Efyíshan 4
4
Ncibi mú Enyam-Byiko nyí Karâs Kyikit Kyibónge
1Me, ké bubwô ámbu kâng, mú mu onet-mgbokobá ké dyishí-Otu Kyítá, mu n-tîm m běn arông n/fu, kyú n̂g dyikpen ńdyí dyi/kwárê, ne eringe Osówo o/tî kándyí ké nkéré nyǐ o/kó běn. 2Tî n̂g byiko enen kyísí, ba-kyú degere ne dyityém chee kángkáng nkéré. Kû n̂g etông kyijé enen ké barî echwáp. 3Kan n̂ byiko enen, eringe nyí badatî ncibi mú Busun-Osówo mbu bu-kyâ běn ké bunyîn-dyityém ḿbú mbu bu-cibi ng běn kyikit kyibónge. 4Enyam-byiko nyí Karâs nyi ebónge ne Busun-Osówo mbu to bubónge, wǎ eringe nyí achi etî nyí Osówo o/kye běn ké nkéré mú nyǐ o/kó běn nyi abónge. 5Otu Kyítá mu obónge. Dyityém efé ne Karâs ndyi dyibónge. Osoo mú Osówo mu obónge. 6Osówo mu obónge, ne mu Bonchí mú kángkáng banet, ne Otu Kyítá to mú kángkáng byěm, ne mu o-chi i bǎmkpóngé ké atyém nyí kángkáng banet, ne mu ké atyém nyí kángkáng banet to.
7Nké Karâs oo/kye nang yeě nang yeě eyáré emen kerededet wǎ eringe nyí Karâs mu ne nyǐ chwóó. 8Wǎ eringe nyí ejá-Osówo nyí ba/sáng kyísí e/sét e/fu, ké nkéré nyǐ o/yú o-jâ kyíbóng, nyǐ o/kpî básóng chwóó ba-dim ne nyǐ. Nyǐ o/kye banet eyáré.
9Nké nyǐ o/jé kyíbóng, ányi kyi/byí nǎ. Kyi/byí kyi/fu, ké mbwôp kashú, nyǐ o/shû o-ca kyísí, ányi ké oshê-bakúsí. 10Ké bubwô ámbu, nyǐ mú o/shû o-ca kyísí nké mu nyǐ to obónge mú o/yú o-jâ kyíbóng kyíbóng o-shwôm bubóng, eringe nyí kángkáng byěm byida ǎ ekye ofê. 11Kyi/mû nyǐ nké o/kye banet eyáré. Nyǐ o/cá banet bakíri o/fu, bakyú banet-kyitwóm emen, bakíri bakyú bamkpábé ḿbé badasét byiraa-Osówo, bakíri bakyú bansêt byiraa-Osówo, bakíri bakyú bambâm ebû nyí Osówo ne bantánge byiraa-Osówo. 12Nyǐ o/chi ńkyín, eringe nyí odakpá kángkáng banet-Osówo byiko ké bǎmkpóngé ḿbé banet ḿbé ba/bángê ne Karâs, akîm ba-nap enyam-byiko nyí Karâs. 13Ne ké bubwô ámbu, be byi/chi byi-bâ kyikit kyibónge ké ncibi obónge, ké dyityém eten ńdyí byi/fé ne Karâs, ne ké onyît eten mú byimu byi-nyît ng Wǎn mú Osówo. Be byi/chi byi-firi banet ḿbé baa/kán ké dyityém ba-ribi jangjang ne Karâs oyén. 14Be bii*ba/chi byi-chîkyú kâng wǎ bwǎsíng* ḿbé kace ńké kadanáng kadayip kámbé* ne kángkáng afú nyí nyi a-fím m ké otánge mú bannîm banet* ḿbé ké boǒnyídíng ebe ḿbú mbe ba-nyît ng, ba-tín n banet bakíri ba-fé ké byibî-okabe. 15Nké, ké ntûntû echi ne dyityém ńdyí kyijé, be byi/chi byi-kán ké kángkáng akwóp byi-kâm Karâs mú mu onet-dyishí. 16Ké bubwô emen, kángkáng acit nyí enyam-byiko emen a-níbî ng enyam-byiko emúmú kyikit kyibónge. Ké bubwô ámbu, enyam-byiko emúmú e-kán n, ne e-nap ng byiko emen ké bubwô-kyijé, â kyipang-enyam-byiko nang kyirá nkyi kyi-chi i bǎmkpóngé emen kanong.
