YEREMIA 44
44
Bala Tuhan Kuan Lun Yahudi Déi' Masir
1Tuhan nepebala ni Yeremia ratnan amung lun Yahudi luk tudo déi' Masir bang amung bawang Migdol, Tapanes, Mempis, idi bang bawang luk pa kabing busat aco. 2Kebala Tuhan luk Melalud, Allah lun Israil, “Muyuh sebuleng pangeh nekali' susa' luk icingKu kuan Yerusalim idi amung bawang Yahuda. Macing nekini pana' bawang ineh inusag idi na lemulun. 3Ui nenganau' kudeng ineh ngaceku lun bang bawang ineh nenganau' luk dat, pad Ui museh nedeh. Ideh nemaré baré kuan allah baken idi nesembayang inan allah luk nateh nekali'deh, luk nateh nekali' muyuh idi luk nateh nekali' tepun muyuh. 4Na Ui ugka' ngecuk demulunKu lun nabi luk mada' nemuyuh pad muyuh na nganau' kekamen luk dat ini luk inanKu megateh. 5Iamo' na muyuh ninger idi maya' balaKu. Muyuh na sikal ugka' nganau' luk dat, ieh ineh muyuh nemaré baré kuan allah baken. 6Ngaceku ineh Ui nengutang useh idi gatehKu luun amung bawang Yahudi idi luun dalan Yerusalim pad Ui nengeseb nedeh. Bawang ineh inusag pad ideh mangun ku aceh luk inan megagap macing aco sini.
7“Idi Ui ini Tuhan luk Melalud, Allah lun Israil ngitun nemuyuh anun punneh muyuh nganau' luk dat kuan burur muyuh sebuleng. Ngudehké muyuh pian ngacing susa' kuan deléi idi decur, anak adi' idi anak isuut, pad seburur pana' arang pupu muyuh nateh luk ketecan. 8Ngudehké muyuh nganau' Negku museh ku akang muyuh, idi baré muyuh kuan allah baken tungé' Masir su luk inan muyuh tudo nekini? Kali' rungen muyuh ngusag ulun muyuh sebuleng, pad anid-anid pupu bang tana' ini miak situnga nemuyuh, idi neten ngadan muyuh ku kediman. 9Nekelupan muyuhké amung kekamen luk dat luk pangeh kikem muyuh idi awan muyuh, tepun muyuh, idi raca'-raca' Yahuda idi awandeh pana' bang amung bawang Yahuda idi luun dalan Yerusalim? 10Iamo' macing aco sini muyuh nateh nengebeneh burur muyuh. Idi muyuh na matot Negku pad muyuh mulun maya' bala idi ukum luk biréKu kuan muyuh idi kuan tepun muyuh.
11“Ngaceku ineh, Ui ini Tuhan luk Melalud, Allah lun Israil miak ngacing susa' kuan muyuh, pad Ui ngusag amung bawang Yahuda. 12Ui miak ngukum nelun Yahuda luk ketecan idi luk mesaad sikal amé' Masir. Kali' rungen amung-amungdeh miak maté déi' Masir. Sebuang miak maté bang bunu'. Idi sebuang miak maté ku lau. Ideh miak mangun ku aceh luk inan megagap. Lun baken miak situnga nedeh idi neten ngadandeh ku kediman. 13Ui miak ngukum nedeh luk tudo déi' Masir, mepad kudeng Ui nengukum Yerusalim — ku bunu', lau, idi ét. 14Seburur pana' rat arang lun Yahuda luk ketecan idi luk iné' tudo déi' Masir, nateh luk miak mepuit idi mulun. Seburur pana' nateh luk miak lemubed amé' Yahuda, ieh ineh bawang luk inandeh pian tudo sekua' teh, iamo' tuda'-tuda' burur lemulun mo' luk buro.”
