1 Koríntyan 15
15
Ojwóbe mú Karâs ké Bukyû
1Me mu n-ryuu ng n/fu, n-zîim m běn kántîk, ǎ bwǎn-bané ejí, kyi-kim ne Bǎmpém ḿbé Banong ḿbé m/mû n-sét běn. Ḿbé ben ba/koo kámbé, ḿbé obánge enen o/jêem esim ké mbé shwaneshwane. 2Ányi Bǎmpém ḿbé Banong ḿbé mbe kyitwóm ńkyí me n/sét běn. Bǎmpém ḿbé Banong ámbe ba-chi i běn ba-fem ké byibî, â ben ba/bwom ké mbé kíngkíng. Nké â kyi*fí éné* éné ben ba/mû ba*da/bángê ké mbé ne atyém enen*.
3Me nn/sét běn ńkyí ba/mû ba/sét mě, ńkyí kyi/rêe kyi-shwôm. Ba/fu, Karâs o/kpú ké bubwô ḿbú byibî eten, wǎ eringe nyí nkyi ké ejá-Osówo nyí ba/sáng kyísí. 4Ba/fu, ba-ryii ǎ, ké ací achât, Osówo o-jwóbê ǎ ké bukyû, wǎ eringe nyí nkyi ké ejá-Osówo nyí ba/sáng kyísí. 5Ba/fu, nyǐ o/byí o-kâm Pyíta, ne o-kûbyí o-kâm banet-kyitwóm emen ashí amúmú diǐkpú ne afee. 6Ne o-byí kâng o-kâm bajam-égot-banet ḿbé ba/shwôm égot efee ne kyicê ké nkéré obónge, ḿbé ba/mû ba-cen n ne nyǐ ké kyikû. Bujê-banet ámbe chwóó ba/tôong bakpó, nang ké bakíri baa/kpú. 7Ne o-byí o-kâm Jêmsyi, ne o-kûbyí o-kâm banet-kyitwóm emen ashí amúmú.
8Ké nkuli kyikû, o-byí o-kâm mě to, nang ké me mu něen wǎ wǎn mú o*da/fyi ké dyicí emen ne ba-fwon ǎ*. 9Ké ebóng, me n*da/byí onet* ké burwám-banet-kyitwóm-Karâs ashí kángkáng. Me n*da/kwárê nang okwáre mú bada mě ekó onet-kyitwóm-Karâs* ké ebóng, me nké m/mû n-kyâ banet-ncibi mú Osówo busông. 10Nké ké ochwâp mú Osówo, me mu dyizong-onet ńdyí me mu. Ne ochwâp emen ámu o*da/waa kyísí dyikáá*. Bwa kwán, me mm/bwa n-chi bǎmkpóngé n-shwôm banet-kyitwóm-Karâs ḿbé áku kángkáng. Nang ké kyi/mû kyi*fí ké busa ḿbú ejí me oyén ké ntûntû* nké ochwâp mú Osówo ámu nké mu o-chi i bǎmkpóngé ámbe ké enyam-byiko ejí. 11Nké nang kyitwóm ńkyín kyi/fím ne me, nang kyi/fím ne mbé, nkyí nké be ashí kángkáng byimu byi-sét ng, nkyí to nké ben ba/bángê ké nkyí.
