Efyíshan 5
5
Dyikpen ekyú ké Kiinwángé
1Ké eringe nyí ben bamu bwǎn-dyityém-Osówo, ba-man ba-kan ekûkyú dyikpen to wǎ nyǐ. 2Akpen enen a-man a-kyú ké bubwô ḿbú kyijé ne barî-banet wǎ eringe nyí be byi/jê Karâs ne o-kye kyitông emen ké dyishí eten wǎ eyáré nyí kyifen echi nyí edanyîn kyinung ne kyifen to ńkyí kyidanyîn Osówo dyityém.
3Ké bubwô ḿbú ben bamu banet-Osówo, kyi*da/nwa ńkyí ben badakûraa nang kaǎchwóm ne barî kyi-kim ne byibî-byěm echi* nang kyi-kim ne karíng erí ne banet byiryibyiryi* nang ne byěm eshwam*. 4Nang byiraa-babép ne enyam-byiraa ne byibî-byiraa byi*da/kwárê ḿbyí ben badaraa*. Nké kû n̂g ekó Osówo asǎma. 5Nyît n̂g ńkyín ké ntûntû ba/fu, onet mú mu o-chi i byibî-byěm, o-rí i ne banet byiryibyiryi, ne o-shwam m byěm o*fí nang obónge* mú o/chi o-já mpât ké Butu ḿbú Karâs ne Osówo ne banyá*. Ké nǎ, â wo amu a-shwam m byěm, ányi kyi/byí, amu a-kyâ byěm ofê a-shwôm Osówo oyén.
6*Da n̂g ebángê onet nang obónge o-yip enyam-byiraa o-nîm běn*. Ké nǎ, ochíchí-byěm ḿbyín nké busa-dyityém Osówo bu/chi bu-bâ bu-kâm banet ḿbé ba*fí ba-chi i ńkyí o/fu, bachi*. 7Ké bubwô ámbu, *da n̂g ekyú ne chwǒm ńkyí badachi kyi-kim ne azong-banet ányi*. 8Ké nǎ, ben to ké byiko enen ba/mû ké kyifip. Nké ké ben ba/firi banet ḿbé Otu Kyítá, ben ba/firi ké kiinwángé. Ben ba-man ba-kyú kâng ké dyikpen ńdyí banet ḿbé mbe ké kiinwángé. 9Ké ebóng, kiinwángé nké kyidacen ne kángkáng byěm enwa ne kanong echi ké bushú ḿbú Osówo ne ntûntû esét. 10Kû n̂g ekan ekwâa byěm echi ḿbyí byidanyîn Otu Kyítá dyityém. 11*Da n̂g ekûfé abwô enen ké byěm ḿbyí byi*da/byí chwǒm* ḿbyí banet ḿbé mbe ké kyifip mbe ba-chi i*. Nké fîm m̂ kámbyí ba-tî ké kiinwángé. 12Kyi-chi i ne éshwân eraa kyi-kim ne byěm ḿbyí mbé mbe ba-chi i ké kadip. 13Nké ké nkéré mú kángkáng byěm byi/firi ké kiinwángé, ányi kâng nké ochíchí-kafâ-byěm ámbyi odabyí kyíjí gbúúl. 14Ké ebóng, nang ebóng chwǒm nké kii/byí kyíjí gbúúl, chwǒm ánkyi kyi-firi ng kiinwángé. Nkyí nké ba/raa ba/fu, bûu nensang, ǎ nrê burê, a-jwóbê to ké bukyû, ne Karâs o/chi o-kû ǒ esan ké byiko.
15Ké bubwô ámbu, kû n̂g ebám akpen enen kanong kanong. *Da n̂g echi ba-kûtî akpen enen wǎ banet ḿbé ba*fí ba-nyît ng chwǒm*. Nké tî n̂g kányí wǎ banet ḿbé mbe ne byinyídíng. 16Nang ebóng mpât mú ben ba/já, mú badachi chwǒm, chi n̂g kánkyí ké bukwóp ḿbú bunong. Ké ebóng, ací ńnyín něen a-chi i byibî-ací. 17*Da n̂g echi ba-firi enyam-banet*. Nké kan n̂ ekyé kyikû ba-nyît kyi-kim ne ńkyí Otu Kyítá mu o-ryuu ng o/fu, ben bachi.
