2 Koríntyan 12
12
Byěm-Akat ḿbyí Otu Kyítá o/chi Pôl o-ri
1Me m-man n-tông byiko, nang ké byi*da/byí chwǒm*. Me n/chi n-raa kántîk kyi-kim ne byěm-akat ḿbyí n/ri, ḿbyí Otu Kyítá o/chi mě n-nyît. 2Me mu n-nyît ng onyinchéng obónge mú o/bángê ké Karâs, mú ké aje nyí aa/shwôm ké esim diǐkpú ne anyii ba/yip ǎ ba-jâ ne nyǐ ké bubóng ḿbú nyáám. Me n*fí n-nyît ng* â ńkyín kyi/chi ké ntûntû* nang â nang onyinchéng ámu o/ri chwǒm-akat*. Osówo kǎnchí nké mu o-nyît ng. 3N-chî ng esét kampén kafee n/fu, me mu n-nyît ng n/fu, ba/yip onyinchéng mún ba-jâ ne nyǐ ké kyikit-bunyîn-dyityém ńkyí kyíbóng. N-chî ng esét to n/fu, me n*fí n-nyît ng* â chwǒm ńkyín kyi/chi ké ntûntû* nang â kyi/mû chwǒm-akat*. Osówo kǎnchí nké mu o-nyît ng. 4Ne ké kyikit ánkyi nké onyinchéng ámu o/jwo byěm ḿbyí bii*nwa esét ké ejá* byěm ḿbyí banet baa*man ekúng ocím ebe ba-raa kyi-kim ne mbyí*. 5Ké bubwô ámbu, n/chi n-tông byiko kyi-kim ne onyinchéng ámu. Nké mm*ba/chi n-tông byiko kyi-kim ne byiko ejí* kyi*da/shwôm kyi-kim ne byěm ḿbyí mbyi byi-tông ng eringe nyí me mu kyeekyee*. 6Â m/mû n/fu, n-tông ng byiko, me m/mû nn*kyú enyam-onet*. Ké ebóng, me m/mû n/chi n-kûsét ntûntû. Nké me mm*ba/chi n-tông byiko* ké ebóng, me n*fí n-ryuu ng n/fu, onet nang obónge okabe ńkyí kyi/rêe kyi-shwôm kyi-kim ne me* kyi-bwa kyi-shwôm ńkyí nyǐ oo/ri mě n-chi* o-jwo mě n-raa*.
7Nké ké oku mú Otu Kyítá o/ku mě o/fu, me n*dachi n-tông byiko ké bubwô-biinkaa byiko-byěm ḿbyí n/ri* ba/tím mě kyiwong ńkyí bánbán ké byiko ńkyí kyi/bwom wǎ onet-kyitwóm mú Sátan mú ba/fu, otím mě, o-chi mě eringe nyí nn*tông byiko*. 8Kampén kachât ńké n/fé nshwam n-kye Otu Kyítá kyi-kim ne chwǒm ńkyín, m-bí ǎ n/fu, ofîm mě kánkyí ké byiko. 9Ejá nyí o/faa mě nyi něen, o/fu, ńkyí kyi/chi kyi-nwa ne wo, kyi*da/shwôm ochwâp ejí*. Ké ebóng, busa ejí bu-kyú u ne busa bu-shwôm ké nkéré wo a/firi kyeekyee. Me kyi-nyîn n mě kâng ńkyí ndatông byiko kyi-kim ne bukyeekyee ejí, eringe nyí ndanyît busa ḿbú Karâs. 10Me nkyi kyi-nyîn n mě ne bukyeekyee ne edángé ne afaníkong ne busông eri ne kángkáng azong-busông eri ké bubwô ḿbú Karâs. Ké ebóng, ké nkéré me n/firi kyeekyee, n-firi ng kâng ne busa.