Ojwóbe mú Eten ké Bukyû
12Kántîk, wǎ eringe nyí byimu byi-sét ng Bǎmpém ḿbé Banong ḿbén byi/fu, Osówo o/jwóbê Karâs ké bukyû, kyi/cen nǎ kâng ne ben banet bakíri bamu ba-raa ng ba/fu, Osówo oo*ba/chi o-jwóbê banet bakíri ḿbé baa/kpú*. 13Â ńkyí ben bamu ba-raa ng éné nkyi ntûntû, ányi kyi/byí, Osówo o*da/jwóbê Karâs ké bukyû*. 14Â Osówo o*da/jwóbê Karâs ké bukyû* ányi kyi/byí něen kâng kyi/fu, be byi*fí ne chwǒm ńkyí byida běn esét*. Nang ben to ba*fí ne chwǒm ńkyí badabángê*. 15*Chí nang ńkyí ánkyi nkyí nkyi* kyi/tông to kyi/fu, be byimu byi-sét ng kyisédéng byi-bât ng Osówo, ké ebóng, be byi/sét byi/fu, nyǐ o/jwóbê Karâs ké bukyû. Nké â nkyi ntûntû ńkyí Osówo oo*jwóbê banet ḿbé baa/kpú ba-bwa ké dyikpen* ányi kyi/byí, Osówo o*da/jwóbê Karâs ké bukyû*. 16Ké ebóng, â Osówo oo*jwóbê banet ḿbé baa/kpú* éné nang Karâs o*da ǎ ejwóbê*. 17Ne â Osówo o*da/jwóbê Karâs ké bukyû* ányi kyi/byí, ben to ba/fé atyém enen ké Karâs dyikáá, ne ba/tôong ba-tánê e ba-câ ké byibî enen. 18Ne kyi-man n ekyú to něen kyi/fu, banet ḿbé ba/mû ba/fé atyém ebe ké Karâs, ḿbé baa/kpú baa/tánê ne banyá. 19Â okabe eten mú byi/tî ne Karâs o/kwárê ké dyikpen ńdyín nké nke, kyi-man éné, ányi kyi/tông kyi/fu, be byi/kwárê mú bada bě eri bafip chwóó ba-shwôm ḿbé kángkáng banet ḿbé ké ejíí.
20Nké ńkyí nkyi ntûntû nkyi něen, Osówo oo/jwóbê Karâs ké bukyû, eringe nyí kyidatông kyi/fu, nang yeě nké o/kpú, Osówo o/chi o-jwóbê ǎ to. 21Ké ebóng, wǎ eringe nyí bukyû bu/bê ké bubwô ḿbú onet obónge, eringe ányi to ebónge nké ojwóbe ké bukyû mu o-bâ ké bubwô ḿbú onet obónge. 22Ké ebóng, wǎ eringe nyí kángkáng banet mbe ba-kpú u ké bubwô ḿbú ocibi ebe ne Ádam, ké eringe ányi to ebónge, Osówo o/chi o-jwóbê kángkáng banet ba-bwa ké dyikpen, ké bubwô ḿbú ocibi ebe ne Karâs. 23Nké o-jwóbê ng nang yeě nang yeě ké nkéré mú emen. Ké mbwôp kashú, o-jwóbê ng Karâs, ne banet kâng ḿbé mbe ḿbé Karâs ba-nye, ké nkéré mú Karâs o/chi o-bâ. 24Ne nkéré mú nkuli kyikû kâng o/chi o-fyi, Karâs o/chi o-kpógê kángkáng byibî-barím ne byibî-bací ne busa ḿbú bakye, o-bwa ne Butu ḿbú Osówo Bonchí eten o-kye ǎ. 25Ké ebóng, Karâs o-man o-kyú Otu tete Osówo o-kpógê kángkáng banet-bushwôn emen o-ren ǎ kámbé ké byiká. 26Nryî esim-onet-bushwôn mú Osówo o/chi o-kpógê, ányi bukyû. 27Ké ebóng, ejá-Osówo nyí ba/sáng kyísí e/sét e/fu, Osówo o/kúng kángkáng byěm o-tî ǎ o-cím byiká. Nkyi wááng kâng kyi/fu, ejá nyí ba/fu, kángkáng byěm, e*da/kpaa Osówo oyén e-cibi* mú mu o-tî ng Karâs kángkáng byěm ké byiká*. 28Nké ké nkéré Osówo oo/kúng kángkáng byěm byi-firi ké busa ḿbú Karâs, Karâs oyén kâng mú mu Wǎn-Osówo o/chi o-kúng byiko o-kye Osówo mú o/kúng kángkáng byěm byi-firi ké bubwô emen, ne Osówo o/chi o-kyú Otu mú kángkáng byěm.
