Azáya 62
62
1Me n/chi n-raa n-fé Jerúsélem busa.
Me mm*ba/chi n-cíbî pyêp*
tete n-nyii ǎ*
tete dyikpóge ńdyí o/chi o-kpógê dyi-san
wǎ buka ḿbú badamee ne buchú.
2Jerúsélem, eshê ekíri e/chi e-ri ǒ a-kpógê.
Kángkáng batu ebe ba/chi ba-ri busan eyên ḿbú ragerage.
Ba/chi ba-fé ǒ dyizîn ńdyí dyifyîfî.
Dyizîn ńdyí Óburúkpâbí oyén o/chi o-fé ǒ.
3Wo a/chi a-kyú wǎ etam-butu nyí Óburúkpâbí.
4Baa*kó ǒ to baa/né ǎ*.
Nang esí eyên baa*kó to kányí
onyi mú baa/né ǎ*.
Dyizîn eyên ńdyí dyifyîfî dyi/chi dyi-kûbángê,
nkyi kyi-nyîn n Osówo ne nyǐ.
Ba/chi ba-kûkó esí eyên ba/fu,
ba/bé ǎ ké bunyîn-dyityém.
Ké nǎ, dyityém ndyi dyi-nyîn n Óburúkpâbí ne wo,
ne o/chi o-kyú wǎ otyép mú esí eyên.
5Nyǐ mú o/chi ǒ o/chi o-bé ǒ wǎ kyisat ńkyí kyidakúng wǎn-onyinyi mú o*da/nyît ne onyinchéng* ké dyibé.
Wǎ eringe nyí kyidanyîn onyinchéng ne onyi emen mú o/bé ǎ kántîk,
éné to nké kyi/chi kyi-nyîn Osówo eyên ne wo.
6Me nn/tî banet-mbâm ké ekpe eyên, ǎ Jerúsélem.
Mbé baa*ba/chi ba-cíbî pyêp* buchú ne esû*.
Ba-man ba-zîim Óburúkpâbí byěm emen ḿbyí o/ryí ocím.
Baa*ba/chi ba-mîng ǎ o-ráp*.
7Baa*man ba-mîng ǎ o-jáng*
tete o-bwât Jerúsélem,
o-chi kámú o-firi oshê mú ejíí emúmú edakpee.
8Óburúkpâbí oo/ryí ocím mú shwanshwan,
ne ké busa emen, o-man o-chi eringe nyí o/ryí ocím ámu.
Esang-byichí eyên oo*kyú to byiryíng ḿbyí banet-bushwôn eyên*
ne bacinbánet baa*jwáp to bato eyên*.
9Nké ben mú ba/mû ba/kwón ba-bóng esang-byichí ba/chi ba-ryí byiryíng ba-kpee Óburúkpâbí.
Ben mú ba/mû ba/tún ba-bóng byirim-byichí ba/chi ba-jwáp bato ké kafâ-kiǐtí-kyise-kyifen echi ejí.
10Banet ḿbé Jerúsélem,
byí n̂g ké oshê ba-da-rim bukwóp ba-tî banet enen ḿbé ba-kú ba-fyi ng.
Chi n̂g ndûm-bukwóp.
Fîm m̂ aká ké mbú.
Tî n̂g ekap eringe nyí eshê ekíri edanyît e/fu,
11Óburúkpâbí mu o-je ng o-sét ng ejíí emúmú o/fu,
sét n̂g banet ḿbé Jerúsélem ba/fu,
Óburúkpâbí mu o-bâ běn ebanyii.
Mu o-bâ ne banet ḿbé nyǐ oo/nyii kámbé.
12Ba/chi ba-kû běn ekó ba/fu,
banet ḿbé Osówo ḿbé banong.
Ba-kû běn ekó to ba/fu,
banet ḿbé Óburúkpâbí oo/nyii.
Ba/chi ba-kûkó Jerúsélem ba/fu,
oshê mú mu o-jê ng Osówo.
Ba-kûkó to kámú ba/fu,
oshê mú Osówo o*da/mîng*.
Currently Selected:
Azáya 62: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
