Azáya 38
38
Otu Hezekyâ o/rwôm Kyirwóm o-nyange
(2 Kyîng 20:1-11; 2 Korónyíkil 32:24-26)
1Ké nkéré ámu, Otu Hezekyâ o/rwôm o/nángê o-kpú. Azáya mú mkpábé mú odasét byiraa-Osówo, mú wǎn-Émoz o/dim ǎ edari, ne o/sét ǎ o/fu, Óburúkpâbí mu o-sét ng ǒ o/fu, wo abwât kángkáng byěm a-tî kerededet, ké nǎ, wo aa*ba/chi a-nyange ké kyirwóm eyên* kpá byiko ḿbyí adakpú.
2Otu Hezekyâ o-bírî bushú ké ekpe, o-fé nshwam o/fu, 3zîim, ǎ Óburúkpâbí, a/fu, me nn/fé ǒ ne dyityém ejí kángkáng, ne nn/kan kángkáng nkéré n-chi ńkyí a/fu, me nchi. Ne o-kpet etii kanong kanong.
4Ne Óburúkpâbí o-sét Azáya kâng o/fu, 5obwa esim kyikit-Otu Hezekyâ o-da-sét ǎ o/fu, me Óburúkpâbí, mú mu Osówo mú Otu Dívit mú bonchí eyên mú kpákpá, nn/jwo nshwam eyên, n-ri batíí eyên. Me n/chi m-mîng ǒ a-chîkpen ké aje onyiryiká. 6N/chi n-nyii ǒ ne oshê mún mú Jerúsélem ké abwô nyí otu mú Asyírya, ne n-ku ng kámú n-ca kashú.
[ 21Azáya o/sét Otu Hezekyâ o/fu, okwám kyirim-kyichí ńkyí badakó fyîk o-lák ké kyifyí emen ne o/chi o-nyange. 22Ne Otu Hezekyâ o-bí kâng o/fu, ebóng ekap nyí e/chi e-tông e/fu, me n/chi m-man ece ké kiǐtí-kyise-kyifen-Osówo echi.]
7Azáya o-faa o/fu, Óburúkpâbí o/chi o-tông ǒ ekap nyí e/chi e-tông e/fu, nyǐ o-tî ng ocím emen mú o/ryí. 8Óburúkpâbí o/chi o-chi [kiǐríribí ńkyí óbyísû kyi-da-cít kyi-bwa esim ké byikit diǐkpú ḿbyí kyi/mû kii/shwôm ké kyikit ńkyí badacen ne ba-yú kyíbóng-kyise ńkyí Otu Éhaz o/bi. Ne kiǐríribí ánkyi kyi-bwa esim ké byikit diǐkpú ḿbyí kyi/mû kii/shwôm.]
9Ké nkéré mú Otu Hezekyâ o/nyange ké kyirwóm emen, o/sáng okwan-akpee mún o/fu,
10me m/mû n/kabe n/fu,
n/chi m-kpú ne bubwásíng,
mm*ba/chi m-kpen n-ribi ké dyicí ejí*.
11Me m/mû n/kabe n/fu,
ké ejíí ńnyín, nyí banet bakpó,
me mm*ba/chi n-chîri Óburúkpâbí*
nang onet mú mu okpó*.
12Ba/mû ba/két dyikpen ejí dyi-man
wǎ mpyep mú badabú
ne wǎ kyídí ńkyí badakét ké kyikit ńkyí ba/tím kánkyí.
[Me m/mû n/kabe n/fu,
Osówo o-kú o-man n dyikpen ejí.
13Bubân bu/chi mě n-tii buchú bumúmú
wǎ ekpang nyi e-sé ng mě byikúú.
Me m/mû n/kabe n/fu,
Osówo o-kú o-man n dyikpen ejí.]
14Ejá ejí e/núng, e-firi kyeekyee,
ne n/tii wǎ kiikong.
Achi ejí a/kyee etún kyíbóng.
Me n/fu, Óburúkpâbí,
nyii mě ké kángkáng afaníkong ejí.
15Me n-sét ng ebóng.
Óburúkpâbí nké o/chi ńkyín.
Dyityém ejí dyi-kú dyi-ruu ng mě,
ne [n*fí m-man n erê*.]
16Óburúkpâbí, [me n/chi m-kpen ké bubwô eyên kǎnchí.]
Chi mě n-nyange m-kpen.
17Busa-dyityém ejí bu/chi bu-bírî bunyîn-dyityém.
Wo [amu a-nyii ng] dyikpen ejí ké kángkáng afaníkong.
Wo amu a-pwoo ng kángkáng byibî ejí.
18Onet o*fí ké oshê-bakúsí mú oda ǒ eman ekpee*.
Banet ḿbé baa/kpú baa*man efé dyityém ké ocím eyên mú a/ryí ne a-tî*.
19Banet ḿbé mbe bakpó nké bada ǒ ekpee
wǎ eringe nyí me mu m-kpee ng ǒ kántîk.
Banchí mbe ba-sét ng bwǎn ebe
eringe nyí wo amu a-tî ng ocím eyên mú a/ryí.
20Óburúkpâbí, wo aa/chi mě n-nyange.
Be byi/chi byi-kim ácîng byi-kwán akpee eyên.
Byi-kwán n akpee eyên
ké kiǐtí-kyise-kyifen eyên echi tete byi-kpú.
Currently Selected:
Azáya 38: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
