Azáya 49
49
Ézerel nyi Kiinwángé ńkyí Eshê
1Ben eshê nyí tíbítíbí
ne banet ḿbé mbe ba-kyú u ké nyǐ,
fwôo n̂g atông ba-jwo mě.
Ne ba-kû mě efwon, Óburúkpâbí o/cá mě,
o-chi mě o/fu, me nkyú ḿgbán emen.
2O/chi byiraa ejí byi-kûnen wǎ kashwám.
[O/yip bubwô ḿbú emen nyǐ oyén o-ku mě ké afaníkong.]
O/chi mě n-kûnen wǎ dyibán ńdyí ba-kú ba-bâ eché kándyí.
3O/raa ne me o/fu,
banet ḿbé Ézerel ba-chi i ḿgbán emen,
ne ké bubwô ebe,
banet ba/chi ba-kpee mě.
4Me n/raa n/fu, me nn/chi bǎmkpóngé ḿbé ba*da/byí chwǒm*.
Mm/bên busa ejí kángkáng,
nké n*da/man echi chwǒm*.
Nké m-man n efé dyityém ne Óburúkpâbí o-bwom mě ké esim.
O/chi o-yárê mě ké ńkyí nn/chi.
5Ne ba-kû mě efwon, Óburúkpâbí o/cá mě.
O/chi mě o/fu, me nkyú ḿgbán emen m-kpî banet ba-bwa esim,
m-kpî banet ḿbé Ézerel ḿbé baa/pwôo byiryibyiryi
m-bwa ne mbé esim.
Óburúkpâbí mu o-kyâ mě ofê.
Nyǐ nké mu o-kyâ mě busa.
6Óburúkpâbí o/raa ne me o/fu,
ḿgbán ejí, me mu ǒ ne bǎmkpóngé ḿbé mbe kiǐtí ba-shwôm.
*Chí banet-Ézerel ḿbé ba/fem bukyû nké nke nké a/chi a-chîchi kámbé ba-firi kiǐtí*
nké n/chi n-chi ǒ to a-kyú kiinwángé ńkyí eshê ekíri
eringe nyí n/chi n-nyii ejíí emúmú.
7Osówo Óburúkpâbí mú onong mú Ézerel,
mú odanyii kámbé,
mu o-sét ng onet mú mbe ba-jang ng ǎ ené,
mú mu o-sa ng eshê ányi kafâ
ne mú mu ḿgbán mú batu o/fu,
batu ba/chi ba-ri ǒ ké nkéré mú baa/zú ǒ abwô,
ne ba/chi ba-bûu nensang ba-kye ǒ ofê.
Banet-ashí to ba/chi ba-ri kánkyí
ne ba/chi ba-tíngê kyísí ba-kye ǒ ofê.
Ńkyín kyi/chi kyi-chi,
ké nǎ, Óburúkpâbí oo/cá ḿgbán emen.
Osówo Óburúkpâbí mú onong mú Ézerel o-tî ng ocím emen mú o/ryí.
Osówo o/bwa ne Jerúsélem eringe nyí o/mû
8Óburúkpâbí o/raa ne banet emen o/fu,
ké nkéré mú nkéré oo/fyi mú nda běn enyii,
n/chi n-cángê dyityém ne ben,
n-faa ojá ké bukyû enen ḿbú bamu ba-tii ng ba/fu,
me nchwáp běn.
Me n/chi m-bám běn,
n-ku běn ké afaníkong,
ne n/chi n-cen ké abwô enen n-ryí ocím ne kángkáng banet.
N/chi n-chî běn emîng ba-kyú ké esí enen
nyí ee/waa kántîk dyikáá.
9N/chi n-sét banet ḿbé mbe ké mgbokobá n/fu, ca n̂g dyijê,
n-sét ḿbé mbe ké kyifip n/fu,
byí n̂g ba-bâ ké kiinwángé.
Mbé ba/chi ba-kyú wǎ ebû nyí nyi e-ryí i baryî kyíbóng-eku.
10Esong ee*nwa to kámbé*
nang omu to oo*jê to kámbé*.
Esû ne kiinsóngé bii*chi to kámbé chwǒm*
ké nǎ, mú mbé mbe ba-jê ng ǎ nké o/chi o-tông kámbé kiǐfáng.
O/chi o-kpî kámbé ba-ribi ké ajwáng.
11N/chi n-rim bukwóp bu-nyáng eku,
n-chi bukwóp ḿbú banet ejí badacen.
12Banet ejí ba/chi ba-fím tíbítíbí,
ké kyicê ńkyí bushûyû ne ńkyí esû edaríbî
ne ké Áshwan nyí nyi ké kyicê ńkyí busyísen.
