Azáya 37
37
Otu Hezekyâ o/bí Azáya Bacê
(2 Kyîng 19:1-7)
1Otu Hezekyâ o-jwo ng ńkyí ba-sét ǎ o-bâ, o-ját byídí emen ké bafip, o-fé byídí-dyikán eta, o-dim ké kiǐtí-kyise-kyifen echi ńkyí Óburúkpâbí. 2O-twóm Elyǎkim ne Shébana ne banchi kyifen-Osówo ḿbé kánkán o/fu, baca kyikit-Azáya mú mkpábé mú odasét byiraa-Osówo, mú wǎn-Émoz. Mbé to ba/mû ba/bwá byídí-dyikán eta. 3Nyín ńkyí o/sét kámbé o/fu, basét Azáya. Ba/fu, kurún dyicí ńdyí afaníkong eri. Ba-kú ba-kyâ bě busông ne byi/firi ne éshwân. Be byi/firi wǎ onyinyi mú o-kú o-bâ efwon, nké busa bu*fí ǎ ḿbú odafwon*. 4Otu mú Asyírya oo/twóm onet-dyishí-basúja emen o/fu, oba-shú Osówo mú mu okpó. Kyi/bát Óburúkpâbí mú mu Osówo eyên ojwo byishû ḿbyín, o-kye banet ḿbé ba/shú kámbyí busông. Ké bubwô ḿbún, fé nshwam a-kye Osówo ké bubwô-banet eten ḿbé ba/tôong bakpó.
5Ké nkéré mú Azáya o/jwo kyitwóm ńkyí Otu Hezekyâ o/twóm, 6nyǐ o/twóm ǎ ejá nyín o/fu, Óburúkpâbí mu o-sét ng ǒ o/fu, wo a*dachi a-mîng banet ḿbé Asyírya ba-fé ǒ bushî* ké ńkyí mbe ba-sét ng ba/fu, nyǐ oo*man běn echwáp*. 7Óburúkpâbí o/chi o-chi otu mú Asyírya o-jwo byiraa ḿbyí byi/chi byi-chi ǎ o-bwa esim ké oshê emen, ne Óburúkpâbí o/chi o-chi ba-ju ǎ áku.
Banet ḿbé Asyírya ba/chîtwóm Kyitwóm Kyikíri ńkyí Bunwa
(2 Kyîng 19:8-19)
8Onet-dyishí-basúja ḿbé Asyírya o/jwo ba/fu, otu mú Asyírya oo/dim ké Lákyishi o-kú o-nwa ng ne oshê mú Lyíbana, mú o/fárâng ányi. Ne o-dim o-wâa ányi o/fu, nyǐ o-da ng epem ne nyǐ. 9Kyitwóm kyi/kâm banet ḿbé Asyírya ba/fu, Otu Tyiráka mú Sudân oo/kúng basúja ḿbé Éjip o-kú o-bâ o-ba-kye kámbé bunwa. Ké nkéré otu mú Asyírya o/jwo ńkyín, o/twóm léta o-kâm Otu Hezekyâ 10mú Júda o-sét ǎ o/fu, Osówo mú wo a/fé dyityém ne mǔ oo/sét ǒ o/fu, wo aa*ba/chi a-róng ké abwô ejí* nké *dachi a-mîng ńkyí ánkyi kyi-nîm ǒ*. 11Wo aa/jwo ńkyí otu mú Asyírya odachi oshê nang orá mú nyǐ o/fu, nyǐ o-bên n kámú. Wo a/kabe a/fu, wo a-man n efem dí. 12Banchí ejí ḿbé kpákpá ba/bên eshê nyí Gózan ne Háran ne Rézep, ba-ju banet ḿbé Bétédin ḿbé ba/mû ba-kyú u ké Telása, osówo ebe nang obónge o*da/man enyii kámbé*. 13Batu ḿbé eshê nyí Hámat ne Ápat ne Sefabyâm ne Héna ne Éba mbe nyá.
14Otu Hezekyâ o-koo léta ámu ne banet ḿbé ba/twóm kámbé o-kó. Ne o-dim kâng ké kiǐtí-kyise-kyifen-Osówo echi, o-tî léta ámu ányi ké bushú ḿbú Óburúkpâbí 15ne o-fé nshwam o/fu, 16Óburúkpâbí mú o/rêe o-shwôm, Osówo mú Ézerel, mú a/kyú ké kakyúng-butu eyên ńké nke ké esim nyí byěm byifee ḿbyí ba/mee ké gûl ne abyibabang ebe táttát. Wo kǎnchí nké amu Osówo mú mu o-tún n kángkáng batu ḿbé ké ejíí. Wo nké a/chi bubóng ne esí. 17Kántîk, ǎ Óburúkpâbí, jwo bě, a-ri ńkyí nkyi kyi-chi i bě. Fwôo atông a-jwo kángkáng byiraa ḿbyí Otu Senakaríp mu o-sét ng, o-kyâ ǒ edángé, wo Osówo mú mu okpó. 18Be kángkáng byimu byi-nyît ng, ǎ Óburúkpâbí, byi/fu, batu ḿbé Asyírya baa/bên eshê chwóó, ba-chi esí ebe e-waa kafâ dyikáá, 19ba-shí bakye ebe ḿbé ba/mû ba*fí esówo nang kaǎnyín* ba/mû erím-bakye-byichí ne aká nyí banet ba/kúng abwô ne ba-chi. 20Kántîk, ǎ Osówo Óburúkpâbí eten, nyii bě ké abwô nyí banet ḿbé Asyírya, eringe nyí kángkáng eshê nyí ké ejíí e/chi e-nyît e/fu, wo kǎnchí nké amu Osówo.
