YEREMIA 43
43
Yeremia Inuit Iné' Masir
1Kareb Yeremia pangeh nemada' amung-amung bala luk biré Tuhan Allahdeh badén kuandeh, 2idi Asaria Hosaya, Yohanan Karia dengan amung lun rurumdeh nepebala ni Yeremia dengan medita' niat, “Mebalih iko! Tuhan Allah tau na nengecuk namu mebpeng nekai na miak amé' tudo déi' Masir. 3Iamo' Baruk Neria pangeh nengagau namu pad iko pian maré nekai bang palad lun Babil, pelé ideh ngaté nekai idi naban nekai amé' Babil.” 4Idi Yohanan, idi lun rayeh baweh, idi lun mula' pana' na pian maya' ukum Tuhan, idi na pian tudo bang bawang Yahuda. 5#2 Rac 25.26 Idi Yohanan dengan amung lun rayeh baweh nenguit amung lemulun luk ketecan bang bawang Yahuda amé' Masir. Ideh nenguit amung-amung lemulun luk pangeh nelemubed amé' Yahuda ratnan bawang luk inandeh pangeh pitad: 6ieh ineh deléi idi decur, anak idi anak raca' luk decur. Ideh nenguit amung-amung lemulun luk biré Nebusaradan, lun rayeh baweh bang palad Gedalia, dengan Yeremia idi Baruk pana'. 7Ideh nengelaba ukum Tuhan idi iné' Masir, macing bawang Tapanes.
8Kebala Tuhan ni Yeremia déi' Tapanes, 9“Ngalap tuda'-tuda' batu luk rayeh idi nanem ineh pa atun munung tanga' ruma' raca' bang bawang ini, pad lun Yahudi nier namu nganau' ineh. 10Idi mada' nedeh, kebalamu, ‘Ui ini Tuhan luk Melalud, Allah lun Israil miak nguit demulunKu, Nebukadnesar raca' Babil, idi nganau' kerusineh pa luun batu luk tinanemKu idi mudut lepo kibung raca' pa luun ineh. 11Nebukadnesar miak amé' ngelaya' bawang Masir. Lemulun luk petulu maté miak pitayenneh. Lemulun luk petulu uen naban miak tebanenneh. Lemulun luk petulu maté bang bunu' miak pitayenneh bang bunu'. 12Ui miak ngeseb ruma' amung allah lun Masir, pad raca' Babil miak ngeseb sebuang allahdeh idi sebuang miak tebanenneh. Mepad kudeng lun luk matar dumba nala' kutu dumba rat luun kuyu'neh, kudeng ineh teh raca' Babil miak ngeligan bawang Masir, idi muli' dengan do'. 13Ieh miak ngusag ulung batu déi' Bait Samas luk déi' Masir ineh, idi ngeseb amung ruma' allah lun Masir.”
Currently Selected:
YEREMIA 43: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