13Bubóng, kwán ekwan,
esí, wonge ké bunyîn-dyityém.
Eku ekpet okwan ekwán.
Óburúkpâbí o/chi o-fé banet emen dyityém.
O/chi o-ri banet emen ḿbé mbe ba-ri ng busông bafip.
14Nké banet ḿbé Jerúsélem ba/raa ba/fu,
Óburúkpâbí oo/dim o-mîng bě.
Oo/ráp bě.
15Ne Óburúkpâbí kâng o-faa o/fu,
onyinyi o-man n eráp wǎn mú emen nyǐ oyén dí,
oo*kyú to ne kyijé ne wǎn mú o/fwon*?
 nang onyinyi o-man n eráp wǎn emen,
me mm*man běn eráp ne banyá*.
16Jerúsélem, me mm*man ǒ eráp ne banyá*.
Nn/sáng dyizîn eyên ké etyém-akwâ ejí.
17Banet ḿbé ba/chi ba-bwât ǒ ba-bi mbe ba-bâ abeabe,
ne banet ḿbé ba/bên ǒ ba/chi ba-dim.
18Tún achi a-ri ńkyí nkyi kyi-chi i.
Banet eyên ba-kú ba-cibi ng kyikit kyibónge.
Ba-kú ba-bâ dyijê.
Eringe me mu Osówo mú mu okpó,
wo a/chi a-tông byiko kyi-kim ne banet eyên,
wǎ eringe nyí onyinyi-dyibé odatông byiko kyi-kim ne byibwáng ne biǐré-abwô emen.
19Ba/shí oshê enen o-waa kafâ dyikáá,
nké kántîk, o/chi o-sîi o-shwôm banet ḿbé mbe ba-bâ ebakyú ké mǔ.
Ne banet ḿbé ba/shí kámú baa*ba/chi ba-kyú ba-fárâng běn*.
20Dyicí dyibónge, banet enen ḿbé ba/fwon kámbé kyíjí ba/chi ba-sét běn ba/fu,
esí ńnyín e/sîi e-shwôm.
Byimu byi-ryuu ng kyikit chwóó ńkyí byidakyú.
21Ne ben kâng ba/chi ba-raa ne byiko enen ba/fu,
yeě o/fwon kángkáng bwǎn ḿbén o-kye mě.
Bwǎn ejí ba-kpú,
ne me nn/firi bukwom.
Ba/fîm mě ké oshê ejí ba-ró mě n-dim.
Yeě o/nen bwǎn ḿbén.
Me m/mû n/waa kǎnchí.
Bwǎn ḿbén ba/fím nyá.
22Óburúkpâbí mú mu Otu Kyítá mu o-sét ng banet emen o/fu,
n/chi n-sét eshê ekíri ba-bwa ne bwǎn enen esim dyijê.
23Batu ba/chi ba-firi běn wǎ banchí.
Banyi-batu ba-firi běn wǎ bané.
Mbé ba/chi ba-tíngê kyísí kyísí ké bushú enen ba-kye běn ofê.
Ba-kúng byiko ebe kyísí kyísí ba-kye běn ofê.
Ányi nké ba/chi ba-nyît ba/fu,
me n-chi i Óburúkpâbí.
Onet o*fí mú mu o-bám m ochwâp ejí*
mú oo*ba/chi o-ri kámú*.
24Ben ba-man n ekoo chwǒm ńkyí onet-súja o/yip ké byití?
Ben ba-man n efîm onet-mgbokobá mú otu mú o/bên dyityém oda ǎ efé?
25Óburúkpâbí mu o-faa ng o/fu,
éné nké kyi/chi kyi-chi.
Ba/chi ba-yip onet-mgbokobá
mú onet-súja ba-dim ne nyǐ,
ne ba/chi ba-bam byěm ḿbyí mbên dyityém-otu odayip ké byití.
Me n/chi n-nwa ne nang yeě mú o/nwa ne ben,
ne n/chi n-nyii bwǎn enen n-koo.
26N/chi n-chi banet ḿbé mbe ba-cít ng běn ba-ju barî.
Ba/chi ba-kûbwóm banet eju ne kafâ esa.
Nkéré ámu nké kángkáng banet ba/chi ba-nyît ba/fu,
me n-chi i Óburúkpâbí mú mu o-nyii ng běn,
o-chi běn ba-firi ké byiko enen.
Ba/chi ba-nyît ba/fu,
me n-chi i Osówo mú Ézerel mú mu ne busa.
Currently Selected:
Azáya 49: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
