Azáya 47
47
Mpan mú Bábyílon
1Óburúkpâbí o/raa o/fu,
Bábyílon, shû kyísí ké kakyúng-butu eyên,
a-byak kyísí ké édúkǎndú.
Wo nkéré obónge a/mû wǎ wǎn-onyinyi mú o*da/nyît ne onyinchéng*
oshê mú oo*nwa ekpógê*
nké kántîk, bunong bu*fí ǒ to*.
Wo a/firi ósóng kántîk.
2Bírî buká ḿbú badakwa byěm.
Kwa byiryíng.
Pii kaǎsém ké bushú eyên.
Pii byídí eyên ḿbyí byinong.
Kpá bamkpín eyên kyíbóng a-nyáng buce.
3Banet ba/chi ba-ri ǒ osíndyíbang.
Ba/chi ba-ri ké aa/firi kyísí kyísí ne éshwân.
Me n/chi n-só ǒ ewa,
ne onet o*fí mú oda mě eku*.
4Osówo mú mu onong mú Ézerel nké mu o-chi i bě byi-firi ké byiko eten.
O-bángê e Óburúkpâbí mú o/rêe o-shwôm.
5Óburúkpâbí o/raa ne Bábyílon o/fu,
kyú pyêp ké kyifip.
Baa*kó ǒ to otu-onyinyi mú eshê chwóó*.
6Kafâ ka/mû ka-sa ng mě ne banet ejí.
Me n/tî kámbé wǎ ba/mû ba*fí to ḿbé ejí*.
Me n/fé kámbé ké abwô eyên,
ne wo a*da/ri kámbé bafip*.
Nang ḿbé bakâa, a/kye kámbé busông ḿbú bu/shwôm byiko.
7Wo a/mû a/kabe
a/fu, kángkáng nkéré a-kyú u otu-onyinyi,
ne a*da/kúng byiraa ḿbyín a-fé ké dyityém*
a-kabe nang okabe eringe nkuli kyikû o/chi o-kyú*.
8Fwôo atông a-jwo ńkyín,
wo mú bunyîn-dyityém buda ǒ enyîn.
Wo mú amu a-kabe ng a/fu,
chwǒm kii*ba/chi kyi-chi ǒ*.
Wo a/fu, wo a/rêe jangjang wǎ Osówo,
onet okíri o*fí to wǎ wo*.
Wo a/mû a/kabe a/fu,
wo aa*ba/chi a-kyú onyǐnkú ne banyá*
nang bwǎn baa*kpú ǒ ne banyá*.
9Nké ké kaǎnyín-nkéré,
ké dyicí dyibónge, byěm ḿbyín byifee byi/chi byi-chi.
Nang a-bwa a-chi bambirirím ḿbé amu a-chi i nǎ!
otyép eyên ne bwǎn eyên ba/chi ba-kpú.
10Wo a/kabe a/fu, wo amu kanong ké byibî eyên.
Wo a/mû a/kabe a/fu, onet oo*ba/chi o-ri ǒ*.
Bubong eyên ne byinyídíng eyên bii/nîm ǒ a-róng,
ne a/raa ne byiko eyên a/fu,
me n-chi i Osówo.
Onet okíri o*fí to wǎ me*.
11Busông bu/chi bu-bâ bu-kâm ǒ,
ne bambirirím eyên ba*fí nang babónge ḿbé ba/chi ba-ku kámbú*.
Busông bu/chi bu-kâm ǒ aa*kpá byiko*.
Busông ḿbú a*da/ri nang burê kyi-kim ne mbú*.
12Tî kángkáng bambirirím ne biǐré-bakye eyên ḿbyí wo aa/chi
kyi-fím ké nkéré mú a/mû a/tôong wǎsíng.
Katô byi/chi byi-man ǒ echwáp.
Katô a/chi a-man eyip kámbyí a-fé banet-bushwôn eyên bushî.
13Nang ké amu a-koo ng bacê, wo a*fí ne busa*.
Banet eyên ḿbé mbe ba-sô ng epé ké ékpére babâ ba-ba-chwáp ǒ kâng.
Banet ámbe ḿbé mbe ba-kwâa ng ékpére,
ḿbé mbe ba-kyii ng bubóng ké byikim,
ba-sét ng ǒ kángkáng otukáku [ńkyí] kyi/chi kyi-chi ǒ.
14Mbé ba/chi ba-kyú wǎ boǒzú-biǐbyâa,
ne okwâ o/chi o-shí kámbé.
Baa*ba/chi ba-man enyii nang byiko ebe*.
Bumang-okwâ bu/chi bu-shwôm kámbé busa,
*chí kaǎnyín-okwâ ńké badakyú ké bukô emen ba-jwaa*.
15Ányi kángkáng kanong ńké mbé ba/chi ba-chi ba-kye ǒ,
bankwâa ékpére ámbe ḿbé wo aa/bí kámbé byěm ké kángkáng dyikpen eyên.
Mbé kángkáng ba/chi ba-mîng ǒ ba-dim kiǐfáng ńkyí ebe.
Nang onet obónge oo*ba/chi o-kyú o-nyii ǒ*.
Currently Selected:
Azáya 47: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
