1 Koríntyan 14
14
Pôl o/chîraa kyi-kim ne Eyáré nyí nyi e-fím m ne Busun-Osówo
1Kyijé kâng nké ben badaman ba-kûkyé. Tî n̂g atyém enen ké eyáré nyí Busun-Osówo mbu bu-kyâ, aciringaciring eyáré nyí badakûman esét banet kyitwóm ńkyí Osówo wǎ mkpábé. 2Onet mú mu o-raa ng ké ejá nyí banet ba*fí ba-jwo ng kyikû* o*fí o-pem m ne banet* nké mu o-pem m ne Osówo, ké ebóng, onet o*fí nang obónge mú mu o-nyît ng dyishí-chwǒm ńkyí nyǐ mu o-raa ng*. Onet ámu mu o-raa ng ntûntû mú mu Osówo ké dyityém, ké busa ḿbú Busun-Osówo. 3Nké onet mú mu o-pem m kyi-kim ne kyitwóm ńkyí Osówo wǎ mkpábé mu o-pem m ne banet, ne o-kyâ kámbé ochwâp, o-fé kámbé busa ne dyityém. 4Onet mú mu o-raa ng ké ejá-eshê ekíri mu o-chwáp ng byiko emen nké nke, nké onet mú mu o-sét ng banet kyitwóm ńkyí Osówo wǎ mkpábé mu o-chwáp ng kángkáng banet-ékwâbashi nyí Karâs.
5Kyi-nwa ng ńkyí ben ashí amúmú badakûraa ké ejá nyí banet ba*fí ba-jwo ng kyikû* nké kyi-nyîn n mě kyi-shwôm ńkyí ben ashí amúmú badakyú ne eyáré nyí badakûsét kyitwóm-Osówo wǎ mkpábé. Ké ebóng, onet mú mu o-sét ng banet kyitwóm-Osówo wǎ mkpábé mu kiǐtí o-shwôm onet mú mu o-raa ng ké ejá nyí banet ba*fí ba-jwo ng kyikû* éné onet mu ányi ké abe mú odaman esét kyikû ńkyí onet ámu mu o-raa ng, eringe nyí kyi/chi kyi-chwáp banet-ékwâbashi nyí Karâs. 6Ké nkéré mm/bê n-kâm běn kâng, ǎ bwǎn-bané ejí, me n-cen n nǎ ne n-chwáp běn, â mu n-raa ng ké ejá nyí banet ba*fí ba-jwo ng kyikû*. Mm*man běn echwáp nang kaǎnyín* tete n-sét běn byěm ḿbyí Osówo o/sét mě ké burê nang byinyídíng nang kyitwóm ńkyí Osówo o/sét mě wǎ mkpábé nang chwǒm ńkyí nda běn etángê.
7Nang byitógé-ane ḿbyí byi*fí ne dyikpen* wǎ kantán ne dyícîng, onet o-cen n nǎ ne o-nyît bune ḿbú mbu bu-byí i ké mbyí tete onet o-ta bachíchí-byikit ebe ḿbyí byidakye ejá nyí edanyîn. 8Ne â nang onet mú mu o-jwá ng ntán-byití o*da/jwá wááng o-kó banet kanong kanong* yeě odakpá byiko ḿbyí byití. 9Ké bukwóp ámbu bubónge, onet o-cen n nǎ ne o-jwo ńkyí ben bamu ba-raa ng, â kyiraa enen ńkyí bamu ba-sét ng ké ejá nyí banet ba*fí ba-jwo ng kyikû* kyi*fí kyi-byí i wááng*. Byiraa enen byi/chi byi-waa ké bufú. 10Ejá-eshê nyí banet mbe ba-raa ng ké ejíí e/jê chwóó, nké ejá e*fí nang ebónge* nyí e*fí ne kyikû*. 11Nké â me n*fí n-jwo ng ejá-oshê nyí mbe ba-raa ng ne me* onet mú mu o-raa ng oshê ámu o-kyú u mě ocinónet, me to n-kyú u ǎ ocinónet. 12Ké bubwô ḿbú ben bamu ba-ryuu ng ba/fu, ben ba-koo ng eyáré nyí Busun-Osówo ba-shwôm chwǒm nang kyirá nang kyirá, ben ba-man ba-bwa ba-kúng eyáré nyí eda běn ekûchwáp ba-chi i byěm ḿbyí byidachi ékwâbashi nyí Karâs e-shwane.
