1 Koríntyan 12
12
Eyáré nyí nyi e-fím m ne Busun-Osówo
1Kántîk, kyi-kim ne eyáré nyí nyi e-fím m ne Busun-Osówo, me mu n-ryuu ng, ǎ bwǎn-bané ejí, n/fu, ben banyît ńkyí nkyi ntûntû kyi-kim ne eyáré ányi. 2Ben bamu ba-nyît ng ba/fu, ké nkéré ben ba/mû ba/tôong banet ḿbé ba/bángê ké bakye esháng, ben ba/mû ké busa ḿbú erím-bakye nyí ee*man eraa* nyí kángkáng nkéré e/mû e-tông ng běn bukwóp ḿbú boo*nwa*. 3Ben ba-man ba-nyît kâng ba/fu, onet o*fí mú Busun-Osówo mbu bu-tông ng ǎ bukwóp* mú odaman efé kyibî-nshwam o-kye Jisos*. Ne onet o*fí mú odaman esét wááng o/fu, Jisos o-chi i Otu Kyítá* â Busun-Osówo bu*da/tông onet ámu bukwóp*.
4Eyáré nyí Busun-Osówo mbu bu-kyâ banet nyi ké azong ké azong, nké Busun-Osówo ámbu bubónge nké mbu bu-kyâ kányí. 5Akwóp to nyi kô ké azong ké azong nyí banet mbe ba-chi i bǎmkpóngé ḿbé Otu Kyítá. Nké Otu Kyítá ámu obónge nké mbe ba-fâ ǎ. 6Busa to mbu kô ké azong ké azong ḿbú banet mbe ba-chi i bǎmkpóngé ḿbé Osówo, nké Osówo ámu obónge nké mu o-kyâ nang yeě nang yeě busa ké bǎmkpóngé emen ḿbé mu o-chi i. 7Nang yeě nang yeě Busun-Osówo mbu bu-kyâ ǎ eyáré ké bukwóp ḿbú emen, ké kanong ńké kángkáng banet. 8Busun-Osówo ámbu bubónge nké mbu bu-kyâ onet obónge eyáré nyí odasét byinyídíng ḿbyí Osówo. Busun-Osówo ámbu bubónge bu-bwa bu-kye onet okíri eyáré nyí odatángê byinyídíng ḿbyí Osówo. 9Busun-Osówo ámbu bubónge nké mbu bu-kyâ onet obónge dyityém efé ne Karâs, bu-bwa bu-kye onet okíri busa ḿbú odaman echi banet erwôm ebe e-man. 10Busun-Osówo mbu bu-kyâ onet obónge busa ḿbú odachi biǐtí-akat. Onet okíri bu-kye ǎ busa ḿbú odaman esét banet kyitwóm wǎ mkpábé mú odasét byiraa-Osówo. Bu-bwa bu-kye onet okíri busa ḿbú odaman esét ńkyí kyi/yángê ne eyáré nyí nyi e-fím m ne Busun-Osówo ne nyí e*fí e-fím m*. Bu-kyâ onet okíri busa ḿbú odaman eraa ké ejá nyí banet baa*jwo kyikû* bu-bwa bu-kye onet okíri busa ḿbú odaman esét ńkyí onet mú mu o-raa ng ké ejá nyí banet baa*jwo kyikû* eringe kyi/byí. 11Nké Busun-Osówo ámbu bubónge nké mbu bu-chi i kángkáng byěm ḿbyín. Mbu bu-kyâ onet ne onet eyáré nyí emen eringe nyí kyi/nyîn kámbú.
Enyam-Byiko Ebónge nyí Karâs nyi ne Byipang Chwóó
12Ké ebóng, Karâs mu wǎ kyirim-enyam-byiko ńkyí nkyi ne byipang-enyam-byiko chwóó. Kyi/tôong kyirim-enyam-byiko kyibónge, nang ké nkyi ne byipang-enyam-byiko ké azong ké azong. 13Ké bukwóp ámbu bubónge, be to ashí kángkáng, banet-Jûs ne ḿbé ba*fí banet-Jûs* básóng ne banet ḿbé ba*fí básóng* Busun-Osówo bubónge nké boo/kye bě osoo mú Osówo ké kyirim-enyam-byiko ánkyi kyibónge. Ne be ashí kángkáng Osówo oo/chi Busun emen bu-sú bě ké byiko.
