Azáya 12
12
Okwan mú Asǎma ekó
1Banet ba/chi ba-kwán ké dyicí ándyi ba/fu,
me n/chi n-kó ǒ asǎma, ǎ Óburúkpâbí.
Wo a/mû a-sa ng kafâ ne me,
nké kafâ esa eyên ánke kaa/man,
ne a-kú a-fâ mě dyityém.
2Osówo nké mu o-nyii ng mě.
Me n/chi n-fé dyityém ne nyǐ,
mm*ba/chi n-shî*.
Óburúkpâbí mu o-kyâ mě busa ejí ne okwan ejí.
Nyǐ nké mu o-nyii ng mě.
3Wǎ eringe nyí omu odakye onet mú omu mu o-jê ng ǎ bunyîn-dyityém,
éné to nké banet ḿbé Osówo badajêe ké nkéré o-kú o-nyii ng kámbé.
4Ben ba/chi ba-kwán ké dyicí ándyi ba/fu,
kó n̂g Óburúkpâbí asǎma.
Kó n̂g dyizîn emen ba/fu,
onyángê běn.
Chi n̂g eshê e-nyît byěm ḿbyí nyǐ oo/chi.
Sét n̂g ba/fu,
dyizîn emen ndyi kiǐtí.
5Kwán n̂ ekwan-akpee ba-kye Óburúkpâbí
ké bubwô ḿbú biǐtí-byěm ḿbyí nyǐ oo/chi.
Ejíí emúmú ejwo kyi-kim ne nkyí.
6Nang yeě mú mu ké Záyon,
okwán ne ejá kyíbóng kyíbóng ké bunyîn-dyityém o/fu,
Osówo mú Ézerel mú mu onong mu kiǐtí,
ne mu o-kyú u ké burwám-banet emen.
Currently Selected:
Azáya 12: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
