Azáya 44
44
Óburúkpâbí nké nke mu Osówo
1Óburúkpâbí o/raa o/fu,
banet-Ézerel ḿbé mbe ḿgbán ejí,
ḿbé mbe banet ejí ḿbé n/cá,
ne ḿbé mbe bwǎn-Jekôp,
fwôo n̂g atông kántîk ba-jwo.
2Me Óburúkpâbí mú o/chi běn,
kyi-fím ké nkéré mú ba/fwon běn,
me nn/chwáp běn.
*Da n̂g echi ba-shî*.
Ben ba-chi i ḿgbán ejí,
ne banet ejí ḿbé n/cá,
ḿbé mbe ba-jê ng mě.
3Esí nyí nyi e-ryuu ng omu n/chi n-kye kányí omu,
n-chi buce bu-sen ké esí nyí ee/jwóm.
N/chi n-kye bwǎn enen busa ejí,
n-jware kyikû-banet enen.
4Mbé ba/chi ba-kpen wǎ biǐbyâa ḿbyí mbe ba-pwó ng omu ké mbyí kángkáng nkéré,
ne wǎ byichí ḿbyí ké bukô-kace.
5Banet ba/chi ba-raa ké onet ké onet ba/fu,
Óburúkpâbí nké o/já mě.
Banet ámbe ba/chi ba-bâ ba-kâm Ézerel.
Nang yeě o/chi o-sáng dyizîn ńdyí Óburúkpâbí ké bubwô emen,
o-kó byiko emen o/fu,
nyǐ o-chi i onet mú mu ké burwám-banet-Osówo.
6Óburúkpâbí mú mu o-tún n banet ḿbé Ézerel
o-ku ng kámbé ké afaníkong,
ne Óburúkpâbí mú o/rêe o-shwôm o/raa ńkyín o/fu,
nyǐ o-chi i mbwôp kashú ne nryî esim,
ne nyǐ kǎnchí nké mu Osówo.
Osówo okíri o*fí to kyi-cibi ne nyǐ*.
[ 7Osówo okíri mu kô mú odaman echi ńkyí nyǐ oo/chi dí.
Yeě o/mû o/chi o-man esét kángkáng byěm ḿbyí byi/chi byi-chi,
kyi-fím ké kiimkpet kyikû-ejíí
tete kyi-ribi ne banyá ne banyá.]
8Banet ejí, *da n̂g echi ba-shî*.
Ben bamu ba-nyît ng ba/fu,
kyi-fím ké nkéré mú kpákpá tete kyi-ribi kántîk,
me n/sét kángkáng byěm ḿbyí byi/chi byi-chi,
ne ben ba-chi i bantûesé ejí.
Osówo okíri mu kô dí.
Osówo okíri mú mu ne busa mu kô mú me n*da/jwo ne*?
Osówo o/shú Banshâng Bakye
9Kángkáng banet ḿbé mbe ba-chi i erím-bakye ba*da/byí chwǒm* ne esówo nyí nyi kámbé róró ké dyityém e*da/byí chwǒm*. Banet ḿbé mbe ba-fâ esówo ńnyín ba/sêe achi ne ba*fí ba-nyît ng chwǒm* ne ba/chi ba-wuri kámbé éshwân. 10Kyi*da/byí chwǒm* ńkyí onet odasím orím-bukye o-kûfé kámú wǎ Osówo*. 11Nang yeě nké o/fé kámú ba/chi ba-bwa ne nyǐ kyísí. Banet ḿbé mbe ba-sím m erím-bakye ba*fí chwǒm kyikíri kyi-cibi ne banet*. Banet ámbe babâ ba-ba-fé kámbé ké esuk. Ba/chi ba-shî, ba-wuri kámbé éshwân.
12Nree bure o-yip ng kyikim-kiǐré o-fé ké okwâ o-chi kyi-bírî chwǒm. O-yip ng kyitông-bubwô emen ńkyí kyidashwane o-kám áma o-díp kiǐré ánkyi o-chi ńkyí mu o-ryuu ng. Eringe nyí mu o-chi i bǎmkpóngé o-câ kashú, esong e-nwa ng ǎ, omu o-jê ǎ, o-kyee.