13Onet mú mu o-raa ng ké ejá nyí banet ba*fí ba-jwo ng kyikû* o-man o-fé nshwam kâng o/fu, Busun-Osówo bukye ǎ busa ḿbú nyǐ odaman esét banet ba-jwo kyikû ńkyí nyǐ mu o-raa ng. 14Ké ebóng, â me mu n-fâ nshwam ké bukwóp ḿbún, ányi byibî-ocím ejí nké mbyi byi-fâ nshwam ntûntû, dyityém ejí dyi*fí dyi-fâ*. 15Me n-chi i nǎ kâng. Me n/chi n-fé nshwam ne byibî-ocím ejí, nké n/chi n-fé to nshwam ne dyityém ejí. Me n/chi n-kwán ekwan ne byibî-ocím ejí, nké n/chi n-kwán to ne dyityém ejí. 16Â ben ba/kó Osówo asǎma ké kafâ enen nké nke, onet mú mu o-kwâa ng o/fu, nyǐ o-kyú u ké ncibi-ékwâbashi obónge ne wo o-cen n nǎ ne o-raa o/fu, kyi/bát kyikyú éné, ké nshwam eyên mú amu a-fâ a-kó ng Osówo asǎma. O*fí ne bukwóp ḿbú odanyît ńkyí wo amu a-raa ng*. 17Â nang nshwam eyên mú amu a-kó ng Osówo asǎma o/nwa kanong kanong, nshwam ámu oo*ba/chi o-chwáp onet mú áku nang kaǎnyín*.
18Me mu n-kó ng Osówo asǎma ké bubwô ḿbú me mu n-raa ng ké ejá nyí banet ba*fí ba-jwo ng kyikû* n-shwôm nang yeě nang yeě ké burwám enen. 19Nké ké Osówo efé ké ócâm-ékwâbashi, me kyi-nyîn n mě ńkyí ndaraa byiraa byitánge ḿbyí banet badajwo dyishí emen, eringe nyí ndatángê banet bakíri, kyi-shwôm ńkyí ndaraa égot-byiraa nyí ee*nwa epan* ké ejá nyí banet ba*fí ba-jwo ng kyikû*.
20*Da n̂g echi ba-kûkabe okabe mú boǒbwásíng* ǎ bwǎn-bané ejí*. Kyú n̂g bwǎsíng kyi-kim ne byibî, nké bírî n̂g bakínkán ké okabe enen. 21Ba/sáng ké ejá-Osówo nyí ba/sáng kyísí ba/fu, Otu Kyítá o/fu, n/chi n-kúng ejá-eshê ekíri ne n-raa ne banet ejí ḿbén. Me n/chi n-raa ne mbé ké byibî-ocím ḿbyí bacinbánet. Nké nang n-chi éné, baa*ba/chi ba-fwôo atông ba-jwo mě*.
22Ké bubwô ámbu kâng, eyáré nyí onet odaman eraa ké ejá nyí banet ba*fí ba-jwo ng kyikû* nyi e-tông ng banet ḿbé ba*da/bángê ne atyém ebe ké Karâs* e*fí e-tông ng banet ḿbé ba/bángê*. Bwa a-bwa kwán kâng, eyáré nyí onet odaman esét banet kyitwóm ńkyí Osówo wǎ mkpábé nyi e-tông ng banet ḿbé ba/bángê ké Karâs ne atyém ebe, e*fí e-tông ng ḿbé ba*da/bángê*.
23Â kángkáng banet-ékwâbashi nyí Karâs ba/kyú kyikit kyibónge kâng, ne nang yeě nang yeě o-kpet eraa ké ejá nyí banet baa*jwo kyikû* â banet ḿbé mbe ba-kwâa ng eringe nyí badanung ké ncibi ámu, nang ḿbé ba*da/bángê ké Karâs* ba/banung ba-kâm běn, baa*ba/chi ba-fu, ben ashí kángkáng ba-kú ba-fún n dí*. 24Nké â mbé ashí kángkáng mbe ba-sét ng kyitwóm ńkyí Osówo wǎ mkpábé ké nkéré onet mú mu o-kwâa ng eringe nyí odanung ké ncibi ámu, nang mú o*da/bángê ké Karâs* o/banung ké kafâ, byiraa ḿbyí o/chi o-jwo byi/chi byi-chi ǎ o-nyît o/fu, nyǐ mu o-chi i byibî. Osówo o/chi o-pan ǎ mpan ké kángkáng byiraa ḿbyí mu o-jwo ng. 25O/chi o-fîm okabe emen mú mu ké kafâ-dyityém emen o-tî kyíjí, ne o/chi o-tíngê kyísí o-fé Osówo, o-sét wááng o/fu, ké ntûntû, Osówo mu nyín ne ben.
