YEREMIA 31
31
Israil Muli'
1Kebala Tuhan, “Tarekneh malé macing kareb Ui mangun ku Allah amung pupu Israil, idi ideh miak mangun ku pupuKu. 2Ui pangeh méi' kuan lemulun déi' su luk ali-ali luk nepuit ratnan até. Kareb lun Israil pian ngato erurdeh, 3idi Ui nesilagan kuandeh rat mado. O muyuh lun Israil, Ui megéi' mawa nemuyuh pad Ui megéi' ngegala' éi'Ku. 4Ui miak naped nemuyuh baruh. Muyuh miak ngalap karing muyuh idi ngalai dengan awang niat. 5Sekua' teh muyuh miak nibu kabun anggur luun surud Samaria, idi lemulun luk nibu kabun ineh miak kuman bua'neh. 6Matu, tarekneh malé macing kareb lun matar bawang miak ngitang rat luun surud Epraim, ‘Do' tau mudik amé' Sion, idi papu' Tuhan Allah tau.’ ”
7Kebala Tuhan,
“Menani dengan mawang niat kuan Israil,
pupu luk meluun rayeh.
Do' muyuh menani ngubur Tuhan,
‘Tuhan pangeh nengulun pupuNeh,
idi nemuit amung lun luk neketecan.’
8Ieh miak nguit nedeh rat pa tinueh busat aco,
idi ngamung nedeh rat iring tana'.
Lun mebuser idi lun luk mekio' miak maya' nedeh,
idi decur luk mali', idi luk malé nenganak;
amungdeh miak lemubed mangun ku aceh pupu luk rayeh.
9PupuKu miak lemubed dengan nangi',
idi sembayang kareb Ui nguit nedeh muli'.
Ui miak nguyut nedeh macing inan arur,
idi maya' dalan luk do', pad ideh na metebaceng.
Ui ini mepad kudeng taman lun Israil,
idi Epraim, ieh ineh anakKu luk atun.
10Amung pupu, ninger balaKu, ieh ineh Tuhan.
idi mada' balaKu déi' bawang luk mado!
Ui ini, luk nengatad nelun Israil, miak ngamung nedeh
idi matar nedeh mepad kudeng lemulun luk matar sengeriudan dumbaneh.
11Ui pangeh nengulun nelun Israil,
idi nemuit nedeh rat bang palad aceh pupu luk rayeh.
12Ideh miak amé' menani dengan mawang niat luun Pegkung Sion,
idi ideh mawang niat ku baréKu,
ieh ineh padé, abpa' anggur, umau, dumba, idi sapi' pana'.
Ideh mepad kudeng aceh kabun luk megéi' uen mubpur,
idi ideh na miak medereh teh.
13Amung anak adi' decur miak ngalai dengan mawang niat,
idi deléi luk mengered idi luk isuut teh miak mawang niat.
Ui miak ngubuk nedeh, pad tidodeh mangun ku awang,
idi susa'deh pana' mangun ku awang niat.
14Ui miak ngebor amung imam dengan akan luk meluun do',
idi maré amung-amung luk pian pupuKu.
Ui ini Tuhan pangeh nepebala.”
Ei' Tuhan Kuan Lun Israil
15 #
Pud 35.16–19; Mat 2.18 Kebala Tuhan,
“Inan aceh tang pindenger déi' bawang Rama.
Inan luk nangi' idi temido teh,
ieh ineh Rakel luk nangi' ku anakneh,
idi na ieh miak buken,
ngaceku anakneh na idi peh.
16Aleg iko nangi',
idi do' miid abpa' matehmu.
Amung-amung luk inau'mu kuan anakmu
na miak na uen ngua',
idi ideh miak lemubed ratnan bawang bunu'deh.
Ui ini Tuhan pangeh nepebala.
17Muyuh miak uen ngeperuan muci;
idi anak muyuh miak muli'.
Ui ini Tuhan pangeh nepebala.
18“Idi Ui ninger lun Israil pebala dengan mesusa' niat,
‘O Tuhan, kai mepad kudeng sapi' deléi luk ungeng,
iamo' Iko nemada' nekai pad kai nemaya' balaMu.
Do' Iko nguit nekai lemubed,
ngaceku kai pian lumi Namu,
Iko luk Tuhan Allah kai.
19Kai neteketed rat Namu,
iamo' na mio teh idi kai pian lumi Namu.
Kareb Iko pangeh nengukum nekai,
kai netekunal ku susa' kai.
Idi kai pelaba igu',
ngaceku kai mesala' kareb kai isuut.’
20“O Israil, iko anak luk inanKu mawa
idi luk inanKu méi'.
Kareb Ui neten ngadanmu,
niatKu sigio ngerawé namu.