13Kápyínta o-kan n kyichí, o-sáng basáng ké nkyí, o-kpêe kánkyí ne o-chi onet ké nkyí, onet mú odanwa mú odatî ké kyise emen. 14O-man n ekét kyichí nang kyirá ké kyizinge o-chi orím-bukye ámu. Kakíri o-kwón n kyichí o-mîng kánkyí kyi-kán. 15Onet o-kúng ng kyichí kyibónge o-chi ekwón o-kúng kánkyí to o-chi orím-bakye. O-kúng ng kyicê kyibónge o-wóngê okwâ mú odajwaa, o-rám byiryíng, o-kúng kyicê o-chi osówo o-kûfé kámú. 16O-yip ng ekwón ekíri o-wóngê okwâ, o-fwá enyam o-ryí o-zût. O-jwaa okwâ ámu o-raa o/fu, okwâ mún mu kanong, mu o-nyange e mě byiko. 17O-kúng kyikim-kyichí kyikíri o-chi orím-bukye, o-kpet etíngê kyísí o-fâ kámú. O-fâ nshwam o-kyâ kámú o-raa ng o/fu, wo a-chi i osówo ejí, nyii mě.
18Azong-banet ányi a/róng enyam ba-shwôm nyí baa*nyît ńkyí mbe ba-chi i*. Ba-ri ng ntûntû ba-cít achi ne atyém ebe. 19Nchi erím-bakye o*fí ne bubong* nang dyishí* ńdyí odaraa o/fu, byichí byikíri mu n-chi i ekwón* n-rám m byiryíng* n-fwá ng enyam ké mbyí n-ryí i*. N-kúng kyicê kyikíri n-chi orím-bukye. Me m/bwa n-waa nyín n-kú n-tíngê e kyísí n-fâ kyikim-kyichí.
[ 20Nkyi eringe ebónge] wǎ o/yip atông o-ryí. Enyam-okabe emen ee/nîm ǎ ké bukwóp ḿbú oo*nwa to echwáp*. Oo*ba/chi o-bángê ké byiko emen nang kaǎnyín o/fu, orím-bukye mú nyǐ mu o-níbî ng ké bubwô oo*chi Osówo*.
Óburúkpâbí nké o/chi Bě ne mu o-nyii ng Bě
21Óburúkpâbí o/raa o/fu,
Ézerel, zîim m̂ ńkyín.
Zîim m̂ ba/fu, ben ba-chi i ḿgbán ejí.
N/chi běn n/fu, kyú n̂g ḿgbán ejí,
ne me mm*ba/chi n-ráp běn*.
22Mm/kpaa byibî enen m-pwó wǎ ófíbí.
Bwa n̂g esim ba-kâm mě.
Me nké mu n-nyii ng běn.
23Bubóng, wonge ê ké bunyîn-dyityém.
Ben byikit ḿbyí mbyi ké kafâ-esí, wonge ê.
Eku ne kángkáng byichí ḿbyí mbyi ké kyizinge,
wonge ê ké bunyîn-dyityém.
Óburúkpâbí oo/tông busa emen
ké onyii mú o/nyii banet emen ḿbé Ézerel.
24Me n-chi i Óburúkpâbí mú mu o-nyii ng běn.
Me nké n/chi běn.
Me Óburúkpâbí mú o/chi kángkáng byěm.
Me kǎnchí nké n/chi bubóng, m-paam kámbú,
ne ké nkéré mú n/chi ejíí,
onet o*da mě echwáp*.
25Me mu n-chi i bansô epé ba-róng enyam,
m-bên byěm ḿbyí banet ḿbé mbe ba-sô ng epé ké ékpére mbe ba-sét ng ba/fu, byi/chi byi-chi.
Mu n-twóp ng byiraa ḿbyí banet-bubong,
n-tông n/fu, bubong ebe mbu ḿbú enyam.
26Nké â ḿgbán ejí o/sét chwǒm ńkyí kyi/chi kyi-chi,
ké nkéré nn/twóm onet-kyitwóm n/fu,
osét okabe ejí,
n-chi i ekabe ányi ne byiraa ámbyi byi-chi wǎ eringe nyí o/sét.
Mu n-sét ng Jerúsélem n/fu, banet ba/chi ba-chîkyú ké mǔ,
n-sét ng to eshê nyí Júda n/fu,
ba/chi ba-chîbwât kányí ba-bi.
Ba/chi ba-bwât byise ba-bi ké biǐbwô-byise ámbyi.
27M-man n efaa ojá obónge baya ḿbé baryên ba-núng.
28M-man n esét Otu Sárus n/fu,
wo nké a/chi a-kyú otu ké bubwô ejí.
Wo a/chi a-chi ńkyí mu n-ryuu ng ǒ n/fu, chi.
A/chi a-kye busa ba-bwât Jerúsélem ba-bi,
ba-chîkpet kiimkpet kyikû-ekpe ebi ńkyí kiǐtí-kyise-kyifen ejí echi.
Currently Selected:
Azáya 44: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
