1 Koríntyan 10
10
Pôl o/kuri Ekó kyi-kim ne Bakye esháng
1Ké ebóng, me mu n-ryuu ng, ǎ bwǎn-bané ejí, n/fu, ben bazîim ńkyí kyi/chi banchí eten ḿbé kpákpá, ḿbé ba/mû ba/cen ne Músis ké kyikû. Mbé ashí amúmú ófíbí nké o/mû o-bám m kámbé, ne mbé ashí kángkáng ba/nyáng baya ḿbé badakó Rêt, nang chwǒm kyi*da/chi kámbé*. 2Ké ófíbí ámu ne ké baya ámbe nké mbé ashí amúmú ba/kye kámbé osoo mú Osówo wǎ bancen ne Músis ké kyikû. 3Mbé ashí kángkáng ba/ryí dyizong-berêt dyibónge mú o/fím ne Osówo. 4Ne mbé ashí kángkáng ba/jwáp dyizong-omu to dyibónge ńdyí dyi/fím ne Osówo. Omu mú ba/jwáp éné o/fím ké buká ḿbú bu/fím ne Osówo, ḿbú bu/mû mbu bu-cen n bu-câ ne mbé ké kyikû. Ne buká ámbu bu/mû Karâs oyén. 5Nké nang ké nkyi éné, dyityém dyi/mû dyi*fí dyi-nyîn n Osówo ne bujê-banet chwóó ké burwám ebe*. Ké bubwô ámbu nké byikwóm ebe byi/mû byiryibyiryi ké kyikim-dyikán ńkyí ba/cen ké nkyí.
6Nké byěm ḿbyín něen gbât byi/bwom wǎ ekap nyí eten, nyí mbyi byi-kuri ng bě ekó byi/fu, be byi*dachi byi-kyú ne okabe mú byibî-byěm echi* wǎ banet eten ámbe ḿbé kpákpá* 7nang bakye to esháng* wǎ eringe nyí banet ebe bakíri ba/mû ba-sháng ng*. Wǎ eringe nyí ejá-Osówo nyí ba/sáng kyísí e/sét e/fu, banet ámbe ba/kyú me, ba/fu, mbé ba-ryí i byiryíng, ba-jwáp bato, ne ba-bûu nensang ba-kpet ane-babép ene. 8Be bii*man byi-chi byibî-byěm kyi-kim ne banet erí* wǎ eringe nyí kyicê-banet ebe ba/chi* ne bajam-égot-banet diǐkpú esim onyiryiká ba-kpú ké dyicí dyibónge*. 9Be bii*man byi-kan Otu Kyítá* wǎ eringe nyí banet ebe bakíri ba/mû ba/chi* ne efyi e-ju kámbé*. 10Be bii*man byi-kûshwôn ne nyǐ* wǎ eringe nyí banet ebe bakíri ba/mû ba/chi* ne Orím mú Bukyû o-ju kámbé*.
11Byěm ḿbyín něen kángkáng byi/chi kámbé, eringe nyí byidatông banet bakíri ekap. Ne ba-sáng to kámbyí kyísí wǎ ekó ekuri nyí eten. Ké ebóng, be byimu byi-kyú u ké nkuli kyikû-nkéré.
12Nang yeě mú mu o-kabe ng o/fu, nyǐ mu o-bwom m nensang, onet ámu okûbám byiko emen, eringe nyí oo*ba/chi o-myii*. 13Okan nang orá mú mu o-bâ o-kâm m běn mu eringe ebónge ne mú mu o-bâ o-kâm m kángkáng banet. Nké Osówo mu o-tî ng ocím emen mú o/ryí, ne oo*ba/chi o-bángê ba-kan běn ké bukwóp ḿbú baa*ba/chi ba-man ekpógê*. Ké nkéré mú ba-kú ba-kan n běn, nyǐ o/chi o-kye běn busa ḿbú badaryí ofit, ne o-kye běn bukwóp ḿbú badafem.
14Ké bubwô ámbu kâng, ǎ bacín-dyityém ejí, *da n̂g echi ba-kûsháng bakye*. 15Me mu n-raa ng ne ben wǎ banet ḿbé mbe ne bubong. Ben bayén, kabe n̂g kanong kanong kyi-kim ne ńkyí mu n-sét ng. 16Ké nkéré byimu byi-kó ng Osówo asǎma ké mmîk mú badajware bato, be byi*fí byi-jwáp ng baróng ḿbé Karâs ne barî ké nkéré byimu byi-jwáp ng ké mmîk ámu dí*. Ne ké nkéré byimu byi-ját ng berêt ámu, be byi*fí byi-koo ng enyam-byiko nyí Karâs ké nkéré byimu byi-ryí i kámú dí*. 17Ké ebóng, berêt ámu mu obónge, be to ashí kángkáng, nang ké byi/jê, byi-chi i enyam-byiko ebónge, ké ebóng, be ashí kángkáng byimu byi-ryí i kyirim-berêt ánkyi kyibónge.
