1 Koríntyan 9
9
Busa ne Bǎmkpóngé ḿbé Onet-Kyitwóm mú Karâs
1Me n*fí onet mú mu ké byiko emen dí*. Me n*fí onet-kyitwóm mú Karâs dí*. Me n*da/ri Jisos, Otu Kyítá eten dí*. Ne ben kâng ba*fí abwô-bǎmkpóngé ejí ḿbé n/chi n-kye Otu Kyítá dí*. 2Â nang banet bakíri ba*da mě ekúng wǎ onet-kyitwóm mú Karâs* ké ntûntû ben bamu ba-kúng ng mě. Ben bayén, ké bubwô ḿbú dyikpen enen ńdyí ba/fé ne Otu Kyítá, bamu ekap nyí edatông e/fu, me n-chi i onet-kyitwóm mú Karâs.
3Ké nkéré banet ba-kú ba-bîn n mě, něen nké mu m-pâ ng byiko ejí. 4Me n*da/kwárê mú bada mě ekye byiryíng ne bato ké bǎmkpóngé ḿbé mu n-chi i dí*. 5Me n*fí ne busa ḿbú ndabé onyi mú o/fé dyityém ne Otu Kyítá n-dim bucen ne nyǐ*? wǎ eringe nyí banet-kyitwóm-Karâs ḿbé áku ne bwǎn-bané ḿbé Otu Kyítá ne Pyíta mbe ba-chi i dí*. 6Aa Bánábas ne me nké nke nké byidachi bǎmkpóngé byi-nen n byiko eten. 7Onet-súja mu kô nang obónge mú okákárá o*fí o-kyâ ǎ akpuga ké byěm ḿbyí mu o-chi i*? Mkpang kyifát mu kô mú o*fí o-ryí i byirim-byichí ḿbyí mbyi byi-zím m ké kyifát emen*? Mbâm ebû mu kô mú o*fí o-ryí i ebû emen*?
8Me mm*ba/chi n-kan n-nyere nyín ké byěm ḿbyí mbyi byi-chi i kángkáng dyicí nké nke* ké ebóng, Byije-Músis to mbyi byi-sét ng eringe ebónge. 9Be byimu byi-kó ng ké Nwet-Byije-Músis ba/fu, *dachi a-bwá ocím mú mpong* ké nkéré o-kú o-cím m esang-byichí e-byí i ké biǐfâa e-róng ng kyísí*. Osówo mu o-kérê ng kyi-kim ne bampong aa, 10aa o*da/raa ké ntûntû kyi-kim ne be ké nkéré o/raa ńkyín*? Ké ntûntû ba/sáng ńkyín ba-tî bě be. Onet mú mu o-kpang ng okpǎng ne mú mu o-fuu ng ofǔng bachi bǎmkpóngé ebe ne okabe mú ba/chi ba-koo kyicê-byíkwôn ḿbyí mbe ba-kpóngê e, ńkyí kyi/já kámbé. 11Be bii/kwón esang-byichí nyí kafâ-dyityém ké burwám enen. Kyi/jang ejê, â byi/koo byěm ḿbyí kyíjí ne ben? 12Â banet ḿbé áku mbe ne busa ḿbú badakoo byěm ḿbyín ne ben, busa ḿbú eten kâng bu*da/jê bu-shwôm dí*.
Nké be byi*da/tông ne busa ḿbún*. Nké bii/ryí ofit ké kángkáng byěm, eringe nyí bii*ba/chi byi-chi chwǒm nang kyibónge* ńkyí kyida běn eku ké bukwóp ḿbú Bǎmpém ḿbé Banong kyi-kim ne Karâs*. 13Ké ntûntû, ben bamu ba-nyît ng ba/fu, banet ḿbé mbe ba-chi i bǎmkpóngé ké kafâ-kiǐtí-kyise-kyifen-Osówo echi ba-fím m ne byiryíng ebe ké kafâ-kyise ánkyi. Ne banet to ḿbé mbe ba-chi i byifen ké kyikit-kyifen-Osówo echi ba-ryí i to kyicê-byiryíng ḿbyí byifen ḿbyí badachi. 14Ké bukwóp ámbu bubónge, Otu Kyítá oo/kye busa o/fu, banet ḿbé mbe ba-sét ng banet Bǎmpém ḿbé Banong, byiryíng ebe byifím ké bǎmpém ebe ḿbé mbe ba-sét ng.
