Efyíshan 3
3
Bǎmkpóngé ḿbé Pôl o/chi o-kye Banet ḿbé ba*fí Banet-Jûs*
1Ké bubwô ḿbún, me Pôl mú mu onet-mgbokobá mú Jisos Karâs, mu n-fâ nshwam n-kyâ Osówo ké bubwô ḿbú ben ḿbé ba*fí banet-Jûs*. 2Ntûntû ben baa/jwo něen ba/fu, Osówo ké kanong emen ńké nyǐ mu o-kyii ng banet, nyǐ oo/kye mě me bǎmkpóngé ḿbén o/fu, me nchi kámbé ké bubwô ḿbú enen. 3Osówo oo/tông okabe mú kafâ-dyityém emen wááng, o-chi mě me n-nyît kámú. Me nn/sáng kaǎkím kyi-kim ne chwǒm ńkyín. 4Ne â ben ba/chi ba-kó chwǒm ńkyí n/sáng éné, ben ba-man n ekwâa kyi-kim ne dyishí ńdyí me nn/jwo kyi-kim ne okabe ámu mú Karâs. 5Ké nkéré mú o/shwôm ké esim, Osówo o/mû o*da/sét banet kyi-kim ne okabe mún*. Nké Osówo oo/tông banet-kyitwóm-Jisos ne bamkpábé ḿbé badasét byiraa emen ḿbé nyǐ o/cá kámbé kámú kántîk wááng ké busa ḿbú Busun emen. 6Okabe mú kafâ-dyityém emen ámu mu něen, ké bubwô ḿbú Bǎmpém ḿbé Banong, banet ḿbé ba*fí banet-Jûs* ba/firi to ne mpât ne banet ḿbé Jûs ké ojware mú Osówo. Mbé to ba/firi byipang-enyam-byiko ḿbyí kyirim-enyam-byiko kyibónge. Ne ba/firi to ne mpât ké ocím mú Osówo o/ryí ké bubwô ḿbú Jisos Karâs.
7Eyáré nyí Osówo nyí bǎmkpóngé ḿbé busa emen nké e/chi mě n-firi ḿgbán mú Bǎmpém ḿbé Banong. 8Osówo o/kye mě eyáré ńnyín o/fu, me nsét banet ḿbé ba*fí banet-Jûs* Bǎmpém ḿbé Banong kyi-kim ne efang nyí Karâs nyí e*fí ne nkuli kyikû* nang ké me mu kyísí kyísí n-shwôm onet mú mu kyísí kyísí ké burwám-banet-Osówo. 9O/fu, me nchi to kángkáng banet ba-ri eringe Osówo o/chi o-tî okabe mú mu ké kafâ-dyityém emen wááng. Osówo mú mu Nchi kángkáng byěm o/rôo okabe emen ké nkéré omúmú mú o/shwôm ké esim. 10Eringe ké bubwô ḿbú banet-ékwâbashi nyí Karâs badachi byibî-barím ne byibî-bací ḿbyí kyíbóng byi-nyît byinyídíng-Osówo ḿbyí bii*nwa eri* ké nkéré mú kántîk. 11Osówo o/chi ńkyín ké bubwô ḿbú okabe emen mú ne banyá, mú nyǐ o/já ké bubwô ḿbú Jisos Karâs, Otu Kyítá eten. 12Ké ocibi mú byimu byi-cibi ng ne nyǐ, ne ké dyityém ńdyí byimu byi-fâ ne nyǐ, be byi/firi ne busa ḿbú byidanung ne dyityém dyibónge ké bushú ḿbú Osówo. 13Me mu n-tîm m běn arông kâng n/fu, asa a*dachi a-jwâa běn* ké bubwô ḿbú me mu n-ri ng busông ké dyishí enen*. Nkyí kángkáng nkyi ké kanong ńké enen.
Kyijé ńkyí Karâs
14Ké bubwô ḿbún kâng, me mu n-tím m arông kyísí ké bushú ḿbú Bonchí eten 15mú kángkáng byikû-byěm ḿbyí kyíbóng ne esí mbyi byi-koo ng dyizîn ebe ńdyí ntûntû. 16Me mu m-bí ng Osówo ké efang nyí busan emen ḿbú ragerage n/fu, okye běn busa ké bubwô ḿbú Busun emen, eringe nyí badashwane ké atyém enen, 17ne eringe nyí Karâs o/chi o-kyú ké atyém enen, ké bubwô ḿbú dyityém efé ne nyǐ. Me mu n-fâ nshwam n/fu, kyi/bát ben bakyú ne eriri enen ne kyikû ekpet ké kyijé, 18eringe nyí ben cibicibi ne banet-Osówo kángkáng badakyú ne busa ḿbú badanyît eringe nyí kyijé ńkyí Karâs kyi/rêe ké butang ne ké bunyâam ne ké buríbi. 19Kyi/bát ben bakûnyît kyijé emen, nang kii*nwa enyît kyimúmú ne banyá* ne ké bubwô ámbu, ba-sú kerededet ne kángkáng busû ḿbú Osówo.
20Akpee akyú ne nyǐ mú ké bubwô-busa ḿbú mbu bu-chi i bě bǎmkpóngé ké atyém odaman echi chwóó kyi-shwôm ńkyí byidaman ebí nang ńkyí byidakabe. 21Akyú to ne Osówo ké bubwô ḿbú banet-ékwâbashi ne ḿbú Jisos Karâs kángkáng nkéré ne banyá ne banyá. Kyi/bát kyikyú éné.
Currently Selected:
Efyíshan 3: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
