Ben ba-kû ng eryuu ba/fu, ba-chî ng eri oshê mún, nké baa*ba/chi ba-chîfyi*.
28Me n/raa n/fu, Otu Jehóyákin oo/bírî otyu mú oo/sêe, mú baa/twóp kámú, mú onet o*fí to o-ryuu ng kámú*? Nkyí nké baa/kúng ǎ ne bwǎn emen ba-dim ne mbé oshê okíri wǎ básóng ké esí nyí baa*nyît chwǒm kyi-kim ne nyǐ*?
29Ô banet ḿbé esí ńnyín,
fwôo n̂g atông ba-jwo ńkyí Óburúkpâbí oo/sét.
30Osówo oo/két mpan o-bên onyinchéng mún o/fu,
bwǎn emen bakpú.
O/fu, okyú onet mú oo*já chwǒm*.
Oo*ba/chi o-kyú ne kyikû-banet
ḿbé ba/chi ba-kyú batu ké Júda*
wǎ banet ḿbé kyikû-banet ńkyí Otu Dívit*.
Me Óburúkpâbí nké n/raa.
Currently Selected:
Jeryimáya 22: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