Dyikpen ńdyí Dyifyîfî ekyú ne Karâs
17Ké bubwô ḿbú Otu Kyítá kâng nké me mu n-sét ng běn ńkyín wǎ bacê n/fu, ben *da n̂g echîkyú ké dyikpen wǎ banet ḿbé ba*fí ba-fâ atyém ebe ne Karâs* ḿbé ekabe ebe ee*byí chwǒm* 18ne atyém ebe to nyi ké kyifip. Mbé ba*fí nang ne kaǎnyín-dyikpen ńdyí Osówo mu o-kyâ*. Ké ebóng, mbé ba*fí ba-nyît ng nang kaǎnyín-chwǒm kyi-kim ne ndyí* ne mbe ba-shwane e to ashí. 19Mbé ḿbé ba*fí to ne éshwân ké bushú*. Baa/kúng byiko ebe kángkáng ba-kye ké karíng erí ne banet byiryibyiryi, ba-chi i to byibî-acáá nang byiko baa*kám*.
20*Chí éné nké ben ba/mû ba/kwâa kyi-kim ne Karâs*. 21Nké ben ntûntû ba/mû ba/jwo kyi-kim ne nyǐ, ne ben, wǎ banet ḿbé bamu ba-cen n ne Karâs ké kyikû, nyǐ o/mû oo/tángê běn ntûntû mú emen. 22Nké zú n̂g atyém enen nyí kpákpá, nyí nyi a-chi i běn ba/tôong ba-kyú u wǎ eringe nyí ba/mû. Atyém ányi nyi a-chi i běn ba-chi i byibî-byěm ḿbyí byida běn ecen ne bukyû ekpú ba-câ kashú. 23Ben ba-man ba-yángê atyém enen ne okabe enen kángkáng byi-firi ḿbyí byifyîfî. 24Ba-man ba-kyú ne atyém nyí afyîfî, nyí Osówo o/kye běn ké obî mú emen. Atyém ányi a-man a-kûtông kyíjí wááng ké bukwóp ḿbú dyikpen ńdyí dyi/kwárê ekyú, ńdyí ndyi dángdáng ne kanong kanong.
25Kyisédéng kyi*dachîkyú kâng*. Nang yeě o-man o-sét orî-onet ntûntû, ké nǎ, be kángkáng byimu byipang-enyam-byiko ké enyam-byiko nyí Karâs. 26Â kafâ ka-kú ka-sa ng běn, *da n̂g ebángê kafâ esa enen ánke ka-chi běn ba-nung ké byibî* ne *da n̂g ewaa ké kafâ esa ké kyirim-dyicí kyimúmú*. 27*Da n̂g ekye Otu-Byibî-Barím mpât*. 28Onet mú mu o-jii ng o-man o-mîng kajii o-kpet bǎmkpóngé echi, eringe nyí odajá chwǒm ńkyí kyinong ńkyí dyikpen emen, ne eringe nyí nyǐ odakûman echwáp banet-kyikpu. 29*Da n̂g ebángê byibî-byiraa byi-byí běn ké ocím*. Raa n̂g byiraa ḿbyí byidachwáp, ḿbyí byidanap ne ḿbyí byidatyeem, eringe ńkyí ben badafu kyi/chi kyi-chi kanong kyi-kye banet ḿbé mbe ba-jwo ng běn. 30Ne *da n̂g echi ba-chi Busun-Osówo bu-firi ké bafip*. Ké ebóng, Busun-Osówo nké mbu ekap nyí nyi e-tông ng e/fu, ben Osówo nké o/já běn, ne mbú to nké bu/bwom wǎ chwǒm ńkyí nkyi kyi-tông ng ntûntû kyi/fu, dyicí ndyi dyi-bâ ńdyí nyǐ o/chi o-chi běn ba-fem ké byibî. 31Mîng n̂g dyityém esa ne kiikuku echi ne kafâ esa. *Da n̂g echînyán barî-banet* nang barî-banet edángé ekye*. Mîng n̂g kángkáng azong-kafâ esa. 32Nké kû n̂g ecángê dyityém ba-kyú to ne dyityém ńdyí dyinong ne barî-banet. Pwoo n̂g to barî-banet wǎ eringe nyí Osówo oo/pwoo běn ké bubwô-Karâs.
Currently Selected:
Efyíshan 4: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
