Ekyilyizátes 2
2
1Me n/tî okabe n/fu, n-tî ng byiko ejí ké bunyîn-dyityém, n-kyé kyikû-bunyîn-dyityém. Nké n/ri n/fu, ńkyín to kyi*da/byí chwǒm*. 2Me n/ri n/fu, éjwô e*da/byí chwǒm* bunyîn-dyityém boo*chwáp ǒ*. 3Nang ké dyityém ejí dyi/tôong ké bubong ejá, me n/tî okabe n/fu, n-kyú u kanong, n-tî byiko ejí ké bunyîn-dyityém ké bato ejwáp. Me m/mû n/kabe n/fu, bukwóp ḿbún nké mbu bukwóp ḿbú bunong ḿbú banet badaman ekyú ké kaǎkím-dyikpen ebe ké ejíí.
4Me n/chi biǐtí-byěm. Me m/bi byise, m-kpang byifát n-fé byiko ejí. 5Me n/chi byifát ḿbyí mbyi ne byirim-byichí ké azong ké azong. 6Me n/sím abíng-omu nyí ndakûpwó omu ké mbyí. 7Me n/ré básóng chwóó, ne ba/fwon básóng to ké kyibám ejí. Me m/mû ne byitú n-shwôm nang yeě mú o/mû oo/kyú ké Jerúsélem. 8Me n/já to akpuga ké esí nyí batu ké eshê nyí me m/mû otu. Banyinchéng ne banyinyi ba/tî mě ké bunyîn-dyityém ké ekwan ekwán, ne m/mû ne kángkáng banyinyi ḿbé onyinchéng odaman eryuu.
9Ké ntûntû, me m/mû kiǐtí-onet. M/mû kiǐtí-onet n-shwôm nang yeě mú o/mû oo/kyú ké Jerúsélem, ne bubong ejí bu/waa mě kerededet. 10Nang ebóng ńkyí m/mû n-kyé ng, me n/já. Me n*da/né byiko ejí bunyîn-dyityém nang burá ekye*. Me m/mû n-tông ng byiko ké kángkáng byěm ḿbyí me n/chi bǎmkpóngé ne n-já, ne ḿbyí kángkáng byi/mû eyáré-bǎmkpóngé ejí. 11N-kabe kâng kyi-kim ne kángkáng byěm ḿbyí nn/chi ne eringe nyí nn/fé busa n-chi kámbyí, ne n-ri n/fu, kyi*da/byí chwǒm*. Kyi/mû wǎ mu n-nwa ng ne bufú ekám. Kyi*da/byí chwǒm nang onyin*. 12Ké nǎ, otu o-chi i byěm ḿbyí batu ḿbé ké esim ba/mû baa/chi.
Ké bubwô ámbu kâng, m/kpet ekabe kyi-kim ne eringe nyí kyi/byí, ńkyí onet odakyú ne bubong nang fungfung nang enyam eróng. 13Ké ntûntû, me mu n-nyît ng n/fu, bubong mbu kanong bu-shwôm enyam eróng wǎ eringe kiinwángé nkyi kanong kyi-shwôm kyifip. 14Banet ḿbé mbe ne bubong ba-nyît ng kyicê ńkyí mbe ba-wâa ng, enyam-banet baa*nyît*. Nké me mu n-nyît ng to n/fu, dyizong-chwǒm dyibónge nké ndyi dyi-bám m bě kángkáng. 15N-kabe ké dyityém ejí n/fu, n-ri ng dyizong-chwǒm dyibónge wǎ enyam-banet. Ebóng mpún kâng mú me n/ryí ké bubong ḿbú mbu mě. N-faa n/fu, mpún o*fí* nang onyin o*fí*. 16Onet o*fí mú mu o-zîim m banet-bubong* onet to o*fí mú mu o-zîim m enyam-banet*. Ba/chi ba-ráp bě kángkáng ké ací nyí nyi a-bâ ké kashú. Be kángkáng, banet-bubong ne enyam-banet byi-kpú u. 17Ké bubwô ámbu, dyikpen dyi*da mě echîbyí wǎ chwǒm* ké nǎ, kángkáng byěm ḿbyí dyikpen byi*da mě ebê ne chwǒm* kyi-cibi ne afaníkong*. Dyikpen ejí ńdyí nn/kyú dyi*da/byí chwǒm*. Bufú nké me m/mû n-kan n ekám.
18Chwǒm kyi*fí* ńkyí nn/chi bǎmkpóngé ne n-já kánkyí* ńkyí kyi/chî mě ebyí wǎ chwǒm* ké nǎ, me mu n-nyît ng n/fu, me n/chi n-dim m-mîng kánkyí, kyi-firi ńkyí onet mú o/chi o-kúng kyikit ejí. 19Ne nyǐ kakíri o/chi o-kyú ne bubong, kakíri o/chi o-kyú enyam-onet. Yeě mu o-nyît ng. Nang ké nkyi éné, kángkáng byěm ḿbyí me n/chi bǎmkpóngé ne n-já, ḿbyí bubong ejí bu/já bu-kye mě ké ejíí ńnyín byi/chi byi-firi ḿbyí emen. Mbyí kángkáng byi*da/byí chwǒm*. 20Ké bubwô ámbu, me n/raa ájângmé ké bǎmkpóngé ḿbé nn/chi n-fé busa. 21A-chi i bǎmkpóngé ne bubong eyên kángkáng ne byinyídíng eyên ne busa eyên a-já chwǒm ne a-dim a-mîng kánkyí kángkáng kyi-firi ńkyí onet mú o*da/chi bǎmkpóngé ké nkyí*. Ńkyín to kyi*da/byí chwǒm* ne kyi*da/nwa*. 22Ebóng ńkyí onet odajá ké kángkáng bǎmkpóngé ḿbé mu o-chi i o-ju ng byiko. 23Tete a-kpú, nang ebóng ńkyí amu a-chi i kii*byí chwǒm* kyi-cibi ne káryúryú ne dyishí ebwo*. Nang ne buchú, dyityém eyên dii*kyú dííng*. Ńkyín to kyi*da/byí chwǒm*.
24Chwǒm ńkyí onet odaman echi ńkyí kyi/nwa kyi-shwôm kyi*da/shwôm aryî eryí ne bato ejwáp ké bǎmkpóngé eyên* a-kyú ké bunyîn-dyityém*. Nang éné, me n/ri n/fu, nang ńkyín nkyi kyi-fím m ne Osówo. 25Bukwóp bukíri mbu nyá ḿbú adajá chwǒm ńkyí adaryí a-tî nang byiko eyên ké bunyîn-dyityém. 26Osówo mu o-kyâ banet ḿbé mbe ba-chi i ńkyí kyida ǎ enyîn bubong ne byinyídíng ne bunyîn-dyityém. Nké nyǐ mu o-chi i banchi byibî ba-chi i bǎmkpóngé, ba-gbinge e ba-chwon n esang eringe nyí Osówo o/chi o-kúng ńkyí mbé ba/já o-kye banet ḿbé mbe ba-chi i ńkyí nkyi kyi-nyîn n ǎ. Ńkyín to kyi*da/byí chwǒm*. Nkyi wǎ bufú ekám.
Currently Selected:
Ekyilyizátes 2: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
