Azáya 58
58
Esong ecíp nyí Ntûntû
1Óburúkpâbí o/raa o/fu, wonge eringe nyí badaman ewonge kakân. Sét banet ejí ḿbé Ézerel kyi-kim ne byibî ebe. 2Mbé mbe ba-fâ mě kángkáng dyicí, ba-tông byiko ba/fu, mbé nkyi kyi-nyîn n kámbé enyît akwóp ejí, ba-chi ńkyí byije ejí byi/sét. Mbé mbe ba-raa ng ba/fu, mbé mbe ba-ryuu ng mě ba/fu, me nkye kámbé byije ḿbyí byinong, ne nkyi kyi-nyîn n kámbé ba-kû mě efé.
3Banet ḿbé Ézerel mbe ba-bí ng ba/fu, be byi-cen n nǎ ne byi-kûcíp esong â Óburúkpâbí o*fí o-ri ng*. Byi-cen n nǎ ne byi-kûkyú bii*ryí byiryíng* â Óburúkpâbí o*fí o-tî ng achi o-ri*.
Óburúkpâbí o/sét kámbé o/fu, ké ntûntû, ben bamu ba-cíp ng esong, nké ba/bwa ba-waa ké nkéré ámu obónge ba-kpet echi ńkyí kyi/nyîn běn, ba-cít ng banet-bǎmkpóngé enen. 4Esong enen nyí bamu ba-cíp ng nyi e-chi i běn ba-kûkyé bakân, ba-shwôn n ashwôn, ba-nwa ng anwa. Ben bamu ba-kabe ng ba/fu, dyizong-esong ecíp ńdyín dyi/chi dyi-chi mě n-fwôo atông n-jwo banshwam enen? 5Ké nkéré ba-kú ba-cíp ng esong, ben bamu ba-kyâ byiko enen busông, ba-tíngê e ashí enen kyísí wǎ kyiká-kiǐbyâa, ba-tát ng byídí-dyikán eta ne atông nyí badarí ké mbyí. Ńkyí nkyí nké ben bamu ba-kó ng esong ecíp? Ben ba/kabe ba/fu, kyi/chi kyi-nyîn mě ké ńkyí bamu ba-chi i éné?
6Dyizong-esong ecíp ńdyí mu n-ryuu ng ndyi něen. Fîm m̂ bamgbokobá ḿbé banet ecít ne atû nyí acît eryí ba-zú banet ḿbé bamu ba-cít ng kámbé abwô. 7Ryí n̂g byiryíng enen ne banet ḿbé esong nyi e-nwa ng kámbé, ba-kûmîng banet-byikpu ḿbé ba*fí ne byise* ba-kûkyú ké byise enen. Kû n̂g ekye banet ḿbé ba*fí ne chwǒm ńkyí badabwá* byídí ba-bwá, ne *da n̂g ené bwǎn-bané enen ben bayén echwáp*.
8Ne kanong ejí kâng ka/chi ka-san běn ké byiko wǎ esû-dyicófóróng, ne byinêm enen byi/chi byi-kpú babap. Me n/chi n-kyú ne ben kángkáng nkéré eringe nyí nda běn enyii. Okyû ejí mú n/chi n-kyú ne ben o/chi o-ku běn ké afaníkong byicê byimúmú. 9Â ba/fé nshwam, n/chi n-faa běn ojá. Â ba/kó mě, n/chi m-bángê běn.
 ben ba/mîng banet ecít, ba-mîng banet epám ne kángkáng byibî-byiraa, 10â ben ba/kye banet ḿbé esong nyi e-nwa ng kámbé byiryíng, ba-kye banet ḿbé ba*fí ne chwǒm* ńkyí mbe ba-ryuu ng, kyifip kâng ńkyí kyi/cít běn kyi/chi kyi-bírî kiinwángé ńkyí okínkán-esû. 11Ne me kâng n/chi n-kû běn ebám kángkáng nkéré, n-kye běn byěm ḿbyí byi/kwárê běn. N/chi n-chi běn ba-shwane, ba-kyú kanong ké enyam-byiko. Ben ba/chi ba-kyú wǎ kyifát ńkyí nkyi ne omu ne wǎ kace ńké kaa*núng*. 12Banet enen ba/chi ba-bwât ńkyí kyi/mû kii/bûu ké nkéré mú oo/shwôm ké esim. Ba/chi ba-bwât ba-bi ké byikû-ekpe ḿbyí kpákpá. Ba/chi ba-nyît běn wǎ banet ḿbé ba/bwât ekpe ba-bi, ḿbé ba/bwât byise ḿbyí byi/bûu ba-bi.
Eyáré nyí Onet odakoo ké Dyicí-Ékwâbashi etî Kanong
13Óburúkpâbí o/raa o/fu, â ben ba/tî dyicí-ékwâbashi wǎ dyicí ńdyí ejí, ba*da/chi ńkyí kyi/nyîn běn ké dyicí ándyi* â dyicí ńdyí dyi/já mě ndyi běn ké dyityém ne ba-kye kándyí ofê ké bucen emîng ecen ne bǎmkpóngé emîng echi, nang â ba*da/raa enyam-byiraa ké dyicí ándyi* 14ben kâng ba/chi ba-já bunyîn-dyityém ḿbú mbu bu-fím m ké ofê mú bamu ba-fâ mě. N/chi n-chi banet ba-kye běn ofê ké ejíí emúmú, ne ben ba/chi ba-kyú ké bunyîn-dyityém ké esí nyí n/kye Jekôp mú o/mû bonchí enen mú kpákpá. Me Óburúkpâbí nké n/raa.
Currently Selected:
Azáya 58: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
