Ekyilyizátes 11
11
Ńkyí Onet-Bubong mu o-chi i
1Fé akpuga eyên ké kasî ecen ńké tete, ne dyicí dyibónge a/chi a-ryí mpún. 2Fé akpuga eyên ké byikit chwóó chwóó, ké nǎ, aa*ba/chi a-nyît dyizong-dyishí ńdyí dyi/chi dyi-bên ǒ ké ejíí ńnyín*.
3Nang kyichí kyi-myii kyicê kyirá, kyi-rí i ké kyikit ńkyí kyi/róng. Â omu oo/jîi, o-na ng. 4Â amu a-bám m a/fu, afú amîng ne bubóng bubâa, aa*kwón chwǒm nang kyibónge* ne aa*fuu chwǒm nang kyibónge*. 5Osówo o/chi kángkáng byěm. Eringe nyí aa*nyît eringe wǎn mu o-kpet ng ekán ké dyifít ńdyí onyinyi* éné to nké aa*nyît bǎmkpóngé ḿbé Osówo*. 6Kwón byěm ké dyicófóróng ne ké dyikurúku to. Wo aa*tigi a-nyît â mbyí kángkáng byi/chi byi-kán kanong* a-nyît nang kakíri a/fu, kyicê kyi/chi kyi-chi kanong kyi-shwôm ńkyí áku*.
7Nkyi kanong ńkyí kiinwángé kyida ǒ enyîn. 8Kó Osówo asǎma ké dyije nang dyirá ńdyí a/kpen. Kûzîim a/fu, nang a-kpen nǎ! nkéré mú adakyú ké oshê-bakúsí oo/jê o-shwôm. Chwǒm nang kyibónge kyi*fí ńkyí adatî achi*.
Bacê ḿbé badakye Byisat ne Ásé
9Byisat ne ásé, jêe ng ké bubwásíng enen. Kyú n̂g ké bunyîn-dyityém ké ba/tôong bwǎsíng. Chi n̂g ńkyí bamu ba-ryuu ng ba/fu, ba-chi i. Chi n̂g ńkyí dyityém enen dyi/sét běn. Nké zîim m̂ ba/fu, Osówo o/chi o-pan běn mpan ké kángkáng byěm ḿbyí bamu ba-chi i.
10*Da n̂g ebángê chwǒm nang kyibónge kyi-kédê běn ofong* kyi-bán běn nang obân*. Ben baa*ba/chi ba-waa bwǎsíng ka-chîrí*.
Currently Selected:
Ekyilyizátes 11: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
