Azáya 63
63
Óburúkpâbí o/kpógê Eshê
1Yeě mú o/fím něen ké oshê mú Búzara ké Édom mu o-bâ. Yeě o/jang ebwá byídí ḿbyín ḿbyí byinong byinong, ḿbyí shíshét, mú [mu o-cen n o-bâ] ne kiǐtí-busa. Óburúkpâbí mú mu ne busa ḿbú odanyii banet nké mu o-bâ ebasét dyikpóge ńdyí o/kpógê.
2Ebóng byídí emen mbyi byi-jang ng ebwam wǎ ḿbyí onet mú mu o-nwárê ng byirim-byichí o-chi i bato.
3Óburúkpâbí o-faa o/fu, me nn/cím eshê nyí ee*nyît mě* n-fé kyísí wǎ byirim-byichí, onet nang obónge mú o/ba mě echwáp o*fí*. N/cím kányí ne busa-dyityém ne baróng ebe baa/bên byídí ejí kángkáng. 4Me n/tî okabe n/fu, nkéré mú ndanyii banet ejí oo/fyi. Nkéré o/mû oo/fyi mú ndakye banet-bushwôn ebe busông. 5Kyi/chi mě wǎ chwǒm-akat ńdyí n/tún n-ri n/fu, onet o*fí mú oda mě echwáp*. Nké kafâ esa ejí ka/chi mě n-shwane, m-kpógê me kǎnchí. 6Ké kafâ esa ejí, me m/bú byirim-eshê, m-bên kányí. M-pwó baróng ebe kyísí.
Kanong ńké Óburúkpâbí o/nwa ne Ézerel
7Me n/chi n-sét kyi-kim ne kyijé ńkyí Óburúkpâbí ńkyí kii*man*.
Me mu m-kpee ng ǎ ké kángkáng byěm ḿbyí oo/chi o-kye bě.
Nyǐ oo/jware banet ḿbé Ézerel kanong kanong
ké bubwô-bafip emen ḿbé mu o-ri ng banet
ne kyijé emen ńkyí kii*man*.
8Óburúkpâbí o/raa o/fu, mbé ba-chi i banet ejí. Mbé baa*ba/chi ba-nîm mě*. Ne ké bubwô ámbu, nyǐ o/nyii kámbé 9ké kángkáng afaníkong ebe. *Chí orím mú onong* Óburúkpâbí oyén nké o/nyii kámbé. Nyǐ o/nyii kámbé ké kyijé emen ne bafip emen ḿbé mu o-ri ng kámbé. Nyǐ o/tún kámbé kángkáng nkéré ké nkéré mú o/shwôm ké esim, 10nké mbé ba/bírî bunwa ne nyǐ, ba-chi ǎ o-firi bushú kyísí. Ké bubwô ámbu, Óburúkpâbí o-firi onet-bushwôn ebe o-nwa ne mbé.
11Nké [mbé ba/zîim] nkéré mú o/shwôm ké esim, nkéré mú Músis mú ḿgbán-Óburúkpâbí, ne ba-bí ba/fu, Óburúkpâbí mú o/nyii banet-ashí-banet emen ké baya ḿbé baryên mu nyá kántîk. Óburúkpâbí mú o/yip Busun emen o-kye Músis mu nyá. 12-13Óburúkpâbí mu nyá mú ké busa emen o/chi biǐtí-byěm ké abwô nyí Músis, o-pap omu mú baya ḿbé baryên o-cen ne banet emen ba-nyáng ké éshíshě ké otyém-baya, o-chi dyizîn emen dyi-firi kiǐtí ne banyá. Ńdyí Óburúkpâbí o/tông kámbé bukwóp, mbé ba/cen kanong kanong ba*da/kpán dyícíring*. 14Wǎ eringe nyí badakúng bampong ba-ca ne mbé ké bukô-kace ḿbú mbu ne byiryíng, éné nké Óburúkpâbí o/chi banet emen ba-jáng. O/tông banet emen kiǐfáng, o-kye dyizîn emen ofê.
Nshwam mú Osówo oda Bě eri Bafip o-chwáp Bě
15Óburúkpâbí, bírî achi kyísí ké kyikit ńkyí amu a-kyú u ké kanong eyên ne busan eyên ḿbú ragerage a-tún bě. Otî eyên mú a/mû a/jang bě etî mu nyá. Busa eyên mbu nyá. Kyijé eyên ne bafip eyên ḿbé amu a-ri ng bě mbyi nyá. *Dachi a-né bě*. 16Wo a-chi i bonchí eten. Banchí eten, Ébarahâm ne Jekôp, ba*fí ba-nyît ng bě* nké wo Óburúkpâbí amu bonchí eten mú oo/nyii bě kángkáng nkéré. 17Ebóng amu a-mîng ng bě byi-tánê e ké akwóp eyên. Ebóng amu a-chi i bě byi-kûjang eshwane ashí nyí byimu byi-bírî ng ǒ esim. Bwa esim ké dyishí ńdyí bǎmgbán eyên, ké dyishí ńdyí banet ḿbé kángkáng nkéré mbe ḿbé eyên.
[ 18Banet-bushwôn eten baa/ró bě be banet eyên ḿbé banong ké kyikim-nkéré. Baa/bên kyikit-ociring eyên.] 19Wo amu a-chi i bě byěm wǎ a/mû a*da bě ekyú ne otu* wǎ be byi/mû byi*da/kyú ne banet eyên*.
Currently Selected:
Azáya 63: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
