2 Koríntyan 11
11
Pôl ne Banet-Kyitwóm-Jisos ḿbé ba*fí ké Kafâ*
1Kyi-nwa ng ńkyí ben badaryí ofit ne me, nang ké nkéré mm/bwa n-firi wǎ enyam-onet. N/tîm běn arông, chi n̂g éné. 2Orêm mu mě ne ben, wǎ eringe nyí Osówo mu ne mǔ ne ben. Ké ebóng, ben bamu wǎ wǎn-onyinyi mú o*da/nyît ne onyinchéng* mú me nn/ryí ocím n/fu, n-kúng ng ǎ n-kye onyinchéng obónge kǎnchí ké dyibé, ányi Karâs. 3Me mu n-shî ng n/fu, banet ba/chi ba-bên atyém enen ne ba/chi ba-mîng ofê enen mú mu ké bukwóp ḿbú bunong, ne mú mu kpárám, mú bamu ba-fâ Karâs, ké bukwóp bubónge ḿbú efyi e/yip boǒnyídíng e-nîm Êef. 4Ké ebóng, nkyi kyi-nyîn n běn ejwo nang yeě nang yeě mú mu o-bâ o-kâm m běn, o-sét ng běn kyi-kim ne Jisos okíri, *chí Jisos mú be byi/sét běn*. Ne ben bamu ba-koo ng busun ne bǎmpém ḿbé ba/yángê kanong kanong ne Busun-Osówo ne Bǎmpém ḿbé Banong ḿbé ben ba/koo ne be.
5Me n*da/kabe n/fu, me mu kaǎdángé-onet nang kaǎnyín ké burwám-bachíchí-banet-kyitwóm-Jisos ḿbé enen ámbe*. 6Katô me n-chi i wǎsíng ké kyiraa eraa, nké ké ntûntû, *chí ké byinyídíng*. Be bii/sét běn ńkyín wááng kángkáng nkéré ne ké kángkáng akwóp.
7Me n*da běn esét n/fu, kye n̂g mě nang chwǒm* ké nkéré n/sét běn Bǎmpém ḿbé Banong*. Me m/bwa ne byiko ejí kyísí, eringe nyí nda běn echi ba-firi biǐtí-banet. Ńkyí n/chi éné, n/chi kyibî dí. 8Ké nkéré m/mû n-chi i bǎmkpóngé ké burwám enen, byise-ékwâbashi nyí Karâs byikíri nké byi/mû byi-kyâ mě akpuga. Nkyi wǎ me mu n-jii ng kámbé byěm, eringe nyí nda běn echwáp. 9Ne ké nkéré m/mû ne ben, n*da běn ebí n/fu, chwáp n̂g mě ké nkéré akpuga a/mû a/kaa mě* ké ebóng, barî-banet eten ḿbé ba/fím Masedónya ba-bâ, ba/bê mě ne kángkáng byěm ḿbyí m/mû n-ryuu ng. Eringe nyí kyi/mû ké nkéré mú oo/shwôm ké esim, éné nké kyi/chi kyi-kyú to ké nkéré mú ké kashú. Me mm*ba/chi n-kye běn afaníkong nang abónge*. 10Ké ntûntû mú Karâs mú mu mě ké dyityém, me mu n-ryí i běn ocím n/fu, me mm*ba/chi m-mîng byiko ejí ḿbyín etông ké kyikit nang kyirá nang kyirá* ké kángkáng esí nyí Girîs*. 11Ebóng me mu n-raa ng ńkyín. Ké ebóng, ben ba*fí ba-jê ng mě*? Osówo mu o-nyît ng o/fu, ben bamu ba-jê ng mě.
12Me n-câ kashú ne ńkyí mu n-chi i kántîk, eringe nyí n/chi n-chi banet-kyitwóm-Karâs ḿbé áku baa*ba/chi ba-já bukwóp nang bubónge* ḿbú badakûtông byiko* ba-sét ng ba/fu, mbé mbe ba-chi i bǎmkpóngé ké bukwóp bubónge ḿbú be byimu byi-chi i*. 13Banyinchéng ámbe ba*fí banet-kyitwóm-Jisos Karâs ḿbé ntûntû*. Ba-chi i banet-kyitwóm ḿbé ba*fí ké kafâ* ḿbé mbe ba-sét ng byisédéng kyi-kim ne bǎmkpóngé ebe, ba-yángê e byiko ebe ba-kûrángê wǎ bachíchí-banet-kyitwóm-Karâs. 14Ńkyí ánkyi kyi*fí chwǒm-akat*. Nang Sátan o-man n eyángê byiko emen o-firi wǎ orím mú onong mú kiinwángé. 15Ké bubwô ámbu kâng, kyi*fí kiǐtí-chwǒm* â bǎmgbán-Sátan ba/yángê byiko ebe ba-firi wǎ bǎmgbán ḿbé kanong echi*. Ké nkuli kyikû, mbé ba/chi ba-koo ńkyí kyi/kwárê ne mbé kerededet ké byěm ebe ḿbyí mbe ba-chi i.