18*Da n̂g ekûjwáp bato chwóó ḿbé bada běn ebwóm* ḿbé badabên enyam-byiko enen*. Nké Busun-Osówo busú běn ké enyam-byiko. 19Kû n̂g ekwán kángkáng azong-ekwan-ékwâbashi nyí Karâs ne barî-banet. Kwán n̂ ekwan ba-kye Otu Kyítá ne akpee ké atyém enen. 20Kángkáng nkéré, kû n̂g ekó Osówo Bonchí eten asǎma ké kángkáng byěm, ké dyizîn ńdyí Jisos Karâs, Otu Kyítá eten.
Batyép ne Banyi
21Jwâa n̂g byiko enen kyísí ba-kye barî ké bubwô-ofê enen mú bamu ba-fâ Jisos Karâs.
22Banyi, jwâa n̂g byiko enen kyísí ba-kye batyép enen wǎ eringe nyí bamu ba-jwâa ng ba-kyâ Otu Kyítá. 23Ké ebóng, otyép nké mu ne busa o-shwôm onyi wǎ eringe nyí Karâs mu ne busa o-shwôm banet ḿbé mbe ba-fâ atyém ebe ne nyǐ. Ne Karâs to ké kakim emen nké mu Onet-Onyii mú banet ḿbé ba/fé atyém ebe ne nyǐ. Banet ámbe ba/bwom wǎ enyam-byiko emen. 24Nké ké bubwô ámbu, banyi ba-man ba-jwâa byiko ebe kyísí byiká ne abwô ba-kye batyép ebe wǎ eringe nyí banet ḿbé mbe ba-fâ atyém ebe ne Karâs mbe ba-jwâa ng byiko ebe kyísí ba-kyâ ǎ.
25Batyép, banyi enen bakû běn ejê wǎ eringe nyí banet-ékwâbashi nyí Karâs ba/jê ǎ, ne o-kye kyitông emen ké ashí ebe. 26Nyǐ o/chi ńkyín, eringe nyí odakúng banet ámbe o-kye Osówo, ányi oo/bwóp kpá kashú ké ejá emen, o-soo kámbé ké omu ba-cé. 27Eringe nyí odakúng kámbé o-kye byiko emen ne bunong ebe ne atyém kpárám, nang kaǎnyín-ébîn kaa*kyú* nang dyikpât dii*chi* nang enyáp ké byiko ee*chi* nang chwǒm to kyikíri ńkyí kyi*fí kanong* kii*kyú*. 28Batyép ba-man ba-kyú ne kyijé ne banyi ebe wǎ eringe nyí enyam-byiko nyí ebe nyi e-nyîn n kámbé. Otyép mú onyi emen mu o-jê ng ǎ, ányi kyi/byí, byiko ḿbyí emen nyǐ oyén nké mbyi byi-jê ng ǎ. 29Onet nang obónge o*fí mú enyam-byiko emen ee*nyîn ǎ*. Nké oyén o-nen n kányí, ne o-tún n to kányí kanong kanong wǎ eringe nyí Karâs mu o-chi i to ne banet-ékwâbashi nyí emen. 30Ké ebóng, be byi-chi i byipang-enyam-byiko ḿbyí Karâs. 31Wǎ eringe nyí ejá-Osówo nyí ba/sáng kyísí e/fu, ké bubwô ḿbún, onyinchéng o-mîng ng bonchí ne boné, o-da-cibi kyikit kyibónge ne onyi emen, ne mbé ashí afee ba-firi wǎ onet obónge. 32Kyikit-ejá-Osówo nyí ba/sáng kyísí ńkyín kyi/tông kiǐtí-ntûntû wááng, ne me mu n-nyît ng n/fu, kyi/raa kyi-kim ne Karâs ne banet-ékwâbashi nyí emen. 33Nké ńkyín kyi/ta běn to. Otyép nang orá o-man o-kyú ne kyijé ne onyi emen wǎ eringe enyam-byiko emen nyi e-nyîn n ǎ. Nké onyi to nang orá o-man o-kye otyép emen ofê.
Currently Selected:
Efyíshan 5: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