18Kabe n̂g kyi-kim ne banet-Hyíburus. Banet ḿbé mbe ba-ryí i ńkyí baa/chi kyifen ba-kye Osówo mbe ba-ryí i to ńkyí ba/tî ké kyikit-kyifen echi ba-kye Osówo. 19Ńkyí n/raa něen kyi/byí nǎ. Kyi/byí kyi/fu, orím-bukye, nang byiryíng ḿbyí mbe ba-sháng ng kámú byi/byí chwǒm dí. 20Aa*wááng*. Ńkyí me mu n-raa ng kyi/byí něen kyi/fu, ńkyí mbe ba-chi i kyifen ké kyikit-kyifen echi ńkyí banet ḿbé ba/bángê ké bakye esháng, mbe ba-chi i kyifen ba-kyâ byibî-bací, ba*fí ba-chi i ba-kyâ Osówo*. Ne me n*fí n-ryuu ng běn n/fu, kû n̂g eryí bucín ne byibî-bací*. 21Ben baa*man ejwáp ké mmîk mú Otu Kyítá* ba-bwa ba-chîjwáp to ké mú byibî-bací*. Ben baa*man eryí byiryíng ké ókpákpúrúk mú Otu Kyítá* ba-bwa ba-chîryí ké mú byibî-bací*. 22Be byimu byi-ryuu ng byi/fu, Osówo osa kafâ ne be? Be byimu byi-kabe ng byi/fu, be byi-shwane e byi-shwôm Osówo dí.
23Be byi-man n echi nang ebóng ńkyí kyi/nyîn bě. Éné nké banet mbe ba-raa ng. Nkyi éné, nké *chí kángkáng byěm nké byidanwa*. Be byi-man n echi nang ebóng ńkyí kyi/nyîn bě, nké *chí kángkáng byěm nké byida bě echwáp*. 24Onet nang obónge o*dachi o-kûkyé kanong ńké emen nyǐ oyén* nké okûkyé o-kyâ banet bakíri.
25Ben ba-man n eryí nang ebóng enyam nyí banet mbe ba-shee ng ké kasî, nang dyityém eyên aa*bí*. 26Ké ebóng, wǎ eringe ejá-Osówo nyí ba/sáng kyísí e/sét e/fu, ejíí ne kángkáng byěm ḿbyí mbyi ké nyǐ byi/já Otu Kyítá.
27Â onet mú o*da/bángê ké Karâs* o/kó ǒ o/fu, wo ada-ryí byiryíng, ne a/bángê a/fu, wo a-câ, ryí ńkyí onet ámu oda ǒ ekye. *Dachi a-bí dyityém eyên nang chwǒm*. 28Nké â onet o/sét ǒ o/fu, byiryíng ḿbyín ba/sháng bakye ké mbyí, *dachi a-ryí byiryíng ámbyi kâng* ké bubwô ḿbú onet ámu mú o/sét ǒ éné ne ké bubwô ḿbú dyityém emen to ndyi dyi-sét ng ǎ dyi/fu, kii*nwa ńkyí badaryí kámbyí*.
29Â onet obónge mu o-bí ng kâng o/fu, ebóng dyityém ńdyí onet mú áku dyidaku busa ḿbú ejí, ḿbú ndaman echi nang ebóng ńkyí kyi/nyîn mě. 30Â me mu n-kó ng Osówo asǎma ké byiryíng ejí ḿbyí o/kye mě, ebóng onet okíri oda mě ebîn kyi-kim ne byiryíng ejí ḿbyí mu n-kó ng Osówo asǎma ké mbyí.
31Nang ebóng chwǒm kâng nké bamu ba-chi i, nang bamu ba-ryí i byiryíng, nang ba-jwáp ng bato, chi n̂g kánkyí ké akpee nyí Osówo. 32Kyú n̂g dyikpen ké bukwóp ḿbú baa*ba/chi ba-chi banet-Jûs nang ḿbé ba*fí banet-Jûs* nang banet-ncibi mú Osówo ba-kûsa kafâ*. 33Kû n̂g echi wǎ eringe nyí me mu n-chi i. Me mu n-kan n n/fu, n-chi i nang yeě nang yeě o-kyú ké bunyîn-dyityém ne me ké kángkáng byěm ḿbyí mu n-chi i. N*fí n-kabe ng kyi-kim ne kanong ńké ejí* nké mu n-kabe ng ké ńké kángkáng banet, eringe nyí Osówo o/chi o-nyii kámbé.
Currently Selected:
1 Koríntyan 10: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