Ui miak méi' namu,
Ui ini Tuhan pangeh nepebala.
21Do' nganau' etu dalan,
idi lemubed maya' dalan luk nedalan muyuh atun.
Lemubed O lun Israil,
idi muli' amé' bawang luk pangeh tican muyuh.
22Tuda' ioké muyuh perapid terawé, O muyuh luk na manu?
Ui ini Tuhan pangeh nenganau' luk mebaruh:
seburur decur luk pelaba laya' mepad tueh kudeng deléi.”
Muci Aco Pupu Allah Miak Ngalap Peruan
23Kebala Tuhan luk Melalud, Allah lun Israil, “Kareb Ui nguit nelun Israil muli', idi ideh miak pebala bang tana' Yahuda idi bang amung bawangneh,
‘Do' Tuhan ngeperuan surud Yerusalim luk meligan,
ieh ineh su luk meligan luk inanNeh tudo.’
24Muci lemulun miak tudo bang amung bawang Yahuda, idi ideh miak nganau' lati' idi matar aya'deh. 25Ui miak ngato erur lemulun luk merur idi ngebor lemulun luk melaya' ngaceku melau. 26Ideh miak pebala, ‘Ui pangeh nerudap idi ui metueh burur peh.’
27“Ui ini Tuhan pebala, ‘Tarekneh malé macing kareb Ui manu' tana' Israil idi Yahuda ku lemulun idi pung. 28Mepad kudeng atun Ui matar nedeh pad Ui miak mubput, necat, ngusag, ngaté, idi ngedereh nedeh, kudeng ineh teh nekini Ui miak matar nedeh pad Ui mudut idi nibu nedeh. 29#Yeh 18.2 Idi kareb ineh na lemulun miak pebala,
‘Amung-amung taman pangeh nekuman bua' anggur luk melam,
idi lipen anak-anakdeh melaya' peh.’
30Iamo' anid-anid burur luk kuman bua' anggur luk melam, kali' rungen lipenneh sebuleng miak melaya'. Idi anid-anid burur lemulun miak maté ngaceku sala'neh sebuleng.”
31 #
Mat 26.28; Mrk 14.24; Luk 22.20; 1 Kor 11.25; 2 Kor 3.6 #Ibr 8.8–12 Kebala Tuhan, “Tarekneh malé macing kareb Ui miak nganau' aceh pejani' luk mebaruh dengan pupu Israil idi Yahuda. 32Na ieh mepad kudeng pejani' luk inau'Ku dengan tepundeh kareb Ui nguyut nedeh remuat rat bang bawang Masir. Na ideh lutep maya' pejani' luk inau'Ku kuandeh, sagan tu pana' Ui luk mangun ku Tuhandeh. Ui ini Tuhan pangeh nepebala. 33#Ibr 10.16 Idi kareb ineh, ini jani' luk miak ruenKu dengan pupu Israil. Ui miak nganau' balaKu bang terawédeh, idi ngayud bala ineh bang niatdeh. Ui miak mangun ku Allahdeh, idi ideh mangun ku pupuKu. 34#Ibr 10.17 Idi na ideh megéi' mada' nelun dengandeh, idi pebala inan kinanak-kinanakdeh, ‘Do' muyuh miti Tuhan,’ ngaceku amung-amungdeh miak miti Negku, anak-anak idi lun rayeh pana'. Ui miak maré do' ratnan sala'deh idi na ngerawé kekamendeh luk dat teh. Ui ini Tuhan pangeh nepebala.”
35Tuhan maré mateh aco ku acang,
gituen idi bulan ku acang kareb medacem.
Ieh miak nganau' lipak abpa' rayeh meberi.
NgadanNeh, Tuhan luk Melalud.
36KebalaNeh, “Israil miak mangun ku aceh pupu pa kiungKu,
pad macing kekiped tana'.”
37Kudeng langit miak uen nari,
idi luk pa liang tana' miak kali',
kareb ineh mo' Ieh miak nala' pupu Israil,
ngaceku amung-amung luk inau'deh.
Tuhan pangeh nepebala.
38Kebala Tuhan, “Tarekneh miak macing kareb bawang ini miak piduten baruh, rat Pudut Hananel luk Medita' macing Tanga' Lidung. 39Idi rat ieneh lakan tana' miak ngelibut bawang, pa acep aco macing surud Garib, idi rat ieneh macing Goa. 40Aput ruan ineh, su luk inan muyuh nganau' butung idi arap, idi amung tana' luk pa luun Arur Kidron macing Tanga' Kuda luk pa busat aco, miak mangun meligan kuanKu, ieh ineh Tuhan. Bawang ineh na tu-tu mekusag peh.”
Currently Selected:
YEREMIA 31: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
