Azáya 11
11
Butu ḿbú Bunyîn-Dyityém
1Kyikû-butu ḿbú Otu Dívit nkyi wǎ kyichí ńkyí baa/twom, nké wǎ eringe nyí byicat byidatím ké kyikû-kyichí, éné to nké otu mú ofyîfî o/chi o-byí ké burwám-bwǎn-Otu Dívit.
2Busun ḿbú Óburúkpâbí bu/chi bu-kye ǎ byinyídíng chwóó
ne busa ḿbú odatún banet emen.
O/chi o-nyît okabe mú Óburúkpâbí o-kye ǎ ofê,
3ne o/chi o-kûchi ńkyí Óburúkpâbí oda ǎ esét ne bunyîn-dyityém.
Oo*ri onet ké achi o-jwo ojwo ójwo
o-pan onet ámu mpan*.
4O/chi o-pan banet-byikpu mpan mú onong,
o-kye banet ḿbé ba*fí ne busa* ńkyí kyi/já kámbé.
Ké busa ḿbú o/chi o-kye,
ba/chi ba-kye banet busông,
ne byibî-banet byi/chi byi-kpú.
5O/chi o-tún banet emen ké bukwóp ḿbú ntûntû,
oo*ryí acît*.
6Ekpang ne ebû e/chi e-kyú kyikit kyibónge ké bunyîn-dyityém,
ne ekpang e/chi e-rí kyikit kyibónge ne bwǎn-ebû.
Bwǎn-bampong ne bwǎn-ekpang ba/chi ba-kûryí baryî kyikit kyibónge,
ne bwǎsíng ba/chi ba-kûtún kámbyí.
7Bampong ne banjúkpang ba/chi ba-kûryí byiryíng kyikit kyibónge,
ne bwǎn ebe ba/chi ba-kûrí kyikit kyibónge ké bunyîn-dyityém. Ekpang e/chi e-kûryí biǐbyâa
wǎ eringe nyí bampong mbe ba-ryí i.
8Nang wǎn-ojújwô o-chi acáá ne efyi,
ee*ba/chi e-jwóm ǎ*.
9Kyibî-chwǒm kii*ba/chi kyi-kyú ké kaku ńké Záyon*
ńké nke kaku-ociring ńké Osówo*.
Esí e/chi e-sú ne Óburúkpâbí enyît
wǎ eringe nyí omu odasú ké baya.
Banet ḿbé ba/kám Kámbé ba-dim ne Mbé ba/chi ba-fyi
10Dyicí ndyi dyi-bâ ńdyí otu mú ofyîfî mú o/fím ké kyikû-butu ńkyí Otu Dívit o/chi o-kyú ekap nyí banet. Ba/chi ba-cibi ké oshê-butu emen ba-kye ǎ ofê. 11Ké nkéré mú dyicí ándyi dii/fyi, Óburúkpâbí o/chi o-chîkúng busa emen o-bwa esim dyijê ne banet emen ḿbé ba/mîng kámbé ké Asyírya ne Éjip, ké esí nyí Pátoros ne Sudân ne Élam ne Bábyílon ne Hámat ne ké bakô-baya ḿbé baryên ne ké esí nyí baya ba/wáp kányí ba-fé ké kafâ. 12Óburúkpâbí o/chi o-tông eshê ekap o/fu, nyǐ mu o-chî ng ekpaa banet emen o-tî kyikit kyibónge, banet ḿbé Ézerel ne Júda ḿbé baa/pwó kámbé byiryibyiryi, o-bwa ne mbé esim ba-fím ké bakô-ejíí bamúmú. 13Orêm oo*chi to banet ḿbé Ézerel ne banet ḿbé Júda* ne Júda oo*kyú to onet-bushwôn mú Ézerel*. 14Mbé ba/chi ba-cibi kyikit kyibónge ba-kye banet ḿbé Fyilíta bunwa ké kyicê ńkyí esû nyi e-ríbî ng, ba-kpógê banet ḿbé mbe ba-kyú u ké kyicê ńkyí esû nyi e-byí i. Ba/chi ba-kpógê banet ḿbé Édom ne Mówep, ne banet ḿbé Ámon ba/chi ba-chi ńkyí mbé ba/chi ba-sét kámbé. 15Óburúkpâbí o/chi o-chi dyiga-baya ńdyí Suwêz dyi-núng, ne o/chi o-bâ ne bufú ḿbú budasóng ḿbú bu/chi bu-chi kace ńké Yuférétyis ka-núng, o-mîng boǒbwán-booce káchâtkányi nké nke, eringe nyí nang yeě nang yeě o/chi o-man enyáng. 16Banet emen ḿbé Ézerel ḿbé baa/fem bukyû ké Asyírya ba/chi ba-kyú ne bukwóp ḿbú o/chi o-tông kámbé ba-byí ké Asyírya, wǎ eringe nyí banchí ebe ḿbé kpákpá ba/mû ne bukwóp ńdyí ba/byí ba-mîng Éjip.
Currently Selected:
Azáya 11: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
