TIDO YEREMIA 5
5
Sembayang Mutuh Ei'
1O Tuhan, do' ngerawé susa' kai, idi nier igu' kai.
2Lun baken pangeh nengalap binaweh kai;
idi pupu baken tudo bang ruma' kai.
3Taman kai pangeh pinaté bunu';
idi tinan kai mangun ku tinula'.
4Kai melih abpa' luk rupen kai,
idi kayuh apui pana'.
5Kai uen ngusu mepad kudeng keladai idi unta,
pad kai na miak ngato erur kai.
6Kai nemutuh akan mo' rat Asur idi Masir,
pelé kai mulun.
7Tepun kai nenganau' sala' idi naté,
iamo' kai medereh ngaceku sala'deh.
8Kai bang imet lemulun luk mepad kudeng demulun,
idi kai na miak puatin ratnan imetdeh.
9Inan lun luk ngaté bang pulung;
kai inan luk katot kareb nakap akan.
10Kai medadem ngaceku na petap akan,
pad kubil kai melau' kudeng tetel.
11Awan kai luk déi' Sion idi anak decur kai luk déi' Yahuda,
pangeh kikem bunu' luk mesaad pasét nedeh.
12Lun rayeh kai pangeh kikem idi tekito;
lun merar kai na uen ngerayeh.
13Anak adi' deléi kai duken tupeh mepad kudeng demulun;
idi anak deléi maan kayuh luk meberat.
14Nekini lun merar na tudo munung tanga' bawang,
idi anak adi' pana' na nateg gita.
15Awang pangeh nenecan nekai,
idi teh na kai ngalai ngaceku mesusa' niat.
16Pata kai pangeh nebpeh rat luun uluh kai.
Mesusa' kuan kai ngaceku kai nenganau' sala'.
17Kai pelaba susa' niat, idi meseraber siren kai,
ngaceku abpa' mateh kai mebpeh,
18ngaceku Pegkung Sion tican idi dat ali,
idi bungalé nalan luun usagneh.
19Iamo' Iko, O Tuhan, mangun ku raca' luk meruked;
idi miak ngimet macing kekipedneh.
20Ngudehké Iko pelaba io tacan nekai?
Miakké Iko ngerawé nekai teh?
21O Tuhan, nguit nekai lumi amé' Namu,
pelé amung-amung mepad kudeng luk atun.
22Miakké Iko necan nekai ruked-ruked?
Naké usehMu miak ugka'?
Currently Selected:
TIDO YEREMIA 5: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