14Ké ebóng, enyam-byiko eyén e*fí ne kyipang kyibónge nké nke* nké nyi ne byipang chwóó. 15Â kyiká kyi/mû kyi-raa ng kyi/fu, ké nǎ, me nn*chi bubwô* me n*fí kyipang-enyam-byiko* ńkyí nkyí kii*man echi kyiká kii*kyú to kyipang-enyam-byiko*. 16Ne â butông bu/mû bu-raa ng bu/fu, ké nǎ, me nn*chi dyichi* me nn*chi kyipang-enyam-byiko* ńkyí nkyí kii*man echi butông boo*kyú to kyipang-enyam-byiko*. 17Â kyirim-enyam-byiko kyimúmú kyi/mû dyichi dyíchi, kyi-cen n nǎ ne kyi-kûjwo atông. Ne â kyi/mû butông bútong, kyi-cen n nǎ ne kyi-kûjwo kyinung-byěm. 18Wǎ eringe nyí nkyi kâng, Osówo o/fé kángkáng azong-byipang ké enyam-byiko wǎ eringe nyí kyi/nyîn ǎ. 19Enyam-byiko e/mû ee*kyú* â nyǐ kángkáng e/mû kyipang kyibónge*. 20Wǎ eringe nyí nkyi, byipang-enyam-byiko mbyi chwóó, ne enyam-byiko nyi ebónge.
21Ké bubwô ámbu kâng, dyichi dii*man esét bubwô dyi/fu, me n*fí n-ryuu ng ǒ*. Nang dyishí dyi-bwa dyi-sét byiká dyi/fu, me n*fí n-ryuu ng ǒ*. 22Nké be bii*man efu, be byi*fí ne chwǒm ńkyí byidachi ne byipang-enyam-byiko ḿbyí mbyi kyeekyee*. 23Ne byipang-enyam-byiko ḿbyí byimu byi-kabe ng byi/fu, byi-jang ng e*fí kiǐtí* mbyí nké be byidatún kámbyí byi-shwôm. Ne byipang kâng ḿbyí byi*fí byi-jang ng enwa* byi-tî ng kámbyí kanong kanong 24ké bukwóp ḿbú bii*tî byipang ḿbyí byidanwa byi-shwôm*. Osówo oyén oo/cibi enyam-byiko kyikit kyibónge ké bukwóp ḿbú odakye byipang-enyam-byiko ḿbyí byi*fí ne ofê* ofê mú o/rêe o-shwôm. 25Ké bubwô ámbu kâng, okyii o*fí ké enyam-byiko* nké kángkáng byipang emen mbyi ne bǎmkpóngé ḿbé byidachi byi-kye barî. 26Â kyipang kyibónge nkyi kyi-ri ng busông, kángkáng byipang ḿbyí áku byi-ri ng to busông ne nkyí ké kyikû. Â ba/kpee kyipang kyibónge, kángkáng byipang ḿbyí áku byi-kyú u ké bunyîn-dyityém ne nkyí.
27Ben ashí enen kángkáng kâng ba-chi i enyam-byiko nyí Karâs, ne nang yeě nang yeě ké burwám enen o-chi i kyipang-enyam-byiko ányi. 28Ké banet-ncibi mú Osówo kâng, Osówo oo/kúng kámbé kángkáng o-tî ké bunye ké bunye. Ké mbwôp kashú, banet-kyitwóm-Jisos. Ké nnyinyěng, bamkpábé ḿbé badasét byiraa-Osówo. Ké byikit byichât, bantánge byiraa-Osówo, ne banet ḿbé mbe ba-chi i biǐtí-akat ba-nye. Ne banet ḿbé Osówo o/kye kámbé busa ḿbú badachi banet erwôm e-man ne ḿbú badachwáp barî-banet ne ḿbú badatông kámbé kiǐfáng ne ḿbú badaraa ké ejá nyí banet baa*jwo kyikû* ba-nye. 29*Chí mbé ashí amúmú nké mbe banet-kyitwóm-Jisos* nang bamkpábé ḿbé badasét byiraa-Osówo* nang bantánge byiraa-Osówo*. *Chí ashí kángkáng nké mbe ne busa ḿbú badachi biǐtí-akat* 30nang ḿbú badachi banet erwôm e-man* nang ḿbú badaraa ké ejá nyí banet baa*jwo kyikû* nang ḿbú badaman esét kyikû kyi-kim ne chwǒm ńkyí baa/sét*. 31Tî n̂g atyém enen kâng ké eyáré nyí nyi biǐtí e-shwôm.
Ńkyí kyi/nwa kyi-shwôm kâng nkyi ké bukwóp ḿbún něen.
Currently Selected:
1 Koríntyan 12: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
