1 Koríntyan 13
13
Kyijé kyi/rêe kyi-shwôm Kángkáng Byěm
1Â me m-man n eraa ejá-eshê-banet nang nyí barím ḿbé banong, nké me n*fí ne kyijé* ejá ejí e*da/yángê ne kyirû ńkyí badagbúrûng* ne nang kyiringe-égbáng nyí mbe ba-murung ng*. 2Me m-man n ekyú ne eyáré nyí ndaman esét banet byěm ḿbyí n/koo ne Osówo wǎ mkpábé, me m-man n ekyú ne kángkáng byinyídíng, n-nyît kyikû ńkyí kángkáng byěm ḿbyí mbyi ké kadip, me m-man n ekyú ne kángkáng dyityém efé ne Karâs ńdyí dyida mě eman echi m-bú kaku, nké n*fí ne kyijé* me n*da/byí chwǒm*. 3Me m-man n ekye banet kángkáng byěm ḿbyí me mu ne mbyí, nang enyam-byiko ejí n-kye n/fu, bashí kányí, â n*fí ne kyijé* kii*chi mě kanong*.
4Kyijé kyi-tông ng ofit eryí ne dyityém ecángê. Kyijé kii*nyît dyityém etî ké byěm-banet*. Kii*nyît esim eyip* nang byiko etông*. 5Kyijé kii*nyît banet etún fúú* nang kanim enim* nang kafâ esa*. Kyijé kii*fé byibî-byiraa ké dyityém*. 6Kyijé kii*kwárê ne byibî echi* nké ntûntû nké odanyîn kánkyí. 7Kyijé kii*kyee*. Dyityém ńdyí kyidafé, ne achi nyí kyidatî, ne ofit mú kyidaryí bii*man ne banyá*.
8Kyijé kyi-waa ng ne banyá. Byěm mbyi kô ḿbyí Osówo mu o-sét ng bamkpábé ḿbé badasét byiraa emen, nké byěm ámbyi byi-kyú u ké kaǎnyín-nkéré. Eyáré nyi kô nyí Osówo mu o-kyâ banet nyí badaman eraa ké ejá nyí banet baa*jwo kyikû* nké eyáré ányi e/chi e-man. Byinyídíng to mbyi kô, nké byi/chi byi-man. 9Ké ebóng, eyáré eten nyí byinyídíng ne nyí byidasét kyitwóm-Osówo wǎ bamkpábé ḿbé badasét byiraa emen e*da/kwárê*. 10Nké ké nkéré mú ńkyí kyi/kwárê kerededet kii/bê, ńkyí kyi*da/kwárê* kyi/chi kyi-rím.
11Ké nkéré me m/mû n/tôong wǎsíng, byiraa ejí ne byěm ḿbyí byi/mû mě ké dyityém ne okabe ejí byi/mû ḿbyí dyikwá. Kántîk mú n/firi okínkán, n*fí to n-chi i byěm-dyikwá*. 12Ńkyí byimu byi-ri ng kántîk nkyi wǎ chwǒm ńkyí onet odari bumê ké éyên. Ké nkéré mú mu o-bâ nké byi/chi byi-bírî byi-kûri bushú ḿbú Osówo wááng. Ńkyí me mu n-nyît ng kántîk nkyi kyicê. Ké nkéré mú mu o-bâ, n/chi n-nyît kángkáng kerededet, wǎ eringe nyí Osówo mu o-nyît ng kyi-kim ne me.
13Kántîk, byěm ḿbyín byichât nké mbyi kô, dyityém efé ne Karâs, ne achi etî, ne kyijé. Nké kyijé nké kyi/rêe kyi-shwôm ké byěm ḿbyín byichât.
Currently Selected:
1 Koríntyan 13: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
