2 Koríntyan 13
13
Nkuli Kyikû-Ekó ekuri ne Kyiraa eta
1Ne ńkén kyi/firi kampén kachât ńké mu m-bâ běn ebari. Nang ebóng kyibî ńkyí ba/fu, onet o/chi, ba-man ba-kyú ne bantûesé bafee nang bachât, wǎ eringe nyí ejá-Osówo nyí ba/sáng kyísí e/sét. 2Me mu n-ryuu ng n/fu, n-sét ng běn banet ḿbé baa/chi byibî ké nkéré mú o/shwôm ké esim, ne kángkáng banet bakíri ḿbé ba/chi kyibî. Me m/mû nn/sét běn kánkyí ké nnyinyěng-dyibê ńdyí m/ba běn eri, nké n-chî ng běn esét kánkyí kántîk mú n*fí to ne ben*. Â n/chîbê ntáng mún, onet o*fí mú o/chi o-fem busông*. 3Ben ba/chi ba-ri kángkáng byěm ḿbyí byi/chi byi-tông, ḿbyí ben bamu ba-ryuu ng ba/fu, ba-nyît ng ba/fu, Karâs mu o-raa ng ké ocím mú ejí. Ké nkéré nyǐ o-kú o-raa ng ne ben, nyǐ o*fí kyeekyee* nké mu o-tông ng busa emen ké burwám enen. 4Ké ebóng, nang ké kyi/mû ké bubwô ḿbú bukyeekyee nké ba/mán ǎ ké kyikwap ńkyí badashwân onet, nkyi ké busa ḿbú Osówo nké nyǐ mu o-kpen n. Ké ocibi ne nyǐ, be to byimu kyeekyee, nké ké eringe nyí byimu ne ben, be byi/chi byi-kyú ne nyǐ ké busa ḿbú Osówo.
5Kye n̂g byiko enen okan ba-pan byiko enen mpan, eringe nyí badanyît, â bamu ba-kyú u ké dyityém efé ne Karâs. Â ben ba*da/róng okan ámu* ba-man ba-nyît ba/fu, Jisos Karâs mu běn ké dyityém. 6Me mu ne okabe n/fu, ben bamu ba-nyît ng ba/fu, be byi*fí banet ḿbé chwǒm kyidakpógê kámbé*. 7Be byimu byi-fâ nshwam byi-kyâ Osówo byi/fu, ba*dachi ba-chi kyibî* *chí ké bukwóp ḿbú byidatông byi/fu, be bii/shwôm okan ámu* nké eringe nyí ben ba/chi ba-chi ńkyí nkyi kanong, â nang be byi/bwa byi-kyú banet ḿbé mbe wǎ baa/róng okan ámu. 8Ké ebóng, be bii*man echi chwǒm nang kyibónge byi-bât ntûntû* nké byi-chi i byi-kyâ ntûntû. 9Be byi-kyú u ké bunyîn-dyityém ké nkéré mú be byi/firi kyeekyee, nké ben bamu shwaneshwane. Ne ké bubwô ámbu, byimu byi-fâ to nshwam byi/fu, ben bafiri kanong kerededet. 10Nkyí nké me mu n-sáng ng ńkyín ké nkéré mú n*fí to ne ben*. Nkyi to eringe nyí ké nkéré mm/bê, mm*ba/chi n-raa ne ben ké bukwóp ḿbú kyibî* n-kúng busa ḿbú Otu Kyítá o/kye mě* busa ḿbú nda běn echi ba-kán, *chí ḿbú nda běn echi ba-bwa kyísí*.
11Kyú n̂g kanong, ǎ bwǎn-bané ejí. Kû n̂g ekyé eringe nyí ben badakyú kanong. Jwo n̂g arông nyí mu n-tîm m běn. Ku n̂g ebángê ne barî, ba-kyú ké bunyîn-dyityém. Ne Osówo mú odakye kyijé ne bunyîn-dyityém o/chi o-kyú ne ben.
12Ta n̂g barî kyiraa ne dyirwâm ńdyí kyijé.
Kángkáng banet ḿbé Osówo ba/fu, me nta běn kyiraa.
13Ochwâp mú Jisos Karâs, Otu Kyítá ne kyijé ńkyí Osówo ne bucín ḿbú Busun-Osówo byikyú ne ben ashí amúmú.
Currently Selected:
2 Koríntyan 13: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
