BALA LUK LINIO 5
5
Surat Idi Anak Dumba
1 #
Yeh 2.9–10; Yes 29.11 Ui nenier aceh surat bang paladNeh pa tinueh Luk tudo luun kerusi ineh. Idi inan luk inayud pekop surat ineh, idi ieh itu ku tudu' etu. 2Idi ui nenier teh seburur melaikat luk metueh mada' dengan tang luk rayeh, kebalaneh, “Idéké petulu miak ngelesad surat ini, idi narak etuneh?” 3Idi do' bang surga idi bang tana' pana' idi meluun teh pa liang tana', seburur pana' nateh luk miak ngelesad surat ineh idi nier neneh. 4Idi ui nangi' ngaceku na seburur lemulun pana' luk mayu ngelesad surat ineh idi nier neneh. 5#Pud 49.9; Yes 11.1, 10 Idi inan seburur rat arang amung-amung lun rayeh ineh nepebala negku, “Aleg nangi', siruh, Balang luk ratnan pupu Yahuda, ieh ineh Uat Daud ineh, pangeh nengalap tueh pad Ieh miak ngelesad surat idi narak tudu' etu ineh.”
6 #
Yes 53.7; Sek 4.10 Idi ui nenier luun uned kerusi ineh, idi arang apat pudut luk mulun, idi arang amung-amung lun rayeh ineh, netuped aceh Anak Dumba luk mepad kudeng pangeh kirat ayuneh, idi luk inan tudu' unga, idi tudu' mateh, ieh ineh tudu' roh Allah luk pangeh icuk kuan aput-aput tana' ini. 7Idi Anak Dumba ineh nengalap surat ineh rat bang paladNeh pa tinueh Luk tudo luun kerusi ineh. 8#Nani 141.2 Kareb Ieh nenganau' ineh, idi apat pudut luk mulun ineh idi dueh ngepulu' apat lun rayeh ineh netekeradung pa kiung Anak Dumba ineh, idi anid-aniddeh uned ngimet giula' idi bigan amas panu' ku umau luk do' buen, ieh ineh sembayang lun manu. 9#Nani 33.3; 98.1; Yes 42.10 Idi ideh menani aceh nani luk mebaruh, unineh,
“Iko mayu miak ngalap surat ineh, idi ngelesad etuneh.
Ngaceku Iko pangeh kirat, idi dengan dara'Mu
Iko nenguli' lemulun kuan Allah
ratnan anid-anid babpat, buri', inul, idi pupu.
10 #
Pur 19.6; Lin 1.6 Iko pangeh nenganau' nedeh mangun ku aceh imet imam-imam kuan Allah tau,
idi ideh miak ngimet tana' ini.”
11 #
Dan 7.10
Idi teh ui nenier, idi neninger uni tang melaikat luk mula' libut-libut kerusi ineh idi apat pudut luk mulun idi amung-amung lun rayeh ineh. Inan tuda'-tuda' ngeribu idi tuda'-tuda' ngepulu' ribu melaikat ineh. 12Ideh menani dengan uni tang luk rayeh,
“Anak Dumba ineh luk kirat ineh mayu
miak ngalap lalud idi mula' binaweh, ileh, idi tueh,
dita', rayeh, idi ubur!”
13Idi ui ninger teh anid-anid pudut luk bang surga, idi luk bang tana', idi luk pa liang tana', idi luk bang abpa' rayeh, idi amung-amung luk bangneh ineh pebala,
“KuanNeh luk tudo luun kerusi raca', idi kuan Anak Dumba ineh
inan ubur, dita' rayeh, idi lalud,
macing ruked-ruked!”
14Idi apat pudut luk mulun nepebala, “Amin!” Idi amung-amung lun rayeh netekeradung idi nesembayang.
Currently Selected:
BALA LUK LINIO 5: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
