Azáya 45
45
Óburúkpâbí o/cá Otu Sárus o/fu, okyú Otu
1Óburúkpâbí oo/cá Otu Sárus mú Pésha o/fu, okyú otu.
Oo/fîm ǎ o/fu, okpógê eshê.
Mu o-twóm m ǎ o/fu,
okoo busa ḿbú batu.
Óburúkpâbí o/chi o-bâa afyi-eshê o-tî ǎ.
Óburúkpâbí o/sét Otu Sárus o/fu,
2me oyén n/chi n-chi ǒ kiǐfáng,
n-tare eku nyí kyísí ne nyí e/nyâam.
N/chi n-sé afyi-biǐré,
n-sé biǐré ḿbyí mbe ba-yip ng ba-ku kányí.
3N/chi n-kye ǒ esang chwóó nyí ké byikit-ociring ḿbyí kyifip kyífip.
Ányi nké wo a/chi a-nyît kâng a/fu,
me n-chi i Osówo Óburúkpâbí mú Ézerel
mú oo/kó ǒ ké dyizîn.
4Me n/fîm ǒ n/fu,
chwáp Ézerel nyí nyi ḿgbán ejí,
banet ḿbé me nn/cá.
Nang ké a*fí a-nyît ng mě*
me nn/kye ǒ kiǐtí-ofê.
5Me n-chi i Óburúkpâbí.
Osówo okíri o*fí to*.
N/chi n-kye ǒ busa ḿbú amu a-ryuu ng,
nang ké a*fí a-nyît ng mě*.
6Me mu n-chi i ńkyín
eringe nyí nang yeě ké bukô-ejíí nang burá o/chi o-nyît o/fu,
me n-chi i Óburúkpâbí,
Osówo okíri o*fí to*.
7Me mu n-chi i kiinwángé ne kyifip.
Me mu n-kyâ ojware ne bafip.
Me Óburúkpâbí nké mu n-chi i byěm ḿbyín kángkáng.
8N/chi n-twóm dyikpóge dyi-fím kyíbóng wǎ omu.
Ejíí e/chi e-bâa e-koo kándyí,
ne e/chi e-firi ké byiko emen,
e-kûchi byěm ḿbyí ee*ryí acît*.
Me Óburúkpâbí n/chi n-chi ńkyín kyi-chi.
Óburúkpâbí mú o/chi Ejíí ne o-tún Kányí
9Katí ka-kán n ké dyishí ne onet mú o/chi kánké?
Katí ńké nke wǎ butí ḿbú áku?
Bumee bu-bí ng nchi butí ńkyí mu o-chi i?
Katí ka-man n eraa ka/fu,
onet mú o/chi kánké oo*chi mpwô*?
10Onet mu kô mú odaman ebí bonchí ne boné o/fu,
ebóng kyi/chi ne ba-fwon mě něen?
11Osówo Óburúkpâbí mú onong mú Ézerel,
mú mu o-chi i ńkyí nkyi kyi-bâ ké kashú mu o-sét ng ńkyín o/fu,
ben ba*fí ne bukwóp ḿbú bada ǎ ebí kyi-kim ne bwǎn emen*
ba-sét ǎ nang ńkyí o/chi o-chi*.
12Me nké n/chi ejíí,
ne n-chi banet n/fu, bakyú ké nyǐ.
Ké busa ejí nké n/chi bubóng m-paam kámbú.
Me mu n-níbî ng óbyísû ne otukáku ne ékpére.
13Me oyén nké n/kye Otu Sárus busa n/fu,
ochi okabe ejí,
o-bwât byěm o-tî.
N/chi n-chi bukwóp nang burá ḿbú mu o-cen n bu-firi gogégogé.
O/chi o-bwât oshê ejí mú Jerúsélem o-bi,
o-zú banet ejí ḿbé ba/kám kámbé abwô.
Onet o*fí mú o/yámê ǎ* o-kye ǎ nang ngu o/fu,
ochi kánkyí*.
Óburúkpâbí mú o/rêe o-shwôm nké o/raa.
