YEHISKIEL 1
1
Luk Pun-Pun Sinier Yehiskiel Ratnan Allah
(1.1—7.27)
Kerusi Allah
1 #
Lin 19.11
Limeh aco bulan apat bang lak luk keteluh ngepulu', ui tudo dengan lun Yahudi luk tiban déi' tangeb Abpa' Kibar luk déi' bawang Babil. 2#2 Rac 24.10–16; 2 In 36.9–10 (Ieh ineh bang limeh aco bulan bang lak luk kelimeh muci ratnan Raca' Yoyakin pangeh tiban.) 3Ui ini Yehiskiel Busi luk imam, neninger Tuhan pebala negku idi nekali' laludNeh, déi' tangeb Abpa' Kibar luk déi' Babil.
4Ui netengook idi nenier libuleh luk macing rat pa tinueh busat aco. Kilep merasat ratnan laput luk rayeh, idi libut-libutneh langit pana' macang. Idi su luk merasat ku kilep ineh, inan luk mesilo mepad kudeng tekaling. 5#Lin 4.6 Idi uned libuleh ineh ui nenier luk mepad kudeng ayu apat pung. Idi bururdeh kudeng lemulun. 6Iamo' anid-aniddeh inan apat kiung idi apat ilad. 7Kukuddeh mesiri, iamo' lisundeh mepad kudeng lisun sapi' deléi. Idi pung ineh mesilo mepad kudeng tekaling luk isa. 8Idi teh ideh inan apat ticu' lemulun liang anid iladdeh. 9Anid pung ineh malad dueh iladneh pad mangun ku aceh libung luk melebping, idi iladdeh petutup-petutup. Kareb ideh nalan ideh nalan pad-pad dengan na lumi.
10 #
Yeh 10.14; Lin 4.7 Idi anid-anid apat kiung pung ineh baken ayu: pa atun inan kiung lemulun, pa tinueh inan kiung balang, pa kabing inan kiung sapi' deléi, idi pa keted inan kiung kanui. 11Dueh ilad anid-anid pung ineh tebalad, pad ideh petutup nan ilad pung luk iringdeh, idi dueh iladdeh luk baken tegeripu. 12Anid-anid pung ineh nier su tuludeh. Ngaceku ineh ideh na lumi kareb ideh nalan amé' su apeh luk piandeh.
13 #
Lin 4.5
Arang pung ineh inan luk kudeng ayu sesakan luk mebudung, luk megéi' nalan. Apui ineh megéi' mebudung idi ngeruat kilep. 14Pung ineh pana' nalan lemubed mepad kudeng kilep.
15Kareb ui nenier apat pung ineh, ui nekali' apat roda luk macing luun tana', sebuleng iring anid-aniddeh. 16Idi anid-anid roda ineh mesilo kudeng batu luk meraga idi mepad ayu. Idi anid roda inan roda luk tepalang unedneh, 17pad amung roda miak nalan matun anid-anid lidung. 18#Lin 4.8 Idi iring roda ineh maput ku mateh. 19Kareb pung ineh nalan, roda pana' nalan maya' nedeh, idi kudeng pung ineh kemikit, kudeng ineh teh roda kemikit. 20Pung ineh nalan su apeh luk pian ulekdeh, idi roda pana' maya' mepad kudeng luk ruen pung ineh teh, ngaceku pung luk nguyut nedeh. 21#Yeh 10.9–13 Anid kua' pung ineh nalan, ucu' idi kemikit, roda pana' nganau' luk kudeng ineh teh, ngaceku pung luk nguyut nedeh.
22 #
Lin 4.6
Pa luun pung ineh inan luk melibuh luk inau' ratnan sayun luk mesilo. 23Pa liang luk melibuh ineh anid pung nemalad dueh iladneh petutup ku ilad pung luk iringneh, idi nemapen bururneh ku dueh iladneh luk baken. 24#Lin 1.4–15; 19.6 Ui neninger uni iladdeh kareb ideh temulud. Ieh ineh mepad kudeng beri abpa' rayeh, idi teh mepad kudeng uni aceh baweh luk rayeh, idi mepad kudeng uni tang Allah luk Melalud. Kareb ideh ucu' temulud, iladdeh tegeripu, 25idi inan teh uni rat pa luun luk melibuh ineh luk pa luundeh.
26 #
Yeh 10.1; Lin 4.2–3 Pa luun luk melibuh ineh inan luk mepad kudeng ayu kerusi luk inau' ratnan batu luk bata' langit, idi aceh ayu lemulun luk tudo luunneh. 27#Yeh 8.2 Idi ayu lemulun ineh mesilo mepad kudeng tekaling luk luun apui. Ieh merasat mepad kudeng budung apui. 28Idi acangneh mepad kudeng tegkang luk luun laput. Kudeng ineh teh ayu rayeh Tuhan.
Allah Nawar Ni Yehiskiel
Kareb ui nenier amung ineh, ui netekeradung luun tana'. Idi ui neninger aceh tang pebala,
Currently Selected:
YEHISKIEL 1: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