29Banet mbe kô ḿbé ba/koo osoo mú Osówo ké bubwô-banet ḿbé baa/kpú. Ebóng ńkyí mbé ba/chi éné. Â nkyi ntûntû, wǎ eringe nyí mbe ba-sét ng ba/fu, Osówo oo*jwóbê banet ḿbé baa/kpú ba-bwa ké dyikpen* ebóng mbé mbe ba-koo ng osoo mú Osówo ké bubwô-banet ḿbé baa/kpú. 30Ebóng be kâng byimu byi-nung ng ké bukwóp-bukyû kángkáng nkéré. 31Bwǎn-bané ejí, me mu n-nung ng ké bukwóp-bukyû kángkáng dyicí. Byiko ḿbyí me mu n-tông ng ké dyishí enen, ké dyikpen eten, ké ocibi ne Jisos Karâs, Otu Kyítá eten nké mbyi byi-chi i mě n-raa ńkyín. 32Â kyi/mû wǎ eringe nyí banet badaraa wǎ dyitím-ekan ba/fu, me nn/nwa ne byibî-enyam ké oshê mú badakó Éfyísus. Ké ejá-banet, ebóng mpún mú me n/ryí. Nké â Osówo o*fí o-jwóbê ng banet ḿbé baa/kpú ba-bwa ké dyikpen kâng* mîng n̂g byi-ryí byiryíng, byi-jwáp bato, ké ebóng, be byi/chi byi-kpú nencí, wǎ eringe nyí dyitím-ekan ándyi dyi/byí.
33*Da n̂g echi ba-mîng onet o-nîm běn*. Bucen ne banet ḿbé baa*nwa* bu-cen n ne édúú nyí enong ebên. 34Kabe n̂g ne bubong enen kanong kanong, ba-mîng byibî-akwóp enen. Me mu n-raa ng ńkyín ké éshwân enen. Banet bakíri ké burwám enen ba*fí ba-fâ Osówo*.
Ojwóbe mú Enyam-Byiko ké Bukyû
35Nké onet okíri o-man n ebí o/fu, Osówo o-cen n nǎ ne o-jwóbê banet ḿbé baa/kpú ba-bwa ké dyikpen. Banet ámbe ba-kyú u ne ebóng enyam-byiko. 36Dyizong-ḿbím ándyi dyi*da/byí chwǒm*. Â onet o/kwón osang-kyichí kyísí, osang-kyichí ámu o-kpú u kpá, ne o-byí mpyî. 37Ne ńkyí bamu ba-kwón n kyísí kyi-chi i osang-kyichí nké nke, katô osang-nkurung nang osang-kyichí okíri. *Chí kyirim-kyichí kyimúmú ńkyí kyi/chi kyi-kán nké ba/kwón*. 38Osówo mu o-kyâ osang-kyichí ámu enyam-byiko nyí e/nyîn ǎ. O-kyâ osang-kyichí nang orá nang orá dyizong-enyam-byiko nyí e/kwárê ne mǔ.
39Ne enyam-byiko nyí kángkáng byěm ḿbyí mbyi byikpó e*fí eringe ebónge*. Banet mbe ne dyizong-enyam-byiko dyibónge. Enyam nyi ne dyizong dyikíri, bunurung ne dyikíri, ne ekworê to ne dyizong dyikíri.
40Byěm ḿbyí kyíbóng mbyi kô, ḿbyí kyísí to mbyi kô. Byěm ḿbyí kyíbóng mbyi ne bunong ḿbú ebe, ḿbyí kyísí ne ḿbú ebe. 41Óbyísû mu ne bunong ḿbú emen, otukáku ne dyizong-bunong dyikíri, ne ékpére to ne bunong bukíri. Nang a/bwa a-kúng ékpére nké nke, bunong ebe bu*fí eringe ebónge*.