14Óburúkpâbí o/sét Ézerel o/fu,
esang nyí Éjip ne Sudân e/chi e-kyú nyí enen,
ne biintintang-banet ḿbyí Séba byi/chi byi-firi básóng enen.
Ba/chi ba-bâ ne ben ké kyikû ké bamgbokobá.
Ba/chi ba-tíngê kyísí ké bushú enen ba-raa ba/fu,
Osówo mu ne ben.
Nyǐ kǎnchí nké mu Osówo.
15Osówo mú Ézerel mú mu o-nyii ng banet emen mu Osówo mú mu o-rôo ng byiko emen.
16Éshwân e/chi e-kám kángkáng banet ḿbé mbe ba-chi i erím-bakye.
Ba/chi ba-wuri kámbé éshwân ashí amúmú.
17Nké Óburúkpâbí nké mu o-nyii ng Ézerel,
ne dyikpóge ńdyí ba/chi ba-kpógê dyi-waa ng ne banyá.
Baa*ba/chi ba-wuri banet ebe éshwân ne banyá*.
18Óburúkpâbí nké o/chi bubóng.
Nyǐ nké mu Osówo.
Nyǐ nké o/mee kányí ne o-chi kányí.
O/chi kányí o/fu, eshwane, e-rí.
O*da/chi kányí e-waa ne byěm byiryibyiryi ké kafâ*.
O/tî kányí wǎ kyikit ńkyí banet badakyú.
Nyǐ nké mu o-raa ng o/fu, nyǐ o-chi i Óburúkpâbí,
ne Osówo okíri o*fí to*.
19Me n*da/raa ké kadip*
n-rôo nang okabe ejí*.
N*da/sét banet ḿbé Ézerel n/fu,
batún mě ké kyikit ńkyí byěm mbyi byiryibyiryi*.
Me n-chi i Óburúkpâbí ne mu n-sét ng ntûntû.
Mu n-chi i banet ba-nyît ńkyí nkyi ntûntû.
Óburúkpâbí mú Ejíí ne Erím-Bakye nyí Bábyílon
20Óburúkpâbí o/raa o/fu,
ben kángkáng banet ḿbé ké eshê,
ḿbé ba/fem ké nkéré mú kiǐtí-oshê ánkyi kyi/róng,
bâ n̂g kyikit kyibónge.
Bâ n̂g ba-bwom ké mpan.
Banet ḿbé mbe ba-sháng ng bakye ḿbé baa*man echwáp kámbé* ba-fâ nshwam ba-kyâ kámbé,
ba*fí ba-nyît ng chwǒm nang kaǎnyín*.
21Bâ n̂g ba-ba-sét mpan enen ké esuk.
Banet ḿbé ba/kó kámbé mpan,
bawuri eju ne barî.
Yeě o/sét ké nkéré mú o/shwôm ké esim ńkyí kyi/chi kyi-chi.
*Chí me Osówo Óburúkpâbí mú mu n-nyii ng banet emen dí*.
Osówo okíri o*fí to*.
22Bírî n̂g ba-kâm mě kántîk, n-nyii běn,
ǎ kángkáng banet ḿbé ké ejíí.
Me kǎnchí nké mu Osówo.
23Ocím ejí mú n/ryí mu ntûntû
ne mm*ba/chi n-yángê kámú*.
N/chi kámú shwaneshwane ké kyirim ejí ńkyí me mu.
Nang yeě nang yeě o/chi o-ba-tím arông kyísí ké bushú ejí o-ryí ocím o/fu,
nyǐ o-chi i ńkyí me n/sét.
24Ba/chi ba-raa ba/fu, busa ne dyikpóge ńdyí onet odakpógê mbyi byi-cen n ké abwô ejí nké nke.
Nké ba/chi ba-wuri kángkáng banet ḿbé mu n-sa ng kámbé kafâ éshwân.
25Me Óburúkpâbí n/chi n-nyii kángkáng kyikû-banet ńkyí Jekôp,
ne mbé ba/chi ba-kpee mě.
Currently Selected:
Azáya 45: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
