YEREMIA 46
46
Masir Linaya' Déi' Karkemis
1Tuhan nepebala ni Yeremia ratnan amung-amung pupu. 2#Yes 19.1–25; Yeh 29.1—32.32 Ini luk bilaNeh ratnan bawang Masir. Tuhan nepebala ratnan baweh Neko, raca' Masir luk linaya' Nebukadnesar, raca' Babil déi' Karkemis muneng ku Abpa' Pirat, bang lak luk keapat kareb Yoyakim Yosia ngimet Yahuda.
3“Lun rayeh baweh Masir ngitang,
‘Do' ngalap utap muyuh,
idi amé' pebunu'!
4Temina' ku kuda muyuh idi tudo luundeh!
Idi baris dengan tupi luun uluh muyuh!
Ngir pelapet muyuh!
Idi ngayung ku ayung bunu'!’
5“Iamo' anun luk sirenKu?” kebala Tuhan,
“Ideh nelemubed dengan matot.
Lun bunu'deh linaya';
ideh matot idi buro,
idi na lumi teh.
6Lemulun luk mawer na miak mepuit,
lun bunu' pana' na miak buro.
Idi muneng ku Abpa' Pirat pa tinueh busat aco,
ideh metebaceng idi mebpeh.
7Idé ini luk temubu' mepad kudeng Abpa' Nil,
mepad kudeng abpa' luk ngereb?
8Ieh ineh Masir luk temubu' mepad kudeng Abpa' Nil,
mepad kudeng abpa' luk ngereb.
Kebala Masir, ‘Ui miak temubu' idi ngereb amung tana'
idi ngusag bawang idi ngaté lemulun luk tudo déi'.
9Ngecuk kuda idi keréta nalan!
Nima' amung baweh nalan:
lun rat Sudan idi Libia luk ngimet utapdeh,
idi lun rat Lidia luk ngimet busu.’ ”
10Aco sini, ieh ineh aco Tuhan Allah luk Melalud:
aco sini Ieh miak ngua';
aco sini Ieh ngukum bunu'Neh.
PelapetNeh miak kuman nedeh, idi ngirup dara'deh
pad ieh mebor.
Aco sini Tuhan luk Melalud ngaté lemulun luk inukumNeh
pa tinueh busat aco, muneng ku Abpa' Pirat.
11O lun Masir, do' amé' Giliad,
idi nakap ubat!
Amung ubat muyuh sebuleng na ulekneh,
idi na luk miak ngedo' nemuyuh.
12Amung pupu neninger ratnan igu' muyuh,
idi teh amung lemulun neninger tido muyuh.
Dueh burur lun pebunu' mepatuk,
idi didueh meluka'.
Acing Nebukadnesar
13 #
Yer 43.10–13
Kebala Tuhan ni Yeremia kareb Nebukadnesar raca' Babil iné' ngerieng bawang Masir,
14“Mada' bala ini bang amung bawang Masir,
do' déi' Migdol, Mempis, idi Tapanes.
‘Do' temina' amé' pebunu';
amung binaweh idi bawang muyuh miak uen ngusag bang bunu'!
15Ngudehké akang muyuh luk melalud nebpeh?
Ngaceku Tuhan luk nenecat neneh!’
16Lun pebunu' muyuh netebaceng idi nebpeh,
kebaladeh seburur inan seburur,
‘Miket! Do' tau muli',
pad tau mepuit ratnan pelapet bunu' tau!’
17“Maré kuan raca' Masir aceh ngadan luk mebaruh,
ieh ineh ‘Rayeh Tang Mo'-Mo'.’
18Ui ini Tuhan luk Melalud luk raca'.
Ui ini Allah luk mulun.
Mepad kudeng Pegkung Tabor meluun dita' ratnan amung pegkung,
idi Pegkung Karmel medita' ratnan abpa' rayeh,
kudeng ineh teh tueh lemulun luk munu' namu.
19O muyuh lun Masir,
do' muyuh temina' tebanen!
Mempis miak mangun ku su luk ali-ali,
idi bawang luk inusag luk na lemulun.
20Masir mepad kudeng sapi' tineh luk do'
luk kitep pitek luk rat pa tinueh busat aco.
21Lun pebunu' luk uen nabpar pana',
melaya' kudeng anak sapi'.
Na ideh tuman pebunu',
iamo' ideh upun buro,
ngaceku aco luk nandeh kumin pangeh nacing,
ieh ineh aco atédeh.
22Lun Masir upun buro, idi muni kudeng uni menipeh,
kareb baweh bunu' macing
idi ngapak nedeh ku uaideh,
mepad kudeng lemulun ngapak kayuh.
23Ideh temara' pulung Masir.
Anak itindeh na mekiap,
idi lun pebunu'deh meluun ula' ratnan kato.
24Lun Masir inigu' idi linaya' pupu rat pa tinueh busat aco.
Ui ini Tuhan pangeh nepebala.”
25Kebala Tuhan luk Melalud, Allah lun Israil, “Ui miak ngukum Amon, allah lun Tibis, perapu dengan Masir idi amung allah idi raca'deh. Ui miak ngukum raca' Masir idi amung lemulun luk merapet neneh. 26Ui miak maré nedeh bang palad lemulun luk sikal ngaté nedeh, ieh ineh Nebukadnesar raca' Babil idi bawehneh. Iamo' muci aco lemulun miak tudo déi' Masir, mepad kudeng luk atun. Ui ini Tuhan pangeh nepebala.”
Tuhan Miak Ngulun PupuNeh
27 #
Yer 30.10–11
“O amung inul demulunKu Yakub,
aleg muyuh matot.
O lun Israil, aleg megagap.
Ui miak muit nemuyuh ratnan bawang luk mado,
rat su luk inan muyuh pangeh tiban.
Muyuh miak lemubed idi mulun dengan do'.
Muyuh miak do' udeng, idi na lemulun miak ngagau nemuyuh.
28Ui idi dengan muyuh idi ngulun nemuyuh.
Ui miak ngusag amung bawang
su luk inanKu nengatad nemuyuh,
iamo' na Ui ngaté nemuyuh.
Na Ui nima' nemuyuh na ngalap ukum,
iamo' kareb Ui ngukum nemuyuh
Ui miak méi' nemuyuh.
Ui ini Tuhan pangeh nepebala.”
Currently Selected:
YEREMIA 46: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