42Éné nké kyi/chi kyi-kyú ké nkéré Osówo o/chi o-jwóbê banet ḿbé baa/kpú ba-bwa ké dyikpen. Â ba/ryii enyam-byiko kyísí, enyam-byiko ányi e-fwoo ng. Ké nkéré Osówo o/chi o-jwóbê kányí ké bukyû, ee*fwoo to*. 43Ké nkéré mú baa/ryii kányí, ee*kyú ne busa* ee*nwa*. Ké nkéré mú Osówo o/chi o-jwóbê kányí, e-firi ng shwaneshwane, e-kûnwa. 44Ké nkéré mú baa/ryii kányí, e-kyú u kyirim-enyam-byiko. Ké nkéré Osówo o/chi o-jwóbê kányí, e-kyú u ne enyam-byiko nyí busun. Kyirim-enyam-byiko kyiyén kâng nkyi kô, ké bubwô ámbu, enyam-byiko nyí busun e-man e-kyú. 45Ké ebóng, ejá-Osówo nyí ba/sáng kyísí e/sét e/fu, mbwôp kashú-onet mú odabángê Ádam, Osówo o/chi ǎ ne enyam-byiko o-kye ǎ dyikpen. Nké nryî esim-Ádam o/firi Busun ḿbú mbu bu-kyâ dyikpen. 46*Chí enyam-byiko nyí busun nké nyi e-bâ kpá* nké kyirim-enyam-byiko kyiyén nké nkyi kyi-bâ kpá, ne nyí busun e-bâ. 47Osówo o/yip ecing ne o-chi mbwôp kashú-Ádam. Nnyinyěng-Ádam o/fím kyíbóng ne o-bâ. 48Banet ḿbé esí e/já kámbé mbe wǎ onet mú Osówo o/chi ké ecing. Banet ḿbé bubóng bu/já kámbé mbe wǎ onet mú o/fím kyíbóng ne o-bâ. 49Wǎ eringe nyí be byi/bí onet mú Osówo o/chi ǎ ké ecing, eringe ányi to ebónge nké byi/chi byi-bí onet mú o/fím kyíbóng.
50Ńkyí mu n-raa ng nkyi něen, ǎ bwǎn-bané ejí. Ńkyí nkyi ne baróng ne enyam-byiko kii*kyú ne kyikit ké Butu ḿbú Osówo*. Ne chwǒm ńkyí kyidakpú kii*man ekyú ne busa ḿbú kii*kpú to*.
51Fwôo n̂g atông ba-jwo chwǒm ńkyín ńkyí nkyi ké dyityém-Osówo. Be ashí amúmú bii*ba/chi byi-kpú*. Nké kyi-chi i ochǐng kabónge éné, Osówo o-yángê bě enyam-byiko ashí amúmú ochéé óchee, 52wǎ eringe onet odamyâp achi, ké nkéré mú ntán mú nkuli kyikû oo/jwá. Ké ebóng, ké nkéré ntán ámu oo/jwá, Osówo o/chi o-jwóbê banet ḿbé baa/kpú ba-bwa ké dyikpen ńdyí baa*kpú to*. Ne Osówo o/chi o-yángê bě be ashí amúmú. 53Ké ebóng, chwǒm ńkyí kyidakpú kyi-man kyi-cít byiko emen ne chwǒm ńkyí kii*kpú*. Chwǒm ńkyí kyi/chi kyi-kpú kyi-man kyi-cít byiko emen ne chwǒm ńkyí kii*man kyi-kpú*. 54Ké bubwô ámbu kâng, ké nkéré Osówo oo/yip chwǒm ńkyí kii*kpú* o-cít ńkyí kyidakpú, o-yip ńkyí kii*man kyi-kpú* o-cít ńkyí kyi/chi kyi-kpú, ejá-Osówo nyí ba/sáng kyísí e/chi e-kyú ntûntû, nyí e/fu, baa/ju Bukyû. Okpóge mú ba/kpógê kámbú oo/man kángkáng. 55Dyikpóge ńdyí wo adakpógê ndyi nyá, ǎ Bukyû. Busa eyên ḿbú adanémê banet mbu nyá, ǎ Bukyû. 56Bukyû mbu bu-koo ng busa emen ḿbú budanémê banet ne kyibî, ne kyibî kyi-koo ng busa ḿbú emen ne Byije-Músis. 57Nké asǎma akyú ne Osówo mú mu o-chi i bě byi-kpógê ké bubwô-Jisos Karâs, Otu Kyítá eten.
58Ké bubwô ámbu kâng, ǎ bwǎn-bané ejí, bwom m̂ kíngkíng, *da n̂g enáng atyém enen*. Chi n̂g bǎmkpóngé enen kángkáng nkéré ba-kye Otu Kyítá, ké nǎ, ben bamu ba-nyît ng ba/fu, chwǒm kyi*fí ńkyí ben badachi ba-kye Otu Kyítá* ńkyí kyida běn ewaa kyísí dyikáá*.
Currently Selected:
1 Koríntyan 15: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
