Azáya 43
43
Osówo o/ryí Ocím o/fu, Nyǐ o-nyii ng Banet Emen
1Óburúkpâbí mú o/chi běn, ǎ Ézerel,
mu o-sét ng běn o/fu,
*da n̂g eshî* me n/chi n-nyii běn.
Me nn/kó běn ké dyizîn ńdyí n/kye běn, ben ba/já mě.
2Â ba/shwôm ké buce ḿbú bu/ríbî,
me n/chi n-kyú ne ben.
Afaníkong enen aa*ba/chi a-shwôm běn busa*.
 ba/shwôm ké okwâ,
oo*ba/chi o-shí běn*.
Biimbâng-okan ḿbyí byi/chi byi-bâ bii*ba/chi byi-chi běn chwǒm*.
3Ké nǎ, me n-chi i Osówo Óburúkpâbí enen,
Osówo mú onong mú Ézerel,
mú mu o-nyii ng běn.
N/chi n-kye Éjip eringe nyí nda běn eré dyifwá.
N/chi n-kye to Sudân ne Séba.
4N/chi n-kye nang byirim-eshê n-nyii běn,
ké nǎ, ben bamu mě ké dyityém,
ne ké nǎ, ben bamu ba-jê ng mě,
ne mu n-kyâ běn ofê.
5*Da n̂g echi ba-shî* me mu ne ben.
N/chi n-fyi ne banet enen kyi-fím ké byikit ḿbyí tíbítíbí
ḿbyí esû nyi e-byí i ne ḿbyí nyi e-ríbî ng.
6N/chi n-sét banet ḿbé bushûyû n/fu, bazú kámbé abwô,
n-sét ḿbé busyísen n/fu,
ba*dachi ba-tím kámbé byizim*.
Mîng n̂g banet ejí ba-fím ké byicê-ejíí byimúmú ba-fyi.
7Mbé ba-chi i banet ḿbé ejí me oyén,
ne n/chi kámbé n/fu,
babâ mě ne akpee.
Banet ḿbé Ézerel mbe Bantûesé ḿbé Óburúkpâbí
8Osówo o/raa o/fu, fé banet ejí ké esuk.
Mbe ne achi, nké baa*rángê*.
Mbe ne atông, nké baa*jwo byěm*.
9Kó kángkáng eshê e-bâ mpan ámu.
Osówo ebe orá mú odaman esét ńkyí kyi/chi kyi-chi
ké nkéré mú ké kashú.
Osówo orá ké burwám ebe o/mû o/sét ńkyí nkyi kyi-chi i kántîk.
Esówo ńnyín ebâ ne bantûesé ebe ba-ba-tông ba/fu,
mbé mbe ba-chi i ńkyí nkyi ké bukwóp,
ba-ba-sét kyi-kim ne ntûntû mú byiraa ebe.
10Banet ḿbé Ézerel, ben bamu bantûesé ejí.
Me n/cá běn n/fu,
bakyú ḿgbán ejí eringe nyí ben ba/chi ba-nyît mě,
ba-fé dyityém ne me,
ne ba-nyît to ba/fu,
me kǎnchí nké mu Osówo.
Osówo okíri o*fí to kyi-cibi ne me*.
O*fí* ne oo*ba/chi o-kyú*.
11Me kǎnchí nké mu Óburúkpâbí.
Me kǎnchí nké nda běn eman enyii.
12Me n/sét kyikû ké esim ńkyí kyi/chi kyi-chi
ne n-dim kâng m-bâ běn ebachwáp.
Osówo mú oshê okíri o*fí nang obónge mú oo/chi ńkyín*.
Ben bamu bantûesé ejí.
13Me n-chi i Osówo,
ne n-waa ng Osówo ne banyá.
Onet o*fí mú odaman efem ké busa ḿbú ejí*
ne onet o*fí mú odaman eyángê ńkyí ndachi*.
