1 Koríntyan 16
16
Eyáré nyí ba/fu, ba/chi ba-kye Barî-Banet ḿbé ba/bángê ké Karâs
1Kántîk, kyi-kim ne akpuga nyí ben ba/fu, ba/chi ba-típ ba-chwáp banet-Osówo ḿbé mbe ké Judyâ. Ben ba-man ba-chi ńkyí n/sét banet-ékwâbashi nyí Karâs ḿbé mbe ké Galísha n/fu, bachi. 2Kángkáng ací-ékwâbashi, nang yeě ké burwám enen o-man o-fîm kyicê-akpuga o-tî ké bukô. Okyii kányí a-tyeem kerededet ne ocím-akpuga mú oo/já ké kyipyán ánkyi, o-kúng kányí o-tî cát, eringe nyí kii*ba/chi kyi-chîchi ńkyí ben badatíp akpuga ké nkéré mm/bê*. 3Ké nkéré mú mm/bê, n/chi n-twóm banet ḿbé ben badafîm, ne baléta ḿbé badasét kyi-kim ne banet ámbe, ba-kúng eyáré enen ba-ca ne nyǐ Jerúsélem. 4Â nkyi ńkyí me ndace, banet ámbe ba/chi ba-cen ne me.
Okabe mú Pôl
5Me n/chi m-bâ m-ba-ri běn ké nkéré nn/ce Masedónya, ké nǎ, n/chi n-cen ḿbú ámbu. 6Katô n/chi n-kyú ké kyikim-nkéré ne ben, katô kyirim-burwom bumúmú, ne ben ba-kû mě echwáp kâng n-ca kashú ne bucen, nang nyá nké n/fu, n-câ, â n/dim ké oshê enen. 7Ké ebóng, me n*fí n-ryuu ng n/fu, n-ta ng běn kyiraa n-shwôm oshwǒm*. Mu n-kabe ng n/fu, n-kyú u ne ben ké kyikim-nkéré chwóó, â Otu Kyítá o/bángê.
8Nké n/chi n-kyú nyín ké Éfyísus tete dyicí-dyijî-kyifen ńkyí Péntyíkos kyi-fyi. 9Byikit-biǐtí-bǎmkpóngé ḿbé banong byi/jê ké oshê mún, nang ké banet chwóó ba*fí ba-bángê e ba/fu, me nkyú*.
10Â Tyímótyi o/cen o-ribi oshê enen kâng, chi n̂g ǎ o-kyú ké bunyîn-dyityém ne ben, ké ebóng, nyǐ mu o-chi i bǎmkpóngé o-kyâ Otu Kyítá, wǎ eringe nyí me mu n-chi i. 11Onet nang obónge o*dachi o-dángê ǎ* nké ba-man ba-chwáp ǎ o-ca kashú ne bucen emen ké bunyîn-dyityém, eringe nyí o/chi o-bwa esim o-kâm mě. Ké ebóng, me mu m-bám m ǎ n/fu, ofyi ne barî-banet eten ḿbé ba/bángê ké Karâs.
12Kántîk, kyi-kim ne wǎn-boné eten mú odabángê Apólos. Me nn/fé ǎ busa kángkáng nkéré n/fu, oba-ri běn ne banet bakíri ḿbé ba/bángê ké Karâs, nké okabe o*da ǎ etî ne kanong kanong o/fu, nyǐ o-bâ kántîk*. Â o/ri mpât kâng, o/chi o-bâ.
Bankuli Kyikû-Byiraa
13Kû n̂g ebám byiko enen, bwom m̂ kíngkíng ké dyityém enen ńdyí ba/fé ne Jisos. Kyú n̂g ne busa ne dyityém ńdyí onyinchéng. 14Chi n̂g kángkáng bǎmkpóngé enen ne kyijé.
15Ben bamu ba-nyît ng kyi-kim ne Setefánas ne kyikû-banet emen. Mbé nké mbe bambwôp kashú-banet ḿbé ba/bángê ké Karâs ké oshê mú badakó Girîs. Ne baa/kúng byiko ebe ba-kye ké bǎmkpóngé ḿbé banet-Osówo. Me mu n-tîm m běn arông, ǎ bwǎn-bané ejí, 16n/fu, kye n̂g banet-ashí wǎ ḿbén ofê ne nang yeě okíri mú mu o-chi i bǎmkpóngé o-fâ Osówo ne mbé.
17Me nkyi kyi-nyîn n mě ké obê mú Setefánas ne Fotunátus ne Akékus ba/bê. Mbé baa/chi byěm ḿbyí ben ba/mû ba/chi ba-chi. 18Baa/chi mě n-firi ké bunyîn-dyityém, wǎ eringe nyí ba/chi běn. Azong-banet wǎ mbé a/kwárê nyí badakye kámbé ofê.
19Byise-ékwâbashi nyí Karâs ḿbyí mbyi ké Ésha ba/ta běn kyiraa. Akwéla ne Peresyíla ne banet-ékwâbashi nyí Karâs ḿbé mbe ba-cibi ng ké kyise ebe ba/ta běn kyiraa ne kyijé ńkyí banet ḿbé ba/bángê ké Karâs. 20Kángkáng barî-banet ḿbé ba/bángê ké Karâs ḿbé mbe ké oshê mún ba/ta běn kyiraa. Ta n̂g barî kyiraa ne dyirwâm ńdyí kyijé.
21Me n/yip bubwô ejí me oyén n-sáng ńkyín n/fu, me Pôl n/ta běn kyiraa.
22Nang yeě nké Otu Kyítá o*fí o-jê ng ǎ* onet ámu mu ké kyishû ńkyí Osówo oo/pap ǎ.
Otu Kyítá obâ.
23Ochwâp mú Jisos, Otu Kyítá okyú ne ben.
24Kyijé ejí kyikyú ne ben kángkáng ké bubwô ḿbú Jisos, Otu Kyítá.
Currently Selected:
1 Koríntyan 16: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
