Azáya 48
48
Osówo o-chi i Bonchí mú Nkéré mú mu o-bâ ké Kashú
1Fwôo n̂g atông ba-jwo ńkyín,
ben banet ḿbé Ézerel,
ben mú ba/fím ké kyikû-banet ńkyí Júda.
Ben bamu ba-sem m dyizîn ńdyí Óburúkpâbí,
ba-sét ng ba/fu, ben bamu ba-fâ Osówo mú Ézerel,
nké ben bamu ba-raa ng ké ejá éja.
2Nké bamu ba-tông ng byiko ba-raa ng ba/fu,
ben ba-chi i banet ḿbé oshê mú o/já Osówo
ne ben bamu ba-jêem m esim ne Osówo mú Ézerel,
mú odabángê Óburúkpâbí mú o/rêe o-shwôm.
3Óburúkpâbí o/raa ne Ézerel o/fu,
ké nkéré mú o/shwôm ké esim chwóó,
me n/sét ńkyí kyi/chi kyi-chi,
ne n/chi kánkyí kyi-chi ba*da/tî ekpu*.
4Me n/nyît n/fu, ben ba/chi ba-shwane ashí,
ba-shwane dyishí wǎ kiǐré,
nang obûn to baa*nwa ebún* wǎ kiǐré.
5Ké bubwô ámbu, me n/sét kyikû ké esim
eringe nyí ben ba/chi ba-kyú
ké nkéré mú mu o-bâ ké kashú,
n/sét byěm ḿbyí byi/chi byi-chi ne byi-kûchi,
eringe nyí ben baa*kûsét ba/fu,
erím-bakye enen nké e/chi kámbyí ne byi-chi*.
6Kángkáng byěm ḿbyí me m/mû n/sét kyikû ké esim bii/chi kántîk.
Ben ba-man ba-bángê ba/fu,
byěm ḿbyí me m/mû n/sét byi/chi ké ntûntû.
Kántîk, me n/chi n-sét běn byěm ḿbyí byifyîfî,
ḿbyí byi/chi byi-chi.
Byěm ḿbyí me m/mû n*da/sét ne*.
7Kántîk nké me n-kú n-chi i kámbyí byi-chi.
Chwǒm kyi*fí wǎ ńkyín*
ńkyí kyi/mû kii/chi ké nkéré mú oo/shwôm ké esim*.
 kyi/mû kii/chi, ben ba/mû ba/chi ba-sét ba/fu,
ben ba/nyît kángkáng kyi-kim ne nkyí.
8Me m/mû n-nyît ng n/fu,
ben baa*fé dyityém ne ben*
ne ben kángkáng nkéré ba-nyît ng běn
wǎ bambwom bunwa ne me.
Nkyí nké ben ba*da/jwo kyi-kim ne ńkyín nang kaǎnyín*
ńkyí nang kyiraa kyibónge kyi*da běn enung ké atông* kyi-kim ne nkyí*.
9Me mu n-kám m busa-dyityém etông
eringe nyí banet ba/chi ba-kpee dyizîn ejí.
Me mu n-kám m kámbú
eringe nyí boo*ba/chi bu-ju běn*.
10Me nn/kan běn ké okwâ mú afaníkong, wǎ eringe nyí badaree kiǐré ké okwâ-bure.
Nké nn/ri n/fu, ben ba*da/byí chwǒm*.
11Ńkyí mu n-chi i,
mu n-chi i ké dyishí ńdyí ejí me oyén.
Mm*ba/chi m-mîng ba-dángê dyizîn ejí*
m-mîng nang onet okíri o-koo kyicê-akpee nyí a/já mě*
nyí nyi nyí ejí kǎnchí*.
Óburúkpâbí o/cá Otu Sárus
12Óburúkpâbí o/raa o/fu,
fwôo n̂g atông ba-jwo mě,
ǎ Ézerel, ben banet ḿbé nn/kó běn.
Me n-chi i Osówo mú o/bwóp kashú
ne mú o/chi o-ryí esim.
Me nké mu Osówo kǎnchí.
13Abwô ejí nké a/chi ne a-sím byikwap ḿbyí byidaníbî ejíí
ne a-chi bubóng bu-tát byikit byimúmú.
Ké nkéré mú n/kó esí ne bubóng,
mbyí byi/byí ké abe byi-bwom ké bushú ejí.
14Cibi n̂g kyikit kyibónge ba-fwôo atông,
ben ashí kángkáng.
Osówo okíri o*fí mú o/man esét o/fu,
onet mú me nn/cá ǎ o/chi o-kye Bábyílon bunwa*.
O-chi ńkyí me mu n-ryuu ng ǎ n/fu, ochi.
15Me nké n/raa ne n-kó ǎ.
Me nké m/bê ne nyǐ,
n-chi ǎ o-kpógê.
16Kántîk, king n̂g ba-fárâng mě,
ba-jwo ńkyí mu n-sét ng.
Me nn/raa wááng kyi-fím ké kiimkpet kyikû
ne kángkáng nkéré mu n-chi i ejá ejí e-kyú ntûntû.
Otu Sárus o-faa kâng o/fu,
kántîk, Óburúkpâbí mú o/rêe o-shwôm oo/kye mě busa ḿbú Busun emen ne oo/twóm mě.
Ńkyí Óburúkpâbí o/fu, Nyǐ o-chi i Banet Emen
17Osówo mú mu onong mú Ézerel,
Óburúkpâbí mú mu o-nyii ng běn o/raa o/fu,
me n-chi i Óburúkpâbí mú mu Osówo enen,
mú mu o-ryuu ng o/fu,
nyǐ o-tángê e běn eringe nyí kyi/chi kyi-nwa kyi-kye běn,
ne mu o-tông ng běn kiǐfáng ńkyí ben badajé.
18Â ben ba/mû ba/fwôo atông ba-jwo byije ejí,
banjware ba/mû ba/chi ba-sen ba-kâm běn wǎ kace ńké kaa*núng*.
Ben ba/mû ba/chi ba-kpógê
wǎ eringe nyí bunâng-baya ḿbé baryên budatím ké bukô emen kángkáng nkéré.
19Bwǎn enen ba/mû ba/chi ba-jê wǎ éshíshě,
ne m/mû mm*ba/chi m-bángê ba-ju kámbé*.
20Byí n̂g ké Bábyílon.
Firi n̂g ké byiko enen.
Sét n̂g ńkyí kyi/chi něen ne bunyîn-dyityém.
Chi n̂g banet ba-nyît kánkyí ké kángkáng byikit.
Óburúkpâbí oo/nyii Ézerel mú ḿgbán emen.
21Ké nkéré mú Óburúkpâbí o/cen ne banet emen ké kiǐsínsóng ne kiǐjínjwóm-kyikim-dyikán,
ba*da/ri busông kyi-kim ne omu mú badajwáp*.
O/chi omu o-byí ké buká o-kye kámbé.
Nyǐ o/chi buká bu-járê omu o-byí.
22Óburúkpâbí o/raa o/fu, bunyîn-dyityém bu*fí ne banchi byibî*.
Currently Selected:
Azáya 48: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