Eringe nyí badakûchi Byěm ké Bunye ké Bunye, ké Ncibi mú Ékwâbashi nyí Karâs
26Ńkyí me mu n-raa ng něen kyi/byí nǎ, ǎ bwǎn-bané ejí. Â ben ba/cibi ba/fu, ba-fâ Osówo, onet obónge mu ne okwan, okíri ne chwǒm ńkyí odatángê, okíri ne chwǒm ńkyí Osówo o/sét ǎ ké burê, okíri ne kyitwóm-Osówo ńkyí odasét ké ejá nyí banet baa*jwo kyikû* ne okíri mú odakúng kyikû ńkyí onet ámu odaraa o-sét. Kángkáng byěm byi-man byi-kyú ké ochwâp mú banet-ékwâbashi nyí Karâs. 27Â onet obónge mu o-bâ ebaraa ké ejá nyí banet ba*fí ba-jwo ng kyikû* banet ba*dachi ba-shwôm bachât ḿbé badaraa*. Baraa ké onet ké onet, ne onet okíri o-man o-kyú mú odasét kyikû ńkyí mbe ba-raa ng. 28Nké â onet o*fí ányi mú odaman esét kyikû* onet mú mu o-raa ng ké ejá nyí banet ba*fí ba-jwo ng kyikû* o-man o-cíbî pyêp ké ncibi ámu, o-kûraa ké dyityém emen o-sét ng Osówo nké nke. 29Banet bafee nang bachât ḿbé Osówo o/kye kámbé kyitwóm wǎ mkpábé baraa, ḿbé áku ba-kûkabe kyi-kim ne ńkyí mbe ba-raa ng. 30Nké â onet obónge mú o/kyú ké ncibi mú Osówo mu ne chwǒm ńkyí Osówo o/sét ǎ ké burê, onet mú o/mû mu o-raa ng ocíbî pyêp. 31Ben ashí amúmú ba-man esét kyitwóm-Osówo wǎ mkpábé ké onet ké onet, eringe nyí ashí kángkáng badaman ekwâa, ba-fé byiko enen busa. 32Eyáré nyí onet odasét banet kyitwóm ńkyí Osówo wǎ mkpábé ekyú ne onet mú mu o-sét ng. 33Ké ebóng, Osówo o*da bě ekó o/fu, byikûchi kyicoge ne barî* nké o/fu, be byikyú ké bunyîn-dyityém.
Wǎ eringe nyí nkyi ké kángkáng bancibi ḿbé banet ḿbé Osówo, 34banyinyi bakyú pyêp ké bancibi ḿbé ékwâbashi nyí Karâs. Mbé ba*fí ne busa ḿbú badafaa ojá*. Wǎ eringe nyí kyije ńkyí banet-Jûs kyi/sét kyi/fu, mbé baa*man ba-kyú banet-ashí*. 35Â mbe ba-ryuu ng ba/fu, mbé ba-bí ng kyi-kim ne chwǒm, babí batyép ebe ké kyise. Nkyi chwǒm-éshwân ńkyí onyinyi odafaa ojá ké kafâ-ncibi mú ékwâbashi nyí Karâs.
36Ben ba-man n esét ba/fu, byiraa ḿbyí Osówo byi/fím ne ben dí. Aa ba-man n esét ba/fu, ben nké nke nké byi/fím ne ben? 37Â nang onet obónge mu o-kabe ng o/fu, nyǐ o-chi i mkpábé mú odasét byiraa-Osówo, nang mu o-kabe ng o/fu, nyǐ mu ne eyáré nyí Busun-Osówo, onet ámu o-man o-nyît o/fu, ńkyí me mu n-sáng ng n-kye běn, ányi kyije ńkyí Otu Kyítá. 38Nké â onet ámu o*fí o-fwôo ng atông o-jwo ńkyí mu n-sét ng něen* ben to *da n̂g echi ba-jwo ǎ*.
39Ké bubwô ḿbún kâng, ǎ bwǎn-bané ejí, tî n̂g atyém enen ké kyitwóm-Osówo esét wǎ mkpábé, nké *da n̂g echi ba-kûciring banet ḿbé mbe ba-raa ng ké ejá nyí banet baa*jwo kyikû*. 40Ba-man ba-chi kángkáng byěm ké bukwóp ḿbú bunong, ké bunye ké bunye.
Currently Selected:
1 Koríntyan 14: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
