Ekyilyizátes 3
3
Kángkáng Byěm mbyi ne Nkéré
1Kángkáng byěm ḿbyí mbyi byi-chi i ké ejíí ńnyín mbyi byi-chi i ké nkéré mú Osówo mu o-tî ng.
2Nyǐ mu o-tî ng nkéré mú bufwon ne nkéré mú bukyû,
o-tî ng nkéré mú byěm ekwón ne nkéré mú byěm efuu,
3o-tî ng nkéré mú onet eju ne nkéré mú onet echi o-nyange,
o-tî ng nkéré mú badabú ne mú badabi,
4o-tî ng nkéré mú bafip ne nkéré mú bunyîn-dyityém,
o-tî ng nkéré mú dyikán eta ne nkéré mú ane ene,
5o-tî ng nkéré mú karíng erí ne onet ne nkéré mú baa*rí ne onet*
o-tî ng nkéré mú barî erwâm ne nkéré mú baa*rwâm barî*
6o-tî ng nkéré mú chwǒm ekyé ne nkéré mú chwǒm etánê,
o-tî ng nkéré mú chwǒm etî ne nkéré mú chwǒm etwóp,
7o-tî ng nkéré mú byěm eját ne nkéré mú byěm ebwât,
o-tî ng nkéré mú pyêp ecíbî ne nkéré mú kyiraa eraa,
8o-tî ng nkéré mú kyijé ne nkéré mú kafâ esa,
o-tî ng nkéré mú byití ne nkéré mú kyikwáré.
9Be byi-ryí i ebóng mpún ké kángkáng bǎmkpóngé eten. 10Me mu n-nyît ng kiǐróró-dyitû ńdyí Osówo oo/tô bě. 11Nyǐ oo/tî ochíchí-nkéré mú kángkáng byěm. Nyǐ oo/kye bě okabe mú byidanyît kyi-kim ne dyicí ńdyí ké kashú, nké nyǐ o*fí o-kyâ bě kyi-kwárê byi-nyît kanong kanong ńkyí nyǐ mu o-chi i*. 12Ké bubwô ámbu, me n/ri n/fu, ńkyí byidaman echi kyi*da/shwôm byikyú ké bunyîn-dyityém byi-chi ńkyí byidaman echi ké byi/tôong okpó*. 13Be kángkáng byiryí, byi-jwáp, byi-kyú ké bunyîn-dyityém ké ńkyí bii/chi bǎmkpóngé byi-já. Ányi eyáré nyí Osówo.
14Me mu n-nyît ng n/fu, nang ebóng chwǒm ńkyí Osówo mu o-chi i kyi-waa ng ne banyá. Aa*man esú chwǒm ké nkyí* a-fîm nang chwǒm ké nkyí*. Ne chwǒm kyibónge ńkyí Osówo mu o-chi i nkyi něen o/fu, byikû ǎ eshî. 15Nang ebóng ńkyí nkyi kyi-chi i, nang kyi/chi kyi-man echi, kii/chi kpákpá. Osówo mu o-chi i dyizong-chwǒm dyibónge dyi-chi i dyi-bírî ng.
Acît eryí nyí nyi ké Ejíí
16Bwa kwán, me nn/ri to n/fu, ké ejíí ńnyín, a-ri ng dyityém ebên ké kyikit ńkyí ntûntû o/mû o/chi o-kyú. 17Me n/raa ké dyityém n/fu, Osówo o/chi o-pan banet ḿbé mbe ba-chi i kanong ne ḿbé mbe ba-chi i byibî mpan eringe ebónge, ké nǎ, nyǐ [oo/tî nkéré] mú chwǒm nang kyirá nang bǎmkpóngé bará byi/chi byi-chi. 18Me n/raa ne dyityém ejí n/fu, Osówo mu o-kan n bě eringe nyí oda bě etông o/fu, be byi*da/nwa byi-shwôm enyam*. 19Ké nǎ, dyizong-chwǒm ńdyí ndyi dyi-bám m banet nké ndyi dyi-bám m to enyam. Onet o-kpú u wǎ eringe nyí enyam edakpú. Osówo nké o/chi onet ne enyam. Onet o*da/cángê o-shwôm enyam* ké nǎ, dyikpen dyi*da/byí onet nang enyam wǎ chwǒm*. 20Onet ne enyam ba-jâ kyikit kyibónge. Ba-jâ ké ecing. Onet ne enyam ba/fím ké ecing, ne onet ne enyam ba/chi ba-bwa ké nyǐ. 21Onet o-cen n nǎ ne o-bángê o/fu, [busun] ḿbú onet mbu bu-jâ kyíbóng, ḿbú enyam bu-jâ ké ecing. 22Ké bubwô ámbu, me n/ri n/fu, chwǒm ńkyí kyi/nwa kanong kanong ńkyí be byidachi kyi*da/shwôm ké bunyîn-dyityém ekyú ké [byěm ḿbyí byi/chi bǎmkpóngé byi-já*. Chwǒm kyikíri kyi*fí to ńkyí byidaman echi*.] Bukwóp bu*fí bě ḿbú byidanyît ńkyí kyi/chi kyi-chi ké nkéré bii/kpú*.
Currently Selected:
Ekyilyizátes 3: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
