2 Koríntyan 1
1
1Me Pôl mú mu onet-kyitwóm-Jisos Karâs ké okabe mú Osówo, ne Tyímótyi mú wǎn-boné eten nké byimu byi-sáng ng léta mún byi-kye banet-ncibi mú Osówo ḿbé mbe ké Kórin ne kángkáng banet-Osówo ḿbé mbe ba-kyú u ké Girîs.
2Kyi/bát Osówo Bonchí eten ne Jisos Karâs, Otu Kyítá bakye běn ochwâp ne bunyîn-dyityém.
Pôl o/kó Osówo Asǎma
3Mîng n̂g byi-kó Osówo mú mu Osówo ne Bonchí mú Jisos Karâs, Otu Kyítá eten asǎma. Bonchí mú mu o-ri ng bě kiǐtí-bafip, ne Osówo mú kángkáng ochwâp mu o-fím m ne nyǐ. 4Nyǐ mu o-chwáp ng bě ké kángkáng afaníkong eten, eringe nyí be byi/chi byi-man echwáp banet ḿbé mbe ne kángkáng azong-afaníkong ké bukwóp-ochwâp bubónge ḿbú be bayén bii/koo ne Osówo. 5Eringe nyí be byimu byi-ri ng dyizong-busông ḿbú Karâs o/ri chwóó, ké eringe ányi to ebónge, ké bubwô-Karâs, be byimu byi-koo ng kiǐtí-ochwâp emen. 6Â be byimu byi-ri ng busông, nkyi ké bubwô ḿbú ochwâp enen ne onyii enen. Â Osówo mu o-chwáp ng bě, ányi kyi/byí kâng, Osówo mu o-chwáp ng běn to, o-kyâ běn busa, eringe nyí ben badacíp dyityém ba-ryí ofit ké dyizong-afaníkong eri ńdyí be byimu byi-ri ng. 7Ké bubwô ámbu, be byi*fí ne atyém afee* ké okabe mú byi/tî ne ben*. Be byimu byi-nyît ng byi/fu, wǎ eringe nyí ben bamu ba-ri ng dyizong-afaníkong nyí be byimu byi-ri ng, ben to bamu ba-koo ng ochwâp mú be byimu byi-koo ng.
8Ké ebóng, be byimu byi-ryuu ng byi/fu, byi-zîim m běn, ǎ bwǎn-bané, kyi-kim ne afaníkong nyí byi/ri ké Ésha. Afaníkong nyí ba/tû bě ké dyishí a/mû a/jang erêe, ne a/mû nyi a-jang ng eró ké bukwóp ḿbú be byi/mû byi*da/kabe byi/fu, byi-chî ng ekpen*. 9Be byi/mû byi/kabe byi/fu, baa/két mpan mú bada bě eju. Nké ńkyín kyi/chi, eringe nyí be byidafé dyityém, *chí ne byiko eten* nké ne Osówo kǎnchí mú mu o-jwóbê ng banet ḿbé baa/kpú. 10Nyǐ o/nyii bě ké azong-biǐtí-afaníkong ányi nyí bukyû, ne o/chi o-nyii bě. Ne be bii/tî atyém eten ne nyǐ byi/fu, o/chi o-chî bě enyii, 11â ben bamu ba-chwáp ng bě ké banshwam enen ḿbé bamu ba-fâ ba-kyâ ǎ ké bubwô eten. Kyi/chi kyi-kyú kâng kyi/fu, Osówo o/chi o-jwo bujê-banshwam ḿbé bamu ba-fâ ké bubwô eten, ne o/chi o-jware bě, ne banet chwóó ba/chi ba-bêem ejá ebe kyíbóng ba-kó ǎ asǎma ké bubwô eten.
Pôl o/yángê Okabe Emen
12Ńkyín nké be byimu byi-tông ng byiko ké nkyí. Dyityém eten ndyi dyi-sét ng bě dyi/fu, akpen eten ké ejíí ńnyín, ne aciringaciring eringe nyí be byimu ne ben, busa ḿbú byěm esét wááng ne ntûntû, ne busa ḿbú ochwâp mú Osówo nké bii/níbî kányí, *chí byinyídíng ḿbyí banet*. 13Ké ebóng, be byimu byi-sáng ng běn ńkyí ben badaman ekó ba-jwo kyikû nké nke. Ne mu n-kabe ng n/fu, ben ba/chi ba-jwo kángkáng kyikû 14kyi-kim ne ńkyí ben bamu ba-jwo ng kyikû kántîk kaǎnyín, eringe nyí ké Dyicí ńdyí Jisos, Otu Kyítá eten, ben ba/chi ba-man n etông byiko kyi-kim ne be, wǎ eringe nyí be byi/chi byi-tông kyi-kim ne ben.
15Me m/mû n/tî dyityém ké ńkyín kanong kanong, ńkyí kyi/chi mě n-tî okabe ké mbwôp kashú n/fu, m-bâ ng běn eri, eringe nyí Osówo oda běn echîjware. 16Ké ebóng, me m/mû n/tî okabe n/fu, n-ri ng běn, â n-kú n-shwôm m n-wâa Masedónya, ne ké nkéré n-kú m-bwa ng esim, eringe nyí ben bada mě echwáp ké bucen ejí ḿbú n/chi n-ca Judyâ. 17Ké okabe mú n/tî něen, me mu wǎ onet mú odasét chwǒm o-yángê dí. Ké nkéré mú n-kú n-kabe ng byěm ḿbyí n/chi n-chi, me mu ne kyibî-okabe dí, mú ndafu, âa, m-bwa m-bírî n-fu, aa*wááng* ké abe ányi abónge? 18Eringe nyí Osówo mu ntûntû, ocím ejí mú me m/mû n/ryí běn o/mû o*fí mú kaǎnínǐm*. 19Ké ebóng, Jisos Karâs mú Wǎn-Osówo, mú Sálas ne Tyímótyi ne me oyén byi/sét běn kyi-kim ne nyǐ o*fí mú kaǎnínǐm*. Nké nyǐ nké mu ntûntû mú Osówo. 20Ké ebóng, nyǐ nké oo/tông o/fu, kángkáng byěm ḿbyí Osówo o/ryí ocím byi/chi byi-kyú ntûntû. Ńkyín nké nkyi dyishí-chwǒm ńdyí ké bubwô ḿbú Jisos Karâs be byimu byi-fu ng, kyi/bát kyikyú éné, ké akpee nyí Osówo. 21Osówo oyén nké mu o-chi i bě ne ben byi-kyú shwaneshwane ké dyikpen eten, ké ocibi ne Karâs. Osówo oyén nké oo/cá bě o-tî. 22Osówo mú o/tî bě ekap emen nyí be byi/já ǎ, ne mú o/fé Busun emen ké atyém eten ḿbú bu/bwom wǎ mbwôp kashú-eyáré nyí kángkáng byěm ḿbyí nyǐ o/tî bě.
23Me n/kó Osówo wǎ ntûesé ejí. Nyǐ mu o-nyît ng dyityém ejí. Kyi/mû ké bubwô ḿbú n/fu, m-pwoo ng běn nké n/kabe n/fu, nn*ce to Kórin*. 24Be byi*fí byi-kan n byi/fu, byi-sét ng běn ké busa ńkyí ben badabángê*. Ké ebóng, ben ba/bwom shwaneshwane ké dyityém enen ńdyí ba/fé ne Karâs. Nké byimu byi-kpóngê e burwám ne ben, eringe nyí ben badakyú ké bunyîn-dyityém.
Currently Selected:
2 Koríntyan 1: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