15Idi amung deléi luk nekali' ratnan decurdeh luk nemaré baré kuan allah baken, idi teh amung decur luk tuped ieneh, dengan lun Yahudi rat pa kabing busat aco, ieh ineh mula' lemulun nepebala ni Yeremia, 16“Kai ara' ninger bala luk bilamu nekai dengan ngadan Tuhan. 17Kai sikal nganau' amung-amung luk pangeh bila kai. Kai miak maré baré kuan allah decur luk titen Raca' Decur Surga, idi kai miak ngutang baré luk rupen kuanneh, mepad kudeng luk inau' kai idi tepun kai, raca' kai idi lun rayeh kai bang amung bawang Yahuda idi luun dalan Yerusalim. Kareb ineh kai mula' akan, idi kai do' udeng. Idi na inan susa'. 18Iamo' kareb kai nugka' maré baré kuan Raca' Decur Surga idi nugka' ngutang baré luk rupen kuanneh, idi kai na ngalap anun-anun idi pupu kai pangeh naté bang bunu' idi ku lau.”
19Idi kebala decur-decur ineh, “Kareb kai nenganau' pinaram mepad kudeng ayu Raca' Decur Surga, idi nemaré baré kuanneh, idi nengutang baré luk rupen kuanneh, idi awan kai mawang niat ratnan luk inau' kai.”
20Idi kebala Yeremia kuan amung lemulun ineh, do' deléi idi decur luk nengor balaneh kudeng ineh, 21“Ratnan baré luk biré muyuh idi tepun muyuh, raca' idi lun rayeh muyuh dengan amung anak itindeh bang amung bawang Yahuda idi luun dalan Yerusalim, muyuh ngerawé Tuhan na nekali' ratnan ineh, kian Ieh nekelupan lek. 22Idi nekini bawang muyuh inusag idi na lemulun. Ieh pangeh mangun ku aceh luk inan megagap idi lun baken neten ngadanneh ku kediman, ngaceku Tuhan na tuman ku kekamen muyuh luk dat. 23Susa' luk nekini pangeh nacing nemuyuh ngaceku muyuh nemaré baré kuan allah baken idi nenganau' sala' pa kiung Tuhan. Na muyuh mulun maya' bada' idi ukumNeh.”
24-25Yeremia nemada' nelun mula', meluun teh decur-decur ineh, amung-amung luk bila Tuhan luk Melalud, Allah lun Israil kuan lun Yahuda luk tudo déi' Masir, kebalaNeh, “Muyuh idi awan muyuh pangeh nepejani' inan Raca' Decur Surga. Muyuh nepejani' maré baré kuanneh idi ngutang baré luk rupen kuanneh, idi muyuh pangeh nemaya' jani' muyuh. Kudeng pieh kudeng ineh, do' muyuh maya' jani' muyuh! 26Iamo' do' muyuh ninger jani' luk Ui ini Tuhan pangeh nenganau' bang ngadanKu luk melalud kuan amung muyuh lun Yahudi déi' Masir: Na tu Ui miak nima' nemuyuh neten ngadanKu kareb muyuh pebulung, kebala muyuh, ‘Dengan ngadan Tuhan Allah luk mulun!’ 27Ui miak ngukum nemuyuh pad muyuh na ngalap peruan, iamo' amung muyuh maté. Amung muyuh lun Yahuda luk tudo déi' Masir miak maté bang bunu', kian ku ét lek, pad seburur pana' rat arang muyuh nateh luk ketecan. 28Iamo' tuda'-tuda' burur rat arang muyuh miak mepuit idi muli' rat Masir amé' Yahuda. Idi lun Yahuda luk ketecan rat arangdeh luk iné' Masir miak kali' bala sapeh luk matu, balaKuké, kian, baladeh lek. 29Ui ini Tuhan miak maré aceh tanu' luk ngegala' Ui miak ngukum nemuyuh bang bawang ini, idi jani'Ku ratnan ngacing susa' kuan muyuh miak mangun. 30#2 Rac 25.1–7 Ui miak maré Hopra, raca' Masir, bang palad bunu' luk sikal ngaté neneh, mepad kudeng Ui nemaré Sedekia raca' Yahuda bang palad Nebukadnesar, raca' Babil, ieh ineh bunu'neh luk sikal ngaté neneh.”
Currently Selected:
YEREMIA 44: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