Azáya o/twóm Kyitwóm kyi-kâm Otu Hezekyâ
(2 Kyîng 19:20-37)
21Azáya o/twóm kyitwóm kâng kyi-kâm Otu Hezekyâ o/fu, ké nshwam mú otu o/fé, 22Óburúkpâbí oo/kye ǎ ejá o/fu, Otu Senakaríp, oshê mú Jerúsélem mu o-jwó ng ǒ o-shú u ǒ. 23Wo a/kabe a/fu, wo amu a-kyâ yeě edángé, a-fát ng ǎ kiikuku. Wo a*fí a-fâ mě me Osówo mú mu onong mú Ézerel*. 24Wo a/twóm bǎmgbán eyên a/fu, baba-tông byiko ne me ba/fu, wo aa/yip kángkáng bamútu eyên ḿbé bubyî-orá budatut a-kpógê eku nyí Lebánon nyí e/nyâam e-shwôm. Wo aa/nyîim esim a/fu, ké eku ányi, wo a/twom byichí ḿbyí byi/kwóp byi-shwôm ne ḿbyí byi/nwa byi-shwôm, ne wo a/nung ké byikit-kyizinge ḿbyí byi/tíbî byi-shwôm. 25Wo a/yip esim a/fu, wo a/sím abíng-omu a-jwáp omu ké esí nyí e*fí nyí eyên* ne abe-byiká nyí basúja eyên a/cím kace ńké Nâl ka-núng.
26Wo a/mû a*da/jwo ne a/fu, me nké n/fu, ké nkéré mú oo/shwôm ké esim chwóó n/fu, ńkyín kyichi*? Ne kántîk nn/chi kánkyí. Me nké n/kye ǒ busa n/fu, bírî eshê nyí ba/ro kányí e-firi biǐbwô-byise. 27Banet ḿbé ba/mû ba-kyú u ké eshê ányi ba/mû ba*fí ne busa*. Ba/mû ba-shî ng, asa a-man kámbé. Mbé ba/mû wǎ biǐbyâa ḿbyí ké kyifát ne wǎ biǐbyâa ḿbyí mbyi byi-kán n kyíbóng-kyise, [ḿbyí kiǐsínsóng-bufú kyidashí kámbyí.]
28Nké me mu n-nyît ng kángkáng byěm kyi-kim ne wo, ńkyí amu a-chi i ne kyicê ńkyí amu a-wâa ng. Me mu n-nyît ng eringe nyí wo amu a-bírî ng bunwa ne me. 29Baa/sét mě kyi-kim ne bunwa ámbu ne byiko eyên ámbyi etông, ne kántîk, n/chi m-kpong ǒ byílôp ké ozóng, n-fé ǒ kaǎkím-kiǐré ké ocím, n-kúng ǒ m-bwa ne wo ké kiǐfáng ńkyí a/cen ne a-bâ.
30Ne Azáya o-raa kâng ne Otu Hezekyâ o/fu, nyín ekap nyí ńkyí kyi/chi kyi-chi. Ké dyije ńdyí kyízîn ne ńdyí ndyi dyi-bâ, ben ba/chi ba-bóng byiryíng ké kafâ-dyikán ne ba-ryí, nké ké nnyinyěng-dyije, ben ba/chi ba-man ekwón byiryíng ba-fuu, ba-kwón byichí ḿbyí byidazím byirim, ba-ryí byirim emen. 31Banet ḿbé ké Júda ḿbé ba/chi ba-waa bakpó ba/chi ba-kán wǎ byichí ḿbyí eriri ebe ee/ríbî e-jâ kyísí byi-zím byirim. 32Banet ba/chi ba-kyú ké Jerúsélem ne ké kaku ńké Záyon ḿbé ba/chi ba-kpen, ké nǎ, Óburúkpâbí mú o/rêe o-shwôm o/fu, nyǐ o-chi i ńkyín kyi-chi.
33Nyín ńkyí Óburúkpâbí oo/raa kyi-kim ne otu mú Asyírya. Otu ámu oo*ba/chi o-nung ké oshê mún* o-ché nang dyibán dyibónge ké mǔ*. Onet-súja mú mu ne édem o*fí mú o/chi o-fárâng oshê mún* ne baa*man ebi byikit ḿbyí badayú ké ekpe emen*. 34O/chi o-bwa esim ké kiǐfáng ńkyí o/cen ne o-bâ, oo*ba/chi o-man enung ké oshê mún*. Me Óburúkpâbí nké n/raa. 35Me n/chi m-bwom bunwa ké oshê mún n-ku kámú ké bubwô ḿbú ofê ejí, ne ké bubwô-ocím mú n/ryí Otu Dívit mú ḿgbán ejí.
36Orím mú onong mú Óburúkpâbí o/ce ké kyikit ńkyí basúja mbe ba-rí i o-da-ju bajam-égot-basúja bajam bafee esim nyâchât ne égot-basúja etánge. Ké nkéré mú dyicí dyi/cé, ba/ri kámbé kángkáng ké ba/firi byikwóm byikwóm. 37Ne Otu Senakaríp kâng o-mîng byití enwa o-dim dyijê ké Nyínyíve.
38Dyicí dyibónge, ké nkéré mú mu o-kyâ Nyísok mú osówo emen ofê ké kyise-kyifen emen, bwǎn emen ashí afee, Adaramélek ne Sharéza ba/yip bushwám ebe ba-ju ǎ, ba-chêe ba-jâ ké esí nyí Arárat. Wǎn emen mú obónge, mú odabángê Esahádon o-ryí butu ké kyikit emen.
Currently Selected:
Azáya 37: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