Pôl o/ryú kyi-kim ne Banet ḿbé Kórin
11Me mu n-chî ng eraa wǎ enyam-onet, nké ben nké baa/chi mě n-chi éné. Ben nké ba/mû ba/chi ba-kûraa kanong kyi-kim ne me. Ké ebóng, â nang n*fí onet* bukwóp bu*fí nang bubónge* ḿbú me ndakyú kaǎdángé-onet nang kaǎnyín* ké burwám-bachíchí-banet-kyitwóm-Jisos ḿbé enen ámbe*. 12Byěm ḿbyí me n/chi, ḿbyí byi/tông byi/fu, me n-chi i onet-kyitwóm-Jisos, m/mû n/chi kámbyí ne kángkáng ofit eryí ké burwám enen. N/tông ekap, n-chi biinkaa byiko-byěm ne biǐtí-akat. 13Chwǒm ńkyí me n/chi běn, ńkyí kyi/bên kyi-shwôm ńkyí n/chi banet-ékwâbashi nyí Karâs ḿbé áku nkyi nyá. Nkyi, ké nǎ, me n*da běn ebí n/fu, bachwáp mě dí*. Kamgbe, pwoo n̂g mě ké n*da běn echi wǎ eringe nyí n/chi banet ḿbé áku*.
14Kyi/firi kampén kachât ńké mm/kpá byiko n/fu, m-bâ ng běn eri, ne mm*ba/chi m-bí běn n/fu, kye n̂g mě chwǒm nang kyibónge*. Me mu n-ryuu ng běn ben bayén, *chí akpuga enen*. Â ba/kabe kanong, *chí bwǎn nké badakye banchí ne bané byěm* nké banchí ne bané nké badakye bwǎn ebe byěm. 15Me n-kyú u ne bunyîn-dyityém ḿbú ndakye nang ebóng ńkyí mu ne nkyí, cibicibi ne byiko ejí, eringe nyí nda běn echwáp. Ben ba-kyú u ne kaǎnyín-kyijé ne me, ké nǎ, ben bamu ba-jê ng mě chwóó dí.
16Ben ba-man n ebángê kâng ba/fu, me n*da běn ekye afaníkong*. Nké onet okíri o-man n efu o/fu, me m/mû n-chi i byinyídíng, ne n/nîm běn ké byisédéng. 17Me n/nîm běn ké bubwô-onet-kyitwóm ejí nang obónge mú n/twóm dí. 18Me n/tîm Tátus arông n/fu, oca, ne n-twóm orî-onet eten ámu mú o/bángê ké Karâs n/fu, oca ne nyǐ ké kyikû. Ben ba-man n esét ba/fu, Tátus o/nîm běn dí. Me ne nyǐ byi*fí byi-chi i byěm ne okabe obónge, byi-chi i édúú ebónge dí*.
19Katô bamu ba-kabe ng ba/fu, ké kángkáng ńkyí byimu byi-sét ng něen, byimu byi-pâ ng byiko ké bushú enen. Aa*wááng*. Be byimu byi-sét ng eringe nyí Karâs o/fu, be byisét ké bushú ḿbú Osówo, ne ké kángkáng byěm ḿbyí byimu byi-chi i, ǎ bacín-dyityém eten, byimu byi-ryuu ng byi/fu, byi-chwáp ng běn. 20Me nkyi mě ne bushî n/fu, ké nkéré mú n/chi n-ribi áku, me mm*ba/chi n-ri běn wǎ eringe nyí me mu n-ryuu ng n/fu, ben bakyú* ne ben to baa*ba/chi ba-ri mě wǎ eringe nyí ben bamu ba-ryuu ng ba/fu, me nkyú*. Nkyi mě ne bushî n/fu, n/chi n-ri ashwôn ne orêm ne kafâ esa ne kanim enim ne edángé ne banet eram ne byiko etông ne byěm byiryibyiryi. 21Mu n-shî ng n/fu, ké ntáng okíri mú n/chi m-bâ, Osówo ejí o/chi o-bwa ne me kyísí ké bushú enen, ne n/chi n-tii bukyû ké dyishí ńdyí banet ḿbé ba/chi byibî ké nkéré mú o/shwôm ké esim, ne byiko byi*da/kpú ne kámbé ba-mîng byibî-byěm ḿbyí baa/chi* kyi-kim ne banet erí ne babép ebép*.
Currently Selected:
2 Koríntyan 12: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
