Jeryimáya 1
1
1Nwet mún o/raa kyi-kim ne ńkyí Jeryimáya mú o/mû wǎn mú Hyíkya, mú o/mû nchi kyifen-Osówo obónge ké oshê mú Anátot ké kyikim-esí ńkyí Běnjámin o/sét. 2Óburúkpâbí o/pem ne Jeryimáya ké nkéré mú Otu Josáya mú wǎn-Ámon oo/ryí butu ké Júda o-rí aje diǐkpú ne achât 3ne o-chîpem ne nyǐ ké nkéré mú Otu Jehóyákim mú wǎn-Otu Josáya o/mû otu. Ńdyí nkéré mún o/shwôm, Óburúkpâbí o/chîpem ne nyǐ kampén chwóó tete kyi-ribi ké nkéré mú Otu Zedekyâ mú wǎn-Otu Josáya oo/ryí butu o-rí aje diǐkpú ne din. Ké etukáku etánge nyí dyije ándyi nké ba/kám banet ḿbé Jerúsélem ba-dim ne mbé.
Osówo o/kó Jeryimáya
4Óburúkpâbí o/sét mě o/fu, 5me n/cá ǒ ne n-kû ǒ ekye dyikpen, ne ba-kû ǒ efwon, me n/cá ǒ n/fu, kyú mkpábé mú odasét byiraa ejí ké eshê.
6Me n/faa n/fu, Óburúkpâbí mú mu Otu Kyítá, me mm*man eraa*. Me n/jang etôong wǎsíng n-shwôm.
7Nké Óburúkpâbí o/raa ne me o/fu, *dachi a-raa a/fu, wo a/jang etôong wǎsíng*. Ca a-kâm banet ḿbé n/twóm ǒ kyikit ebe, a-da-sét kámbé kángkáng byěm ḿbyí me n/kye ǒ busa n/fu, sét. 8*Dachi a-shî kámbé* ké nǎ, me n/chi n-kyú ne wo, n-ku ǒ. Me Óburúkpâbí nké n/raa.
9Ne Óburúkpâbí kâng o-tan bubwô o-ta byibî-ocím ejí, o-raa ne me o/fu, fwôo atông a-jwo. Me n-kú n-kyâ ǒ byiraa ḿbyí wo a/chi a-man a-raa. 10Kurún, me n/kye ǒ busa ḿbú eshê ne batu byidakyú ké bubwô eyên eringe nyí adaman etut kámbyí a-zú a-pwó kyísí, a-bên, a-kpógê, ne eringe nyí adabi byikíri a-chi kámbyí byi-bwom.
Byěm-Akat Byifee ḿbyí Jeryimáya o/ri
11Óburúkpâbí o/bí mě o/fu, Jeryimáya, wo a/ri ebóng. Me n-faa n/fu, n/ri mgbang-kyichí ńkyí badakó ámon.
12Óburúkpâbí o-raa o/fu, a/ri kanong kanong. Me mu m-bám m n-ri n/fu, byiraa ejí byichi eringe nyí me n/sét.
13Óburúkpâbí o-chîraa ne me, o-bí mě kâng o/fu, ebóng chwǒm kyikíri ńkyí wo a/ri.
Me n-faa n/fu, mu n-ri ng katí ńké nke ka-fyí i ké kyicê ńkyí bushûyû, ne ka-kú ka-bâ enep ka-pwôo ka-bírî kyicê ńkyí me m/bwom.
14Nyǐ o-raa ne me o/fu, bukyû bu/chi bu-fím bushûyû bu-fyí bu-pwôo kángkáng banet ḿbé mbe ba-kyú u ké esí ńnyín, 15ké nǎ, me mu n-kó ng kángkáng eshê nyí nyi ké kyicê ńkyí bushûyû n/fu, ebâ. Batu ebe ba/chi ba-bi bukyúng-butu ebe ké ecím-afyi nyí Jerúsélem, ba-wáp ekpe emen. Ba-bi ng to ba-wáp kángkáng eshê ekíri to nyí nyi ké Júda. 16Me n/chi n-kye banet ejí busông, ké nǎ, mbé baa/chi kyibî. Mbé baa/mîng mě, ba-chi byifen ba-kye esówo ekíri, ne baa/sím erím-bakye ba-kye kányí ofê. 17Kpá byiko, ǎ Jeryimáya. Ca a-da-sét kámbé kángkáng byěm ḿbyí n/kye ǒ busa n/fu, sét. *Dachi a-kpet eshî kámbé kántîk* â a/chi, n/chi n-chi ǒ a-kûshî oshǐng kámbé a-shwôm ké nkéré a/firi ne mbé. 18-19Fwôo atông a-jwo, ǎ Jeryimáya. Nang yeě mú mu ké esí ńnyín, batu ḿbé Júda, banet-ashí-bǎmkpóngé-okákárá, banchi kyifen-Osówo ne banet ḿbé kwán ba/chi ba-bwom bunwa ne wo. Nké kurún, me mu n-kyâ ǒ busa ḿbú adaman ebwom a-kwárê kashú ne mbé. Wo a/chi a-kyú wǎ oshê mú ba/bi ekpe ba-wáp kámú ba-fé ké kafâ, a-kyú u wǎ kyikwap-kiǐré, ne wǎ ekpe nyí ba/bi ké biǐré. Mbé baa*ba/chi ba-kpógê ǒ* ké nǎ, me n/chi n-kyú ne wo, n-ku ǒ. Me Osówo Óburúkpâbí nké n/raa.
Currently Selected:
Jeryimáya 1: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
