2 Koríntyan 10
10
Pôl o/sét kyi-kim ne Bǎmkpóngé Emen
1Me Pôl nké mu n-tîm m běn arông me oyén. Me mú ba/fu, me n-kyú u ne dyityém degere ké nkéré ndakyú ne ben, nké nn*shî achi enen* ké nkéré n*fí to ne ben*. Me mu n-tîm m běn arông ké bubwô ḿbú budegere ne dyityém ecángê ńdyí Karâs n/fu, 2*da n̂g mě etírîng ba/fu, n*dachi n-shî achi enen* ké nkéré mm/bê*. Ké ebóng, me mu n-nyît ng n/fu, me mm*man eshî achi nyí banet ḿbé mbe ba-raa ng ba/fu, be byimu byi-chi i byěm ne okabe mú banet ḿbé ké ejíí ńnyín*. 3Ńkyí byimu byi-kyú u ké ejíí nkyi ntûntû, nké be byi*fí byi-nwa ng bunwa ké okabe mú banet ḿbé ké ejíí ńnyín*. 4Byěm-bunwa ḿbyí byimu byi-yip ng byi-nwa ng bunwa byi*fí ḿbyí ejíí ńnyín* nké mbyi byěm-bunwa ḿbyí Osówo, ḿbyí byidashwane, ḿbyí byidayip byi-bên nang ebóng byikit ḿbyí byidashwane. Be byimu byi-bên n okân ké dyishí mú o*fí ké kafâ*. 5Be byimu byi-bú ng nang ebóng kiintông byiko-chwǒm ńkyí banet mbe ba-bi ng ba/fu, kyikyú byinyídíng ḿbyí Osówo. Be byimu byi-kám m kángkáng okabe wǎ onet mú bada ǎ ekám ké byití, byi-chi kámú o-chi ńkyí Karâs o/sét. 6Ne ké nkéré ben baa/tông wááng ba/fu, ben ba-fâ Karâs kerededet, be byi/chi byi-kpá byiko ḿbyí byidakye nang yeě nang yeě busông mú o/fu, nyǐ oo*kye ǎ ofê*.
7Ben bamu ba-tún n byěm wǎ eringe nyí mbyi ké esim nyí kyíjí. Onet mu kô ányi mú o/bángê o/fu, Karâs nké o/já ǎ nyǐ dí. Onet ámu ochîkabe kyi-kim ne byiko emen, ké ebóng, be Karâs nké o/já bě, wǎ eringe nyí o/já ǎ to. 8Ké ebóng, me éshwân e*fí e-chi i mě* â nang mm/bwa n-jang etông byiko n-shwôm kyi-kim ne busa ḿbú Otu Kyítá oo/kye bě*. Busa ḿbú o/fu, be byichi běn ba-kán, o*da/fu, byibwa ne ben kyísí*. 9Me n*fí n-ryuu ng n/fu, kyichi běn wǎ me mu n-kan n n/fu, n-fâ běn bushî ké baléta ejí*. 10Onet okíri o-man n efu o/fu, baléta ḿbé Pôl mbe ba-jang ng eshwane ne ejá nyí kánkán, nké ké nkéré mú onet ámu odakyú ne be, byi-ri ǎ ké achi, nyǐ mu kyeekyee ne byiraa emen byi*fí ké chwǒm*. 11Dyizong-onet ándyi dyi-man dyi-nyît dyi/fu, byěm ḿbyí be byidasáng ké baléta eten ké nkéré be byi*fí ne ben* ne ḿbyí byi/chi byi-chi ké nkéré mú bii/bê byi-kâm běn byi*da/yángê ne barî*.
12Nké bii*ba/chi byi-kan byi/fu, byi-tông ng byi/fu, onet mún o/shwôm orî* byi-bwa byi-kan nang byiko eten ne banet ḿbé mbe ba-jang ng eyip byiko ebe kyíbóng*. Banet ámbe mbe enyam kanong kanong. Mbé mbe ba-kúng ng akwóp nyí ebe nyí mbé mbe ba-kúng ng ba-kan n byiko ebe, ba-pan to byiko ebe bampan ké akwóp nyí ebe. 13Kyi-kim ne be kâng, be bii*ba/chi byi-tông byiko byi-shwôm kyikit ńkyí byidatông byi-ribi*. Byi-man byi-nyere ké bǎmkpóngé ḿbé Osówo oo/kye bě, ḿbé ba/kpaa bǎmkpóngé ḿbé byimu byi-chi i ké burwám enen ba-fé ké kafâ. 14Ne ké bubwô ḿbú ben bamu ké bunyerenyere ámbu, be byi*da/shwôm kámbú* ké nkéré mú byi/bê byi-kâm běn ne Bǎmpém ḿbé Banong kyi-kim ne Karâs*. 15Ké bubwô ámbu kâng, be bii*tông byiko kyi-kim ne bǎmkpóngé ḿbé banet bakíri baa/chi ba-shwôm bunyerenyere ḿbú Osówo o/tî bě*. Nké byimu byi-tî ng achi byi/fu, dyityém eten ńdyí byi/fé ne Karâs dyikán, byi-tî ng to achi byi/fu, kyi/bát byiman echi bǎmkpóngé ḿbé badajê ba-shwôm ké burwám enen, byi-ribi kángkáng nkéré ké bunyerenyere ḿbú Osówo o/tî bě. 16Â byi/chi ńkyín, byi-man n esét kâng banet Bǎmpém ḿbé Banong ké eshê ekíri nyí nyi běn ké kashú. Ne bii*ba/chi byi-tông byiko kyi-kim ne bǎmkpóngé ḿbé baa/chi ké kyifát ńkyí onet okíri*.
17Nké wǎ eringe nyí ejá-Osówo nyí ba/sáng kyísí e/sét e/fu, nang yeě nké mu o-ryuu ng o/fu, nyǐ o-tông ng byiko, o-man o-tông kámbyí kyi-kim ne ńkyí Otu Kyítá oo/chi. 18Ké ebóng, Osówo o-koo ng onet ké ntûntû, ké nkéré Otu Kyítá oo/kpee ǎ, *chí ké nkéré onet ámu oo/kabe kanong kyi-kim ne byiko emen*.
Currently Selected:
2 Koríntyan 10: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
