1 Koríntyan 11
11
1Kû n̂g mě eleme kâng, wǎ eringe nyí me mu n-leme e Karâs.
Dyishí ecít ké Nkéré ba-kú ba-fâ Osówo
2Me mu m-kpee ng běn, ké nǎ, ben bamu ba-zîim m mě kángkáng nkéré, ne bamu ba-câ ké bukwóp ḿbú byěm ḿbyí n/tángê běn. 3Nké mu n-ryuu ng n/fu, ben banyît ba/fu, Karâs o/rêe o-shwôm onet nang orá nang orá. Onyinchéng o-rêe o-shwôm onyi emen, ne Osówo o/rêe o-shwôm Karâs. 4Ké bubwô ámbu, onyinchéng nang orá mú mu o-fâ nshwam, nang mu o-sét ng banet kyitwóm ńkyí Osówo wǎ mkpábé emen, â o/cít etam, onyinchéng ámu mu o-kyâ Karâs edángé. 5Ne onyinyi nang orá nké mu o-fâ nshwam, nang mu o-sét ng banet kyitwóm ńkyí Osówo wǎ mkpábé emen, dyishí dyikáá, onyinyi ámu mu o-kyâ otyép emen edángé. Onyinyi ámu o*da/yángê ne onyinyi mú oo/pwát dyishí*. 6Â onyinyi o*da/cít dyishí emen* ányi kyi/byí, o-man n ekét eji emen o-pwó. Nké ké nkyi chwǒm-éshwân ńkyí onyinyi odapwát dyishí, o-két nang eji emen o-pwó, kyi-nwa ng ńkyí odacít chwǒm ké dyishí. 7Onyinchéng o*fí ne bukwóp ḿbú odacít dyishí emen* ké ebóng, nyǐ o/bwom ké dyishí ńdyí Osówo. Nké onyinyi o/bwom ké dyishí ńdyí otyép emen. 8Ké ebóng, Osówo o*da/kúng onyinyi ne o-chi onyinchéng* nké o/kúng onyinchéng ne o-chi onyinyi. 9Ne o*da/chi onyinchéng ké bubwô ḿbú onyinyi* nké o/chi onyinyi ké bubwô ḿbú onyinchéng. 10Ké ofê mú barím ḿbé banong kâng, onyinyi o-man o-cít dyishí emen, eringe nyí odatông o/fu, nyǐ mu ké bubwô ḿbú otyép emen. 11Ké dyikpen eten ńdyí ocibi ne Otu Kyítá kâng, onyinyi oo*man ekyú ké byiko emen o-mîng onyinchéng* nang onyinchéng o-kyú ké byiko emen o-mîng onyinyi*. 12Ké ebóng, eringe nyí Osówo o/kúng onyinchéng ne o-chi onyinyi, ké bukwóp ámbu bubónge, onyinyi nké mu o-fwon n onyinchéng, ne kángkáng byěm byi/fím ne Osówo.
13Kabe n̂g, ben bayén kpá. Nkyi kanong ńkyí onyinyi odabwom ké bushú-banet o-fé nshwam o-kye Osówo dyishí dyikáá dí. 14Eringe nyí Osówo o/chi bě nkyi kyi-tángê e bě kyi/fu, kyi-kyú u chwǒm-éshwân ńkyí onyinchéng odakyú ne biintintang-eji, 15nké nkyi chwǒm ńkyí onyinyi odatông byiko ké nkyí. Osówo o/kye onyinyi biintintang-eji wǎ chwǒm ńkyí kyida ǎ ecít dyishí. 16Nké â onet nang obónge mu o-ryuu ng o/fu, nyǐ o-kán n ké dyishí kyi-kim ne chwǒm ńkyín, kángkáng ńkyí me ndasét nkyi něen, n/fu, nang be nang banet-ncibi mú Osówo ba*fí ne édúú ekíri ké Osówo efé*.