Busông ḿbú Pôl o/ri wǎ Onet-Kyitwóm-Jisos
16N-chî ng esét n/fu, onet nang obónge o*dachi o-kabe o/fu, me mu enyam*. Nké â bamu ba-kabe ng éné, kúng n̂g mě wǎ enyam-onet ba-mîng mě n-tông byiko ejí kaǎnyín. 17Nké ńkyí me mu n-raa ng kántîk, *chí ńkyí Otu Kyítá oda mě ebángê o/fu, me nraa*. Ké chwǒm ńkyín ńkyí byiko etông, me mu n-raa ng ké ntûntû wǎ enyam-onet. 18Nké, ké nǎ, banet mbe chwóó ḿbé mbe ba-tông ng byiko kyi-kim ne eringe nyí mbé mbe ké ejíí, me to n-chi i to wǎ mbé. 19Ben bayén bamu ne byinyídíng kanong kanong, ne ké bubwô ámbu, bamu ba-man n ekyú ne enyam-banet. 20Ben bamu ba-man n ekyú ne nang yeě nang yeě mú mu o-sét ng běn ńkyí badachi ké busa, nang mú mu o-chi i běn ba-róng ké byiraa, nang mu o-nîm m běn o-koo ng byěm, nang mu o-tún n běn fúú, nang mu o-díp ng běn akwâ ké bushú. 21Nkyi kyi-chi i mě éshwân ńkyí ndabángê n/fu, nkyi ntûntû. Be byi/mû byi-jang ng eshî mú byi*da/chi dyizong-chwǒm ándyi*.
Nké â onet nang obónge mu ne busa ḿbú odatông byiko ké chwǒm, me mu n-raa ng wǎ enyam-onet, me mu to ne busa ḿbú ndatông byiko wǎ onet ámu. 22Mbé ba-chi i banet-Hyíburus dí. Me to n-chi i. Mbé ba-chi i banet-Ézerel dí. Me to n-chi i. Mbé ba/fím ké kyikû ńkyí Ébarahâm dí. Me to n/fím. 23Mbé ba-chi i bǎmgbán ḿbé Karâs dí. N/firi wǎ onet-kyifún, nké me n-chi i ḿgbán mú onong mú Karâs n-shwôm kámbé. Me nn/chi bǎmkpóngé kanong kanong n-shwôm kámbé. Me nn/ce mgbokobá n-shwôm kámbé. Banet baa/mín mě ba-shwôm kámbé. Me nn/cen n-fárâng bukyû n-shwôm kámbé. 24Kampén katánge ńké banet-Jûs ba/mín mě buchí bujam esim onyiryiká ne bunyii. 25Kampén kachât ńké banet-Rûm ba/mín mě, ne ba/tím mě aká kabónge. Ńsukyíkang oo/sémê ne me kampén kachât, ké nkéré obónge, n/rí kyirim-dyicí ké kafâ-kace. 26Ké bucen ejí ḿbú n/cen chwóó, me nn/kyú ké afaníkong nyí bukyû ké buce ḿbú mbu bu-sú u ne ké abwô nyí banet-bujii. N/ri afaníkong ké abwô nyí banet-Jûs ḿbé banet-oshê ejí ne ké nyí banet ḿbé ba*fí banet-Jûs*. N/ri afaníkong ké eshê, n-ri ké byikim-akán, n-ri ké baya ḿbé baryên, n-ri to ké abwô nyí bacín ḿbé boǒnínǐm. 27N/chi bǎmkpóngé n-ri busông. Kampén chwóó n*da/rê burê*. Esong ee/nwa mě, omu o-jê mě. Kampén chwóó n/kpen ké boǒnyín-byiryíng, kyise ńkyí ndanung kyi*fí*. Kyídí ńkyí ndabwá kyi*fí*. 28Nang n*da/chîbún byěm byikíri* kángkáng dyicí me mu ké káryúryú ńké mu n-kabe ng kyi-kim ne kángkáng ékwâbashi nyí Karâs. 29Â onet mu kyeekyee, me to n-firi kyeekyee. Â ba/chi onet o-róng ké kyibî, me n-firi ng ké bafip.
30Â n/fu, n-tông ng byiko, n-tông ng byiko kyi-kim ne byěm ḿbyí mbyi byi-tông ng eringe nyí me mu kyeekyee. 31Osówo mú mu Osówo ne Bonchí mú Jisos, Otu Kyítá mu o-nyît ng o/fu, me n*fí n-sét ng kyisédéng*. Akpee akyú ne dyizîn emen ne banyá. 32Ké nkéré mú m/mû ké Damásákus, otu-dyishí mú esí nyí e/mû ké bubwô Otu Aryítas o/tî banet-mbâm ké afyi nyí ekpe nyí e/wáp oshê ámu e-fé ké kafâ o/fu, bakám mě. 33Nké ba/fé mě ké kaakye ba-shû ne me kyísí ké mbwo mú ba/rim ké ekpe, ne n-chêe ké abwô emen.
Currently Selected:
2 Koríntyan 11: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
