TIDO YEREMIA 4
4
Pangeh Tabpa Yerusalim
1Amas tau luk mesilo na mesilo peh; usag Ruma' Allah tila' luun dalan.
2Anak adi' Sion mepad kudeng amas kuan tau atun,
iamo' nekini ideh inau' lun ku kuden.
3Tineh bungalé sikal maman anakneh,
iamo' pupuku mepad kudeng suit luk megateh inan anakneh.
4Ideh nima' anakdeh luk niti', maté ku lau idi paring.
Anak dari mutuh akan mo', idi na lun maré nedeh.
5Lemulun luk pekalai kuman akan luk pelaba do' maté luun dalan.
Lun do' nakap akan arang arap.
6 #
Pud 19.24
Sala' Yerusalim meluun rayeh ratnan sala' Sodom,
luk inusag bang palad Allah.
7Atun anak adi' deléineh meluun buda' ratnan salju idi rata sapi'.
Ideh do' ulun idi metueh.
8Butungdeh telubid luun dalan, kiungdeh mitem idi ideh na miti.
Kubildeh tekering kudeng kayuh idi tegeribpir luun tulangdeh.
9Meluun samal kuan lemulun luk naté bang bunu'
ratnan lun luk naté ku lau ngaceku na akan.
10 #
Bad 28.57; Yeh 5.10 Decur luk méi' nenanek anakdeh sebuleng ku akandeh;
ineh luk kenendeh kareb pupuku mesusa'.
11Tuhan nengacing usehNeh dengan meriput,
idi nemaré apui déi' Sion pad ieh nabud neseb.
12Amung raca' idi uang tana' ini
na ngerawé bunu' semuet maya' tanga' Yerusalim.
13Iamo' ineh nangun. Nabi idi imamneh pangeh nenganau' sala',
pad ngacing até kuan lemulun luk na mesala'.
14Ideh lawé-lawé maya' dalan mepad kudeng lemulun luk nebuser.
Bururdeh medara', pad lun baken na pian ngakem nedeh!
15Lun baken pebala, “Buro muyuh.
Melutak muyuhneh. Aleg ngakem negku!”
Idi ideh lawé-lawé rat aceh bawang macing nan bawang baken.
Idi na lun pian nganak nedeh.
16Idi teh Tuhan na pian ngerawé nedeh.
Ieh nengatad nedeh.
Meluun teh Ieh na méi' nan imam idi lun rayehdeh.
17Kai pian denganin, iamo' na tu luk nengedengan nekai.
Kai merapet inan aceh pupu luk na miak ngedengan nekai.
18Bunu' ineh ngabang nekai, pad kai na miak nalan déi' liang.
Tarek kai pangeh nacing.
19Ideh nengerada' nekai mepad kudeng kanui luk semiling.
Ideh nemupud dalan kai luun pegkung,
idi teh ideh nengagap nekai déi' su luk ali-ali.
20Ideh nengakem lun luk ngedengan nekai, ieh ineh raca' luk pinili' Tuhan,
idi luk inan kai merapet miak matar nekai ratnan bunu'.
21O lun Edom idi lun Us, do' muyuh meriruh idi mawang niat nekini.
Iamo' kareb susa' macing nemuyuh, kali' rungen muyuh migu' idi lubpa.
22Sion pangeh nemabeh salaneh; ukumneh pangeh nepelaba rat neneh.
Iamo' Edom miak kumin Tuhan luk ngegala' sala'mu ineh.
Currently Selected:
TIDO YEREMIA 4: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