Byiryíng ḿbyí Otu Kyítá
(Mátyuu 26:26-29; Mâk 14:22-25; Lûk 22:14-20)
17Ké bacê ḿbé mu m-bâ běn ekye něen kâng, me n*fí m-kpee ng běn* ké ebóng, bancibi-ékwâbashi enen mbe ba-chi i kyibî ba-shwôm kyinong. 18Ké mbwôp kashú, banet baa/sét mě ba/fu, banet mbe kô ḿbé ba*fí ba-bángê e ńkyí bamu ba-sét ng ké bancibi-ékwâbashi enen* ne mu m-bángê e n/fu, ńkyí ba/sét mě kyi-man n ekyú ké kafâ. 19Ké ntûntû, kyi-man kyi-kyú kafâ eringe nyí banet ba/chi ba-man eri banet ḿbé mbe ba-sét ng ntûntû. 20Â ben ba/cibi kyikit kyibónge ké dyizu, ben ba*da/bê byiryíng ḿbyí Otu Kyítá eryí*. 21Ké ebóng, â ba-kú ba-ryí i, nang yeě nang yeě mu o-ryí i byiryíng ḿbyí emen o-câ kashú, banet bakíri ba-waa ng esong, bakíri ba-bwóm m bato. 22Ben ba*fí ne byise ḿbyí enen, ḿbyí badaryí byiryíng, ba-jwáp bato dí. Aa ben nkyi kyi-nyîn n běn edángê banet-ncibi mú Osówo, ba-fé banet-kyikpu éshwân. Ben bamu ba-ryuu ng ba/fu, me nsét běn ebóng kyi-kim ne chwǒm ńkyín. Mkpee běn dí. Ké ntûntû, n*fí m-kpee ng běn*.
23Ké ebóng, ké abwô nyí Otu Kyítá nké n/koo ńkyí n/tángê běn, n/fu, Jisos, Otu Kyítá ké buchú ḿbú ba/chi ba-chi ba-kám ǎ, o/yip berêt, 24o-kó Osówo asǎma, o-ját kámú, ne o-raa o/fu, nyín enyam-byiko ejí nyí e/já běn. Chi n̂g ńkyín ké ozîim ejí. 25Ké bukwóp ámbu bubónge, o/yip to mmîk ké nkéré mú baa/ryí byiryíng, ne o-raa o/fu, mmîk mún o-chi i ocím mú ofyîfî, mú Osówo o/ryí o-sem byiko emen, mú o/kúlî kámú ne baróng ejí. Nang nkéré orá nké ba/jwáp kámú, jwáp n̂g kámú ké ozîim ejí. 26Ké ebóng, tete Otu Kyítá o-bâ, ben bamu ba-tông ng bukyû emen kyíjí gbúúl nang nkéré orá nké ba/ryí berêt mún, ba-jwáp ké mmîk mún.
27Nkyi něen kâng kyi/fu, â nang yeě nké mu o-ryí i berêt mú Otu Kyítá, o-jwáp ng ké mmîk emen ké bukwóp ḿbú budakye Otu Kyítá edángé, onet ámu mu o-chi i kyibî o-bât ng enyam-byiko ne baróng ḿbé Otu Kyítá. 28Ké bubwô ámbu kâng, nang yeě nang yeě otóbê kafâ emen kpá ne o-ryí berêt ámu, ne o-jwáp ké mmîk ámu. 29Ké ebóng, â onet ámu o*da/nyît kyikû kyi-kim ne enyam-byiko nyí Otu Kyítá* ké nkéré o-kú o-ryí i berêt ámu, o-jwáp ng ké mmîk ámu, onet ámu mu o-bâ ne mpan ké byiko emen ké nkéré mu o-ryí i, o-jwáp ng. 30Nkyí nké banet chwóó ké burwám enen mbe ba-rwôm m ne mbe kyeekyee ne bakíri to baa/kpú. 31Â be byi/mû byi-tóbê ng kafâ eten kpá, Osówo o/mû oo*ba/chi o-pan bě mpan*. 32Nké Otu Kyítá mu o-pan n bě mpan, o-tángê e bě dyishí, eringe nyí oo*ba/chi o-két mpan o-bên bě* cibicibi ne ejíí*.
33Ké bubwô ámbu kâng, ǎ bwǎn-bané ejí, nang nkéré orá nké ba/cibi kyikit kyibónge ba/fu, ba-ryí i byiryíng ḿbyí Otu Kyítá, kyú n̂g ba-bwom barî. 34Ne â nang yeě nké esong nyi e-nwa ng ǎ, onet ámu oryí byiryíng ké kyise, eringe nyí baa*ba/chi ba-bwom ké mpan mú Osówo* ké nkéré baa/kyú kyikit kyibónge*. Kyi-kim ne byiraa ámbyi byikíri, me n/chi n-tóbê kámbyí ké nkéré mm/bê.
Currently Selected:
1 Koríntyan 11: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