15Nké me n*da/kúng ne busa ḿbún nang kabónge n-chi chwǒm* ne nang m/bwa mu n-sáng ng běn kántîk, eringe nyí n/chi n-koo byěm ámbyi n-kye byiko ejí*. Ké ebóng, kyi-nyîn n mě ńkyí ndakpú kyi-shwôm ńkyí onet oda mě eku bukwóp ḿbú mu ne mbú, ḿbú ndatông byiko. 16Me n*fí ne busa ḿbú ndatông byiko* ké nǎ, mu n-sét ng banet Bǎmpém ḿbé Banong*. Ké nǎ, Osówo o/kye mě busa ḿbú ndachi éné, ne kyi/chi kyi-bên ne me kanong kanong, â n*da/sét banet Bǎmpém ḿbé Banong*. 17Â me n/chi bǎmkpóngé ejí wǎ chwǒm ńkyí kyi/fím mě ké dyityém ejí, me m-man n etî achi kâng n/fu, bakye mě akpuga. Nké ké bubwô ḿbú mu n-chi i kámbé wǎ chwǒm ńkyí ba/twóm mě, nkyi ké bubwô ḿbú Osówo oo/kye mě bǎmkpóngé ḿbén. 18Ebóng akpuga nyí ba/kye mě kâng ké bǎmkpóngé ámbe. Akpuga nyí ba/kye mě, ányi ofê mú mu n-koo ng ké Bǎmpém ḿbé Banong ḿbé me mu n-sét ng banet dyikáá. N*fí n-koo ng nang byěm ḿbyí me m/mû n/chi n-koo* ké Bǎmpém ḿbé Banong ḿbé mu n-sét ng banet*.
19Me mu ké byiko ejí, n*fí ósóng mú onet*. Nké me mu n-kúng ng byiko ejí n-tî wǎ ósóng mú nang yeě nang yeě, eringe nyí me n/chi n-já banet chwóó ba-ca kashú ḿbé ba/fé dyityém ebe ne Karâs. 20Â mu n-chi i bǎmkpóngé ne banet-Jûs, n-kyú u wǎ onet-Jûs, eringe nyí ba/chi ba-bángê ne me. Ne nang ké me oyén n*fí ké busa ḿbú Byije-Músis* me mu n-kyú u wǎ mu ké mbú, ké nkéré n-kú n-chi i bǎmkpóngé ne banet ḿbé mbe ké mbú, eringe nyí mbé ba/chi ba-bángê ne me. 21Eringe ányi ebónge, â me mu n-kyú u ne banet ḿbé ba*fí banet-Jûs* n-kyú u wǎ mbé, ḿbé ba*fí ké busa ḿbú Byije ḿbyí Músis* eringe nyí mbé badabángê ne me. Ńkyín kyi*da/byí kyi/fu, me n*fí n-fâ byije-Osówo*. Me mu ké ntûntû ké busa ḿbú kyije ńkyí Karâs. 22Â n/kyú ké burwám ḿbú banet ḿbé obánge ebe mu kyeekyee, me to n-firi ng kyeekyee wǎ onet mú mu ké burwám ebe, eringe nyí mbé ba/chi ba-bángê ne me. Me m/bírî kâng kángkáng byěm ké bushú ḿbú kángkáng banet, eringe nyí ndanyii kyicê-banet bakíri ké bukwóp nang burá.
23Me mu n-chi i kángkáng byěm ḿbyín ké bubwô-Bǎmpém ḿbé Banong, eringe nyí ndakoo to banjware ḿbé bǎmpém ámbe mbe ba-kyâ. 24Ben bamu ba-nyît ng ké ntûntû ba/fu, ké ochéé ezóngê, kángkáng banzónge ochéé ba-bwom m ké mǔ. Nké onet obónge mú odaman ezóngê o-shwôm nké odakoo eyáré. Zóngê kâng ké bukwóp ḿbú adaman ekoo eyáré nyí Osówo odakye. 25Nang yeě nang yeě nké mu o-kwâa ng eringe nyí odazóngê ochéé, o-man o-ri busông o-kûkwâa ochéé ezóngê nyǐ oyén kángkáng nkéré. Onet ámu o-chi i éné, eringe nyí bada ǎ ekye eyáré nyí ee*rí*. Nké be byimu byi-chi i kánkyí, eringe nyí byidakoo eyáré nyí edawaa ne banyá. 26Nkyí nké me mu n-zóngê e n-câ dángdáng ké kyikit ńkyí badakoo banet. Nkyí nké me mu wǎ onet mú odaman edíp égbi, mú oo*twóp égbi nyí emen kyísí dyikáá*. 27Me mu n-chi i enyam-byiko ejí ecîp, ké eringe nyí mu n-díp ng byiko ejí, n-níbî ng byiko ejí kanong kanong, eringe nyí baa*ba/chi ba-né mě me oyén* nang ké nkéré nn/kó banet ḿbé áku n/fu, babâ byi-díp égbi*.
Currently Selected:
1 Koríntyan 9: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
