2 Koríntyan 6
6
1Ké bǎmkpóngé eten kâng ḿbé byimu byi-chi i ne Osówo, be byimu byi-tîm m běn arông byi/fu, ben *da n̂g echi ba-koo ochwâp mú Osówo ba-mîng kámú o-waa kyísí dyikáá*. 2Jwo n̂g ńkyí Osówo o/sét o/fu, me n/fwôo atông n-jwo běn ké ochíchí-nkéré mú ejí. Me n/chwáp běn ké dyicí ńdyí n/fu, n-nyii ng běn. Ben kâng, ǎ bacín ejí, fwôo n̂g atông ba-jwo. Nyín nkéré mú byidakoo ochwâp mú Osówo, kurún nké nkyi dyicí ńdyí Osówo oda bě enyii.
3Be byi*fí byi-ryuu ng byi/fu, onet nang obónge obîn bǎmkpóngé eten* ké bubwô ámbu, be byimu byi-kan n byi/fu, be bii*ku onet nang obónge*. 4Nké nang ebóng chwǒm ńkyí be byimu byi-chi i, byimu byi-tông ng byi/fu, be byi-chi i bǎmgbán-Osówo ké kiǐtí-ofit eryí, ké afaníkong ne ké busông eri. 5Banet baa/mín bě, ba-fé bě ké mgbokobá, ba-kye bě bunwa. Baa/kye bě ké bǎmkpóngé ḿbé ba/shwôm bě busa, ne bii/rí achi fúú, byi-waa to esong ésong. 6Ké atyém eten nyí nyi kpárám ne ké byinyídíng ne ké ofit eryí ne ké dyityém ecángê ne ké Busun-Osówo ne ké kyijé eten ńkyí ntûntû, be bii/kúng byiko eten byi-tông byi/fu, byi-chi i bǎmgbán-Osówo 7ké kyitwóm eten ńkyí ntûntû ne ké busa ḿbú Osówo. Be byimu byi-kúng ng kanong echi wǎ kyiyám-bunwa ńkyí eten, ńkyí byidakúng byi-kye bunwa, byi-bwa byi-kúng kánkyí to byi-ku byiko eten. 8Banet mbe ba-kyâ bě ofê, ba-fâ bě to éshwân, ba-kyâ bě ecábé, ba-kpee ng bě to. Ba-kúng ng bě wǎ banet-byisédéng, nké byimu byi-sét ng ntûntû. 9Ba-kúng ng bě wǎ banet ḿbé baa*nyît kámbé* nké mbé ashí kángkáng mbe ba-nyît ng bě. Ba-kúng ng bě wǎ bii/kpú, nké wǎ eringe nyí ben bamu ba-ri ng, be byimu byi-kpen n byi-câ kashú. Nang mbe ba-kyâ bě busông, ba*fí ba-ju ng bě*. 10Nang mbe ba-chi i bě byi-ri ng bafip, be kángkáng nkéré byimu ké bunyîn-dyityém. Be byimu wǎ banet-byikpu, nké be byimu byi-chi i banet chwóó ba-fang. Be byimu wǎ byi*fí ne chwǒm* nké ké ntûntû byimu ne kángkáng byěm.
11Bacín-dyityém ejí ḿbé mbe ké Kórin. Be bii/pem běn byěm wááng. Be bii/bâa atyém eten wááng. 12*Chí be nké byi/ku běn*. Nké atyém enen nké nyi a-ku ng běn. 13Me mu n-raa ng kántîk wǎ ben ba-chi i bwǎn ejí. Tông n̂g bě dyizong-dyityém dyibónge ńdyí be byimu ne ndyí ne ben. Bâa n̂g atyém enen wááng.
Ekó ekuri kyi-kim ne Byěm eleme ḿbyí Banet ḿbé mbe ba-sháng ng Bakye
14*Da n̂g ekan ba/fu, ba-chi i bǎmkpóngé kyikit kyibónge wǎ banet ḿbé mbe jangjang ne banet ḿbé ba*da/bángê ké Karâs* ké ebóng, kii*nwa echi*. Kyi-cen n nǎ ne kyinong ne kyibî ba-kûryí bucín. Kyi-cen n nǎ ne kiinwángé ne kyifip byi-kyú kyikit kyibónge. 15Kyi-cen n nǎ ne Karâs ne Otu-Byibî-Barím mú odabángê Bélya ba-bángê ne barî. Onet mú o/bángê ké Karâs mu ne ebóng ńkyí odachi ne onet mú o*da/bángê ne Karâs*. 16Kyi-cen n nǎ ne kyise-kyifen echi ńkyí Osówo kyi-tyeem ejá ne erím-bakye. Ké ebóng, be byi-chi i kyise-kyifen echi ńkyí Osówo mú mu okpó. Wǎ eringe nyí Osówo oyén oo/sét o/fu, me n/chi n-chi oshê ejí kyikit kyibónge ne banet ejí, n-kûcen ké burwám ebe. Me n/chi n-kyú Osówo ebe ne mbé ba/chi ba-kyú banet ejí.
17Ne Otu Kyítá o-raa kâng o/fu, ben ba-man ba-mîng kámbé, ba-pap byiko enen ké burwám ebe. *Da n̂g echi ba-chi chwǒm ne chwǒm-ociring* ne me n/chi n-koo běn. 18Otu Kyítá mú o/rêe o-shwôm o-raa o/fu, me n/chi n-kyú Bonchí enen, ne ben ba/chi ba-kyú bwǎn ejí.
Currently Selected:
2 Koríntyan 6: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
