BALA LUK LINIO 6

Ratnan Etu-Etu Ineh

1Idi ui nenier Anak Dumba ineh ngukab sebuleng ratnan luk ketudu' etuneh, idi ui neninger sebuleng rat arang apat pudut luk mulun ineh pebala mepad kudeng uni lalam, “Do' amé' tungé!” 2#Sek 1.8; 6.3, 6 Idi ui nenier, inan aceh kuda luk mebuda, idi lemulun luk tudo luunneh ineh ngimet aceh binor; idi aceh pata pana' pangeh biré kuanneh. Ieh neremuat dengan tuehneh, pad ieh miak ngelaya' pupu-pupu.

3Idi Anak Dumba ineh nengukab etu luk kedueh ineh idi ui neninger pudut luk mulun luk kedueh ineh pebala, “Do' amé' tungé!” 4#Sek 1.8; 6.2 Idi aceh kuda luk baken neremuat, ieh ineh kuda luk mesia'; idi kuan lemulun luk tudo luunneh ineh pangeh buré lalud ngacing bunu' luun tana' pad lemulun pepaté; idi aceh pelapet luk rayeh pangeh biré kuanneh.

5 # Sek 6.2, 6 Idi Anak Dumba ineh nengukab etu luk keteluh ineh, idi ui neninger pudut luk mulun luk keteluh ineh pebala, “Do' amé' tungé'!” Idi ui nenier, inan aceh kuda luk mitem; idi lemulun luk tudo luunneh ineh inan aceh timang bang paladneh. 6Ui neninger uni mepad kudeng tang arang uned apat pudut luk mulun ineh pebala, “Teluh lio setangal bara tabpar seaco. Iamo' matar umau dengan abpa' anggur ineh.”

7Idi Anak Dumba nengukab etu luk keapat, idi ui neninger uni tang pudut luk mulun luk keapat ineh pebala, “Do' amé' tungé'!” 8#Yeh 14.21 Ui nenier inan aceh kuda luk mabuh, idi lemulun luk tudo luunneh ineh Até ngadanneh, idi Su inan Até pana' nemaya' neneh. Kuan didueh ineh pangeh biré lalud pa luun sebabpat rat arang apat babpat tana' pad ngaté ku pelapet idi ku iru' idi ét idi ku pung-pung luk meliput bang tana' ini.

9Idi Anak Dumba nengukab etu luk kelimeh ineh, Ui nenier pa liang bubpun ineh amung-amung ulun lemulun luk pangeh pinaté ngaceku bala Allah, idi ngaceku ideh lutep mada' luk nekali'deh. 10Ideh nengitang, kebaladeh, “O Tuhan luk Melalud, meligan idi matu! Tuda' io teh kareb nateh Iko ngelio lemulun bang tana' ini idi ngukum nedeh ngaceku ideh nengaté nekai?” 11Anid-aniddeh pangeh biré aceh kuyu' luk mebuda', idi pangeh bila kuandeh, do' ideh nganét segageh teh pad demulun-demulun idi kinanak-kinanak lu serurum dengandeh ineh, luk miak pitayen, petap kinula'deh.

12 # Lin 11.13; 16.18; Yes 13.10; Yo 2.10, 31; 3.15; Mat 24.29; Mrk 13.24–25; Luk 21.25; Yo 2.31 Idi ui nenier Anak Dumba nengukab etu luk keanem ineh. Idi inan ruyuh tana' luk rayeh, idi mateh aco pana' mangun mitem, mepad kudeng kibung guni luk mekara urat, idi bulan mangun mesia' mepad kudeng dara'. 13#Yes 34.4; Lin 16.20 Gituen-gituen bang langit nerurug amé' tana', mepad kudeng lawa gita' luk ngerurug bua'neh, luk melu kareb ieh neguyu' ku bui luk mula'. 14Langit pana' netutu' mepad kudeng surat luk linulun, idi anid-anid pegkung idi pulau pangeh binubuh idi neremuat rat su luk inandeh. 15Idi raca'-raca' bang tana', lun rayeh-rayeh, lun rayeh baweh, lun do', lun mesangit, idi anid-anid lemulun, do' demulun idi lun do' pana', amung-amungdeh sigapung bang lubang batu idi arang batu-batu luk luun pegkung. 16#Hos 10.8; Luk 23.30 Ideh nengitang kuan pegkung-pegkung idi batu-batu ineh, “Do' ngeritep nekai, idi ngelinged nekai ratnan matehNeh luk tudo luun kerusi ineh, idi ratnan useh Anak Dumba ineh! 17#Yo 2.11; Mal 3.2 Aco rayeh, aco usehdeh ineh pangeh nacing, idi idéké luk miak tuman ratnan ineh?”

Currently Selected:

BALA LUK LINIO 6: BLD

Highlight

Copy

Compare