Chêe n̂g ba-dim ba-mîng Bábyílon
14Osówo Óburúkpâbí mú onong mú Ézerel,
mú mu o-nyii ng běn o/raa o/fu,
n/chi n-twóm basúja ba-da-nwa ne Bábyílon
eringe nyí n/chi n-nyii běn.
N/chi n-sé afyi-oshê ebe,
ne dyiwonge ńdyí banet-oshê ámu mbe ba-wonge e dyi/chi dyi-bírî bukyû etii.
15Me Osówo Óburúkpâbí enen mú onong.
Me nké n/chi běn, ǎ Ézerel,
ne n-chi i Otu enen.
16Ké nkéré mú o/shwôm ké esim,
Óburúkpâbí o/chi bukwóp bu-shwôm ké baya ḿbé baryên.
Kiǐfáng ńkyí kyi/shwôm ké kace ńké nke ka-náng ng.
17O/tông bujê-basúja kiǐfáng ńkyí badakpú,
basúja ḿbé ba/yú ké bamútu ḿbé bubyî-orá budatut.
Ba/myii dyimyii ńdyí baa*man to ebûu ne banyá*
ba-ríbî wǎ okwâ mú badatuu bufú ba-rîp.
18Nké Óburúkpâbí o/raa o/fu,
*da n̂g echi ba-zîim byěm ḿbyí bii/shwôm ké esim*
ba-kabe nang kyi-kim ne byěm ḿbyí kpákpá*.
19Bám m̂ chwǒm ńkyí kyifyîfî ńkyí mu m-bâ ebachi.
Kii/kpet echi,
ne ba-man n eri kánkyí kántîk.
N/chi n-rim kiǐfáng ké kyikim-dyikán n-fé běn buce ké nkyí.
20Nang enyam-dyikán e/chi e-kye mě ofê.
Boǒnyám ne bunurung ḿbú budakyú ké kyikit ńkyí omu odakaa bu/chi bu-kpee mě,
ké nn/chi omu o-byí ké kyikit ńkyí omu o*fí*
n-tî banet ejí ḿbé n/cá kámbé.
21Mbé nké mbe banet ḿbé n/chi n-kye byiko ejí,
ne ba/chi ba-kwán akpee ejí.
Byibî ḿbyí Ézerel
22Óburúkpâbí o/raa o/fu,
nké Ézerel, ben ba/mû baa/kyee ne me.
Ba*da mě efé*.
23Ba*da/yip ebû ba-shí ba-chi byifen ba-kye mě*.
Ba*da mě ekye ofê ké byifen enen ḿbyí bamu ba-chi i*.
Me n*da běn ekye afaníkong nyí ndafu,
chi n̂g byifen ba-kye mě*
n-kye běn nang afaníkong n/fu,
shí n̂g burwan ba-kye mě*.
24Ben ba*da mě eré burwan*
ba-chi nang ochi kyi-nyîn mě ne bafwám-enyam enen*.
Nké ba/bwa ba-kye mě busông ké byibî enen.
Ba-chi mě n-kyee ké byiko.
25Nké me to nké mu Osówo mú mu o-pwoo ng běn byibî enen,
ne mu n-chi i ńkyín ké bubwô ḿbú dyizong ńdyí me mu.
Mm*ba/chi n-kye běn busông ké bubwô-byibî enen*.
26Byidim m̂ ké esuk.
Bâ n̂g ne chwǒm ńkyí ba/fu, me n/chi běn.
Sét n̂g mpan enen ba-tông ba/fu, ben ba*da/róng*.
27Mbwôp kashú-bonchí enen o/chi kyibî.
Banet-ashí enen ba-chi kyibî ba-bât mě,
[ 28batu enen ba-bên] kyikit-ociring ejí.
Ké bubwô ámbu, m/bê ne bukyû ké Ézerel.
M/mîng banet ejí n/fu,
bakye kámbé edángé.
Currently Selected:
Azáya 43: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